สิ่งที่เฮ็ดให้บ้านมหา เข้ามาแล่วสนุกสนาน เพราะอีหยังวะติ เพราะเฮาเป็นคนบ้านเดียวกัน ไปไสกะมีแต่พี่แต่น้องแต่นุ่ง ถ้าบ่นุ่งกะยากอยู่เด้อ ฮ่า ๆ ๆ
และอันสองกะคือความลงตัวของเว็บบ้านมหาดอทคอม บางคนโทรมาถามข่อยว่าเว็บบ้านมหาคือดังแถะ คือมีคนเข้ามาหลายแถะ เว็บมาสเตอร์เพิ่นเล่นของตี๊พะนะ ฮ่วย ของหยังโดเนี่ย เล่นบ่เล่นข่อยสิเห็นนำเลาตี๊ เว่าไปทั่วเจ้านี่กะดาย ฮ่า ๆ ๆ ๆ
ตั้งแต่มีไฮ 7 มีห้องกล่องขอเพลง มีห้องแชต ข่อยว่าม่วนหลายกว่าเก่าอยู่เด้เนาะ โดยเฉพาะมีเพลงฟังตลอด 24 ชั่วโมง โดยทีมงานดีเจอาสาผลัดเปลี่ยนกันมามอบความม่วนซืนให้พวกเฮา
เว่าฮอดดีเจอาสาข่อยล่ะชื่นชมพวกเพิ่นหลาย เพราะเพิ่นเฮ็ดด้วยใจฮักอีหลี นั่งจนหลังขดหลังแข็งมาจัดเพลงให้เฮาฟัง และต้องอดทนต่อความเหนื่อย หิว และอื่น ๆ เป็นจั่งผู้ข้าดอกหวา บางเทือได้หมกปลาซิวมาแต่ตลาด เปิดออกมาหอมฮ่วย ๆ ว่าสิจ้ำจักคำ กะฮอดเวลา ถ้าสิเคิกมากินกะย่านบ่เห็นแฟนเพลงขอเพลงแมะ ฮ่า ๆ ๆ
ส่วนไฮ 7 กะเปรียบเสมือนบ้านผู้นั้นผู้นี้ เวลาเข้าไปกะคือไปแวะบ้านนี่ล่ะ เจ้าไปแวะบ้านข่อยแล้ว ข่อยกะมาแวะบ้านเจ้า เจ้าเอาแกงหน่อไม้ไปส่งข่อย ข่อยเอาปลาแดกอึ่งมาส่งเจ้า
ส่วนห้องแชตกะมีกะสามารถคลิ๊กข้อความส่วนตัวมาทักทายกัน เอิ้นกันไปเว่ากันสองต่อสอง เพิ่นเลยพากันเอิ้นว่า ห้องจีบบ่าวสาวพะนะ ส่วนหลายมีแต่ผู้เถ่าล่ะมาตั๊วะกัน ฮ่า ๆ
นอกจากนี้กะมีพีเอ็ม หรือข้อความส่วนตัวเว่ากันอีก ถ้าย่านความลับรั่วไหลกะขอเอ็มกันไปจกเอ็มกันอีกพร้อม มีแต่หม่องเล่น
ส่วนหม่องเซาหรือที่พักใจกะมีบอร์ดต่าง ๆ ให้เบิ่งให้แยง ไผถนัดอีหยังกะออกลายมาเล้ย ออกลายให้เห็นโลด ไผถนัดผญากะไปทางผญา ไผไปทางตลกกะไปบอร์ดตลก ไปถนัดหยังกะไปนั่นโลด แต่เบิ่งดี ๆ แนล่ะ เรื่องหยังควรสิเอาลงบอร์ดใด๋กะดาย ถ้าเพิ่นย้ายให้แล้วกะอย่าเคียดส่องเบิ่งดี ๆ ก่อนแน๊ะ
ผู้ที่ย้ายกะเบิ่งทิศทางลมร่มเงาไม้แนเด้อล่ะ แจ้งบอกเพิ่นแน บางเทือข่อยกะสับสนคือกันล่ะ ข่อยจั่งได้อยู่ในบอร์ดไดอารี่นี่ล่ะ ไปหม่องอื่นบ่ได้ย่านหลง เพราะบ้านมหากว้างใหญ่ไพศาล หย่างเบิ๊ดมื่อกะบ่ทั่วเทิง
ช่องทางการติดต่อสื่อสารหลายหม่องเฮ็ดให้พวกเฮาสนิทสนมกัน จึงบ่แปลกอีหยังที่บางคนพ้อกันเทือเดียวกระโดดกัดหูกันโลด เพราะเฮาสนิทสนมกันจากการเว่าการจาในเว็บบ้านมหานี่ล่ะ
ความสนิทสนมกัน ความจริงใจบ่มีแนวแอบแฝง กะเป็นช่องทางให้ซุมอีกซุมหนึ่งเข้ามาเฮ็ดแนวบ่ดีคือกัน ฉะนั้นกะซอยกันเบิ่งกันแยงเด้อ พบเห็นอีหยังบ่ชอบมาพาควรกะค่อยตักเตือนกัน อย่าสิอักไว้คนเดียวหลาย แนวอยู่แนวกินกะดาย อิอิ
ถ้าเหลือบ่ากว่าแฮงหรือเห็นว่าสิมีผลกระทบต่อส่วนรวมกะแจ้งไปยังเว็บมาสเตอร์พุ่นเด้อ ส่วนผู้บริหารระดับสูงสิไปรักษาหูก่อน หมอบอกว่าหูเจ้าบวมย่อนเจ้ารับโทรศัพท์หลายพะนะ
ข่อยกะบ่ได้รับหลายปานใด๋เด้ล่ะ แต่ถ้ามีคนโทรมาหาข่อย ข่อยกะสิเว่าโดนซือ ๆ เพราะข่อยบ่ได้เสียตัง ฮ่า ๆ ๆ ๆ ฮิ้ว
ส่วนการมีคุ้มต่าง ๆ กะเป็นเรื่องดี เปรียบเสมือนมีหมู่บ้านกะมีคุ้มนั่นคุ้มนี่ คุ้มสามเสน คุ้มบูรพา คุ้มปู่เจ้าสมิงพราย คุ้มไทอุบล คุ้มคนฮักบ้าน และกะล่าสุดจุ้มสวนอ้อยพะนะ เพิ่นคือสิมีคนน้อยเนาะจั่งเอิ้นจุ้ม ต่อไปคุ้มนั่นไปยามคุ้มนี่ คุ้มนี่มักคุ้มนั้น ได้แต่งงานกัน... บ๊ะ..ข่อยว่าซงสิเข้าท่าอยู่เด้ ม่วน ๆ และกะม่วน ๆ เพื่อความบันเทิงเด้อ อย่าสิไปคึดหยังหลาย
:1-:1-:1-
ปล. ไผมีปัญหาหยัง อ่า ๆ ๆ เอ้อ แบบว่า มีปัญหาหยังอยากให้ช่วยเหลือ หรือติดขัดหยังกะลองมาเม้นท์ไว้ให้เบิ่งแนเด้อครับ สิได้พยายามช่วยเหลือซอยกันครับ ....ที่แน่ ๆ กะคือมีคนอยากสมัครเป็นสมาชิกบ้านมหาล่ะครับ หลายคัก
Bookmarks