วันเสาร์ไปถวายเพล หลวงปู่ลาย วันอาทิตย์
น้องหลินไป ถวายเพล หลวงปู่พิณ วัดถ้ำผานางแอ่น น้องหลินจะไปวัดเทิงภู
เทิงเขา นำฮ่อง นำห้วย เป็นส่วนใหญ่ค่ะ วัดนี่คุณบรรเจิด ทองแท้ เพิ่นกะมาบ่อย ๆ อยู่
ค่ะ วัดนี่อยู่ลึกเข้าไปในดงแหน่จักหน่อยค่ะ ทางไปลำบากพอสมควร ปานนั้นญาติโยม
กะไปบ่ขาดสาย มีพระ (ส่วนมากจะว่าหลวงตา หลวงปู่) จำพรรษาอยู่ 5 รูป
นับอายุรวมกันคงจะกายพันพุ่นล่ะค่ะ
ทางไปกะคือเห็นนี่ล่ะค่ะ หัวสั่นหัวคลอน
ผานางแอ่น เป็นหน้าผา มีโขดหินอยู่กลางป่าค่ะ
ชื่อ ผานางแอ่น น้องหลินกะลืมถามอีกค่ะ ว่าเป็นมาจั่งได๋
ไปเทื่อหน้า จั่งจะถามเด้อค่ะ ระหว่างรอให้ถึงเวลาเพล น้องหลินกะหย่าง
สำรวจรอบ ๆ บริเวณ
มีเต่าโตใหญ่ สลักจากหินก้อนใหญ่
กุฎิหลังเก่าของหลวงปู่พิณ สมัยแม่ใหญ่ของน้องหลินยังอยู่เมือ 3 ปีให้หลัง
หลวงปู่ยังพักอยู่ภุฎิหลังนี่อยู่ค่ะ
แนมไปแนมมา มีลิงแข่วฮ้างพร้อมค่ะ ดื้อหลายค่ะ
กุฎิหลังใหม่ของหลวงปู่พิณ ญาติโยมสร้างถวายเพิ่น หัวเรี่ยวหัวแรงหลัก
คือ คุณบรรเจิด ทองแท้ เจ้าของบทเพลง อยากลืม อยากลืม ผู้หญิงคนนั้นตั๋วเป็น
(จำชื่อเพลงบ่ได้จ้อย ) น้องหลินเอิ้นว่า "กุฎิ อารมณ์รีสอร์ท"
หมากส้มโฮงแห้งค่ะ ไผ๋บ่เคยเห็น งามคัก น้องหลินเก็บมาห้อยไว้ชายคาเฮือนอยู่ค่ะ
(ขอเพิ่นแล้วเด้อค่ะ บ่เป็นเปรตดอก)
ลิงโตนี่ยามสำรวม กะสำรวมเป็นอยู่ค่ะ แต่ได้บ่เกิน 3 นาที
หลวงปู่พิณ แห่งวัดถ้ำผานางแอ่น แต่ว่าจะเอิ้นว่าวัดกะบ่ได้ดอกค่ะ เพิ่นเป็นสำนักสงฆ์
โรงครัวหลังคาแดงค่ะ หนึ่งในสิ่งปลูกสร้างบ่กี่อย่างของ สำนักสงฆ์หม่องนี่
ส่วนกุฎิ หลวงปู่รูปอื่น ๆ กะปลูกเสื่องไว้นำป่า ห่าง ออกไป เป็นการปลีกวิเวกที่ดีที่สุดเลยค่ะ
ปล. มื่อน้องหลินไป ไปพ้อเหตุการณ์น่าตื่นเต้นพอดีค่ะ มีญาติโยมเพิ่นว่าหลานสาวเพิ่นถูกคุณไสยฯ
เล่นงาน เลยพาไปหาหลวงปู่ ให้รดน้ำมนต์ ตอนรดน้ำมนต์
พี่สาวคนนั้นฮ้องไห้ เสียงดังเลยค่ะ น้องหลินบ่กล้าถ่ายรูปมาดอกค่ะ
เกรงว่าจะเป็นการละเมิดความเป็นส่วนตัวของเพิ่น เรื่องแบบนี้
กะแล้วแต่วิจารณญาณของแต่ละคนน้อค่ะสำหรับน้องหลินแล้ว
บ่อยากล้อเล่นกับความเชื่อของไผ๋ เลยได้แต่เบิ่งซื่อ ๆ
Bookmarks