ห่อข้าวไปกินเที่ยง

[นู๋น้อย]

:1- มื้อนี้จ้า ตื่นแต่เช้าๆลุกมาเฮ้ดกับข้าวมากินเที่ยงอยู่โรงงาน เพราะ ผบ.ทบ ของท่านประธานใหย่ของบ้าน เผิ่นแช่ข้าวเหนียวไว้ให้นึ่ง สงสัยอยากกินแจ่วพริกดิบ

นั่งแจ๋วประจำบ้าน เลยจัดให้เดียวนี้ ค่ะ นึ่งข้าวสุกแล้วกะเลย ไปซอกหา ของในตู้เย็นว่าพอสะเฮ้ดหยังให้มันเข้ากับข้าวเหนียวนึ่ง ในที่สุดกะพ้อ เนื้อหมูติดมันชิ้น 1 และไก่ต้มน้ำปลาที่ซื้อมาแต่มื้อก่อน พอดีเลย คิดเมนูออกทันที ต้มไก่ กับหมูทอด แถมแจ่วพริกดิบใส่ปลาแดกต่อนๆ จัดไปอย่าให้เสีย

ว่าแล้วนู๋น้อยกะลงมือ ปรุงอาหารเรียบร้อย เที่ยงนี้มาแนวกินแล้ว บ่ต้องพึ่ง น้ำบ่หน้าคือสุมื้อ

ต้มไก่ แบบตามมมีตามเกิด เพราะของในตู้เย็นเบิ้ด ผักหอม เครื่องปรุงเบิ้ดเกลี้ยง มีแต่ ข่า ตะไคร้ ในมะกรูด ท่อนี้กะพอใช้ได้ ว่าแล้วกะ ต้มน้ำเดือๆ หั่นข่า ตะไคร้ ใบมะกรูด(ฉักแล้วขย้ำๆ) โยนลงหม้อ แล้วกะสับไก่ให้เป็นต่อนพอคำ โยนลงหม้อ ตามตะไคร้ไปติดๆ ฮ้าๆๆ ...... เสร็จแล้ว เติมเกลือ ใส่มะขามเปียก ใส่ผงนั่ว(ชูรส) ปิดฝาหม้อตั้งไฟอ่อนๆ แล้วกะไปอาบน้ำถ่า ต้มไก่เปื่อย....



พออาบน้ำเสร็จแล้ว กะหัวเข้าครัวอีกรอบ มาชิมเบิ่ง...ต้มไก่...หือคือแซบแท้หว้า ฝีมือไผ๋น้อ...แบบบ่ต้องปรุงเพิ่ม แล้วกะจัดการแพ็คใส่ถุงเรียบร้อย



อีกอย่างกะ เอาหมูมาล้างน้ำให้สะอาด หั่น แฉลบ บางๆ จั่งสุกง่ายเพราะเวลามีน่อย ใส่ซอส ใส่น้ำมันหอยนิด ใส่พริกไทยตามลงไป คลุกๆๆขย้ำๆๆ ให้เข้ากัน ตั้งกะทะขึ้น แต่..หือ น้ำมันคือเหลือน่อยเดียวละ โอ้ยสิ้นเดือนอะหยังกะเบิ้ดพี่น้อง ฮ้าๆๆ ได้น้ำมันน้อยๆ เทลงไปในกะทะ แล้วเอาหมูลงไป ใช้ไฟอ่อนๆ พอประัมาณ ใช้วิธีจี่เอาบาดนี้ ว่าสะทอดแต่น้ำมันเบิ้ดก่อน เลยกรายเป็นหมูย่าง

ระหว่างรอหมูสุก กะหันมาหาครก ใส่พริกดิบ(แม่ส่งมาให้) ลงไป พ้อมกับ หัวหอม กะเทียม ตะไคร้ ใบมะกรูด ตำๆๆให้แหลกๆ แต่บ่แหลก แล้วกะตักต่อนปลาแดก เลือกต่อน เป็นตาแซบ(ผบ.ทบ.สั่ง) ใส่ชูรส น้ำปลานิดๆ น้ำมะนาว หน่อยๆ ตำๆคลุกๆเข้ากันอีก บ่ต้องชิม ได้แค่กลิ่นกะโอเคแล้ว เกือบลืมหมูจี่ หันไปปิ้น หมูจี่อีกข้าง เพื่อให้สุกท่อกัน
แล้วกะ ตักแจ่มใส่กะปุ๊กห่อข้าว(คึดฮอดสมัยเรียนเด้ห่อข้าวไปโรงเรียน)

หมูจี่สุกแล้ว เอามาหั่นๆๆ แล้วโยนลงกล่องห่อข้าว คือกัน เอาไว้ข้างๆแจ่วนี้ละ





เสร็จเรียบร้อยสุแนวละ เตรียมลงกะเป๋า เดินทางไปโรงงานกัน ปะ..




สมาชิกของบ้านที่กินหลายก่อหมู่ ฮ่าๆๆ ดื้อ..คัก จักว่าไผ๋เป็นเจ่าของเน๊าะ



ปะๆ ไปโรงงานกัน แดวสาย เอ้า เกือนเที่ยงแล้วนิ ฮ้าๆๆ

..........

[ไผ่หวาน]

หมูจี่ สีสวยน่ากินจังจ้า อยากสีกปลาแดกต่อนเ้ด้....

[บ่าวห้วยละโอง]

หย่างลัดถ่งไปกินข้าวเที่ยงกะหญิงใหญ่ทันบ่น้อ

[แมงงอดน้ำ]

เออ หมูย่างเป็นตะแซบเน๊าะ อยากกินเด้ มะคือค้านดังไฟแท้น่อ

[บักขามป้อม]

เอ๋า ว่าแม่นสะห่อข้าวมากินสมุยแมะ คือแวะโรงงานหว่า ผู้หนึ่งล่ะถ่าจ้ำแจ่วบักพริกดิบอยู่ ลีโอกับสไปร์คือใหญ่เร็วแท้ สงสัยใหญ่ย้อนปลาแดก อิอิ

[สาวอำนาจ]

หิวข้าวขึ้นมาทันทีลักเอาสูตรไปเฮ็ดกินเที่ยงนี่กะน๊า..เป็นตาแซบคัก อิอิ

[ธิดายาเย็น]

หอมต้มไก่ กับหมูจี่เด้ ให้เอื้อยกินนำแนเด้อนู่น้อย..

[บ่าวจัย]

ต้มไก่คือแห้งแท้ละนู่ น้ำมันไปใสเบิ่ดแล้วคือสิแซบคักเนาะซดกันจนเบิ่ดแล้วน้ำต้มกะดายอิอิอิอิ

[ชิงช้าชาลี]

ออนซอนห่อข้าวเพิ่นน้อ เป็นตาบ่อดตาย ไปไกลซ่ำได๋กะบ่ย้าน แม่นบ่จ้า

[เซียงสีผีเป้า]

อย่าว่าห่อเถาะครับ แบบนี้ บ้านผมเอิ้น โซน ครับ


หลายคักห่อข้าวกะดาย