ก่อนสิเข้าไปนั่งในส้วมให้สำรวจเบิ่งดี ๆ เด้อ อันดับแรกคือไฟฟ้าสว่างบ่ บ่แมนปิดประตูไปแล้วมึดตึ๊บ ประตูมีกลอน ล็อคได้บ่ มีฮูบ่ ฮูที่เพิ่นสิส่องเบิ่งเฮาเด้อ บ่แมนฮูที่เฮาสิส่องเบิ่งห้องข้าง ๆ ฮ่า ๆ
อันดับต่อมากะเบิ่งน้ำท่าให้ดี ๆ โดยเฉพาะชักโครก ชักได้บ่ น้ำไหลบ่ ที่ฉีดน้ำเป็นจั่งใด๋ อันข่อยซังหลาย ๆ ส้วมชักโครกมีแต่กระดาษทิชชูไว้เช็ดซือ ๆ น่ะ ซงสิอยู่บ่กุ้มมื่อนี่ล่ะ เช็ด ๆ ไปก่อนแล้วไปหาหม่องที่มีน้ำล้างใหม่เด้อ
ส้วมที่เหลียวเห็นขากันแถว ๆ โรงพยาบาลข่อยกะซัง บางคนท้องเสียกระเด็นกระดอนมาเหยียบแมนถึกขาข่อย ยิ่งถ้าเงาที่พื้นเปียกสิเหลียวเห็นอีกฝ่ายนั่งโตดโหมดอยู่ ฮ่า ๆ ๆ
ส่วนมารยาทในการเข้าส้วม กะอย่าเบ่งแฮงปานสิออกลูกหลาย เอาพอซำใด๋ซำหนึ่งกะพอล่ะ ถ้ามันออกยากอีหลีกะยืนขึ้นเพื่อเป็นการบีบหัวให้มันเรียวแบน แล้วนั่งใหม่ หรือเอาสบู่ถู ๆ เพื่อให้มันออกง่าย
ผ้าอนามัยอย่าถิ่มลงโถส้วมเด้อ ถ้าเป็นช่วงวันนั้นของเดือนกะหากระดาษทิชชู่ห่อให้เรียบร้อย หรือกระดาษอีหยังกะได้ ข่อยซังอีกอย่างพวกที่มักสูบบุหรี่ในห้องน้ำ ข่อยขิวหลาย
หลังจากเสร็จกิจแล้ว ราดน้ำฉีดน้ำให้เรียบร้อย อย่าให้มีสะเก็ดเล็กสะเก็ดน้อย ยกหม่องนั่งขึ้นให้น้ำแห้ง
ที่ตั้งกระทู้นี้ขึ้นมาก่อนกินข้าวงาย กะเพราะว่าข่อยเคยซั่นดอก เสร็จกิจเรียบร้อยน้ำในห้องน้ำบ่ไหล ข่อยเฮ็ดจั่งใด๋ข่อยขอเซ็นเซอร์เด้อ ฮ่า ๆ ๆ ลำบากคัก
ที่ทำงานข่อยรณรงค์เรื่องเข้าห้องส้วมเป็นอับดับแรก ๆ เพราะส้วม ห้องน้ำ คือหน้าตาของสำนักงาน และถ้าอยู่บ้านเฮากะคือหน้าตาของบ้านคือกัน
ตามปั้มใหญ่ ๆ เพิ่นมีการประกวดส้วมระดับประเทศพุ่นเด้ บ่ว่าสิเป็นเรื่องความสะอาด การระบายอากาศ ทัศนียภาพของส้วม สุขภัณฑ์ รวมถึงกลิ่นของส้วม
ปีก่อนพุ้นข่อยไปเบิ่งส้วมชนะเลิศแถว ๆ ปากช่อง ป๊าด..ปานห้องนอนกะจั่งว่า
เรื่องนี้บ่แมนเรื่องธรรมดาเด้อ โดยเฉพาะส้วมอยู่หน้าบ้าน คือบ้านพักข่อย ฮ่า ๆ ๆ
ประโยชน์ของส้วมอีกอย่างคือเป็นที่รวมของนักเขียนต่าง ๆ เพิ่นมาเขียนลำดับญาติกัน สถาบันนั้นเป็นพ่อสถาบันนี้ และมีบทกลอนต่าง ๆ นั่งไปพร้อมอ่านไปพร้อมเพลินดีเด้น้อ
"สักวานั่ง...ให้ดีหน่อย ค่อยค่อยปล่อยบรรจงให้ตรงฐาน
...เรี่ยราดอุจาดตาน่ารำคาญ นั่ง...นานเขาว่าอู้รู้ไว้เอย"
Bookmarks