บ่าวเฒ่า เพิ่งได้ยินเขาเรียกเจ้าของนี่ละครับ แต่กี้บ่ได้ยินจักเทือ นึกว่าอยู่โสดมันสิดี ไปสัยกะสดวกสบาย พี่น้องเอ้ยแต่กี้ไปเล่นสาวบ้านได มีผู้สาวเว้านำแตกชวดๆ แต่เดี๋ยวนี้สิแชวเขาเอิ้นพ่อใหญ่หมด ฮ่าๆ แต่เป็นบ่าวน้อยเนาะครับ ว่าแม่นเล่นสาวกะแข่งมู่ได้ยู่ดอก มู่ว่าผมพุ้นละสิได้เมียก่อนมู่ เล่นผู้สาวผู้ไดผู้สาวกะติด (ติดพะนะ คำว่าติดแปลว่าจังไดน้อบัดนี้ ฮ่าๆ) มาพร้อมโลด ย้อนว่ามู่เว้าจังชี่ละกะเลยบ่อยากได้เมียเร็ว มีมู่สนิทกันอยู่ ห้า คน ไปสัยนอนไหนกะนอนนำกัน เฮ็ดหยังกะเฮ็ดนำกันครับ บ่เฮ็ดนำกันได้ กะผู้สาวไผกะผู้สาวมันนี่ละครับ พอมู่คนแรกแต่งงานไป กะหายหน้าหายตาไป บาดนี้กะเหลืออยู่ สี่คน และแล้วมู่คนที่ สอง สาม สี่ กะแต่งงานไปกะหายหน้าไปที่ละคน และคนที่ครองโสดได้กะคือผมละครับ ไปเล่นสาวกะไปคนเดียว ไปนำบ่าวสำน้อยกะย่านบ่สู้เขา กะอายพร้อม อายุย่างเข้า ยี่สิบห้า กะยังบ่ได้เมียนำมู่อยู่ ย้อนว่า สาวอายุ ยี่สิบขึ้นเขากะแต่งงานกันไปหมดแล้ว ยังแต่สาวรุ่น 17-18 เขากะเอิ้นเฮาพ่อใหญ่ กะเลยบ่กล้าไปเล่นนำเขาอีก มีเทือหนึ่งครับ ไปเล่นหลานสาวมู่คนที่สิแต่งงานไปก่อนมู่ กะเลยขึ้นไปนั่งนำผู้สาว อายุเขา 18 ปีนี่ละครับ เขากะหาน้ำหาท่ากินอย่างดีครับ กะนั่งเว้ากันอยู่ดีๆ ลูกสาวมู่อายุ 10 ขวบนี้ละครับกะขึ้นมา พอเห็นหน้าผมเขากะเลยถาม พ่อมาหยัง โอ้ยยย พี่น้องเอ้ยพออย่างแลนลงเฮียน สิตอบลูกสาวมู่ว่าจังไดดี ผมกะเลยตอบว่ามาเล่นนำพ่อใหญ่อยู่เฮียนนี้ละ พ่อใหญ่บ่อยู่กะเลยมาเว้านำ อาของลูกนี้ละ พ่อกลับก่อนเด้อ เว้าแล้วกะเลยฟาวลงเฮียนพี่น้องเอ้ย เป็นตาอยากอายลูกสาวมู่เนาะ หาผู้อยู่นำยากเนาะครับสื่อมื้อนี้ เดี๋ยวนี้หนุ่มน้อยสาวสำน้อยเขาเอิ้น ฉายาอ้ายบ่าวเฒ่าค้างโคก หมดแล้วละ สมน้ำหน้าเจ้าของแต่เป็นหนุ่มน้อยผู้สาวหลายๆกะบ่เลือกเอาจักคน บัดนี้เขาแต่งงานไปหมดแล้ว
คติเตือนใจของผู้ชาย : อย่ามองเห็นผู้หญิงเหมือนของเล่น มีแล้วให้เก็บรักษาน้ำใจไว้ให้ดี ชื่อสัตว์ หมั่นคง แก้ปัญหา ร่วมทุกข์ร่วมสุข นี่แหล่ะที่ผู้หญิงต้องการ
Bookmarks