เบื้องหลังดีเจอาสาความจริงที่ถูกตีแผ่

[พล พระยาแล]

ขออภัยแฟนเพลงที่ข่อยบ่สามารถจัดรายการให้จบรายการได้ในวันที่ 1 ต.ค.ที่ผ่านมา ช่วงเวลา 21.00 - 24.00 น. เพราะจอมอนิเตอร์ที่ข่อยใช้จัดรายการ หน้าจอมีอาการสั่น ๆ สักพักหน้าจอกะแคบลง ๆ และก็ดับมิดจั๊ด ช่วงนั้นเป็นช่วงที่ข่อยกำลังเปิดเว่าไมค์พอดีซ่ำแหม ฮ่า ๆ ๆ

เฮ็ดจั่งใด๋น้อบาดเนี่ย สิหาหม่องปิดไมค์กะเหลียวบ่เห็นจอมันดับไปแล้ว ว่าสิเอิ้นดีเจเด็กน้อยเลากะนอนแล้ว ลูกซายกะกำลังอินกับหนังในโทรทัศน์ ถ้าเอามือสะกิดกะบ่เถิง สิวางไมค์ไว้กะย่านขาดช่วง กะเลยใช้มือที่สามช่วย

ลูกซายมาขยับสายด้านหลังซีพียู ข่อยกะเว่าไปเรื่อย สักพักลองเปิดหน้าจอ ไชโย เปิดได้แล้ว ดีใจที่สิได้ปิดไมค์และปล่อยเพลงให้พี่น้องได้ฟังซั่นดอก ถ้าบ่จั่งซั่นข่อยสิต้องเว่าฮอดหกทุ่มคัก ๆ ลูกซายบอกว่ากดสวิทซ์ซีพียูแช่ไว้กะดับแล้วพะนะ

พอดีข่อยแนมเห็นดีเจวารินบอยในห้องกล่องขอเพลง กะเลยขอความอนุเคราะห์จากดีเจวารินบอยให้ขึ้นฮ่านต่อให้ ขอบคุณดีเจวารินบอยหลาย ๆ เด้อน้อง ข่อยสิลงฮ่านกะลงบ่ได้เพราะแนมบ่เห็น กะเลยเฮ็ดจั่งลูกซายข่อยบอกนั่นล่ะ

ไปซื้อโน๊ตบุ๊คมากะว่าสิจัดรายการในโน๊ตบุ๊คล่ะพี่น้อง เคยจัดอยู่ตอนซื้อมาเทือแรก เพิ่นกะบอกว่าเสียงไมค์บ่ดีพะนะ ขนาดปิดไมค์แล้วยังได้ยินเสียงข่อยเว่ากันอีกพะนะ สงสัยเข้าไมค์ที่ติดมากับโน๊ตบุ๊คบ่น้อ หาหม่องปิดกะบ่พ้อ กะเลยบ่กล้าจัด ข่อยย่านเพิ่นได้ยินเสียงข่อยป้อยให้เมีย

ขอบคุณพี่น้องที่เข้ามาเป็นกำลังแรงใจให้ทีมงานดีเจอาสาเด้อครับ แมนเพิ่นเข้ามาเป็นกำลังแรงใจบ่บุล่ะ หรือว่ามาเว่ากันซือ ๆ บุ :l-

ดีเจทุกคนที่มาทำหน้าที่ตรงนี้มีความฮักบ้านมหา และมีความเสียสละอย่างดีเยี่ยมครับ เห็นพี่น้องเข้ามาฟังกะดีใจครับ ว่างยามใด๋กะเข้ามาฟังเด้อครับเด้อ แฮ่ม...บางเทือบางช่วง ช่วงออโต้ดีเจมีคนฟังเกือบพัน :l-

บาดข่อยจัดสิล้มสิตาย บางมื่อข้าวแลงกะบ่ได้กิน มากินเอาตอนลงฮ้านหกทุ่ม จ้ำหมกปลาได้คำเดียว ฮอดเวลากะฟ้าวขึ้นฮ่านย่านบ่ทันเวลา สิลุกไปกินข้าว สิลุกไปเข้าห้องน้ำกะอดไว้ กลั้นไว้ ย่านพี่น้องขอเพลงแล้วแนมบ่เห็น นั่งเบิ่งโตหนังสือแลนลุ่ยล่าย ๆ อยู่ตั้ง 5 ชั่วโมง

ลงจากเก้าอี้ หย่างปานเป็ดถึกค้อน ดีเจบางคนลวกมาม่าไว้ว่าสิกิน จนอืดเต็มซามพะนะ บางคนกะกินข้าวหน้าคอมนั่นล่ะ ทั้งเปลือกผลไม้ ทั้งก้างปลาทูกองเอ้เล่หน้าจอคอมฯ จนมดเจาะคีย์บอร์ดพังกะมี ย่านพี่น้องบ่ได้ฟังเพลง ส่วนข่อยกับดีเจเด็กน้อยเฮ็ดหม้อหนึ่งกับหวดไหม้ไปสองอันแล่ว

มีคนบอกข่อยว่าไผกะเป็นได้ดีเจประสาเปิดเพลงซือ ๆ หรือมีแต่ออโต้ดีเจซือ ๆ คนกะเข้ามาฟังหลายกว่าซุมหมู่เจ้าจัดอีกพุ่นล่ะวาซ่าน ข่อยได้ฟังแล้วข่อยฮังเมือยหนักกว่าเก่า

ส่วนโตข่อย ข่อยมักการเป็นดีเจ อยากสิหาลองแต่บ่มีสนามให้ลอง กะมาพ้อบ้านมหานี่ล่ะ อีกอย่างกะอยากดังนำล่ะหวา แต่พอดังแล้วกะยากอีกล่ะข่อยกะดาย

มีแต่คนอยากเห็นหน้าข่อย ไปเบิ่งโลดหน้าบ้านข่อยวันเสาร์-อาทิตย์ บ่มีว่าง กองเอ้เล่อยู่ บ่ ๆ ๆ บ่แมนเกิบที่พี่น้องไปยามเด้อ .... กองขี้หมา

[สาวทองแพง]

อ้ายพลเว้าเรื่องไมค์ แพงกะยังทันลืมเด้จ้า ตะกี้จักว่าจ่มอิหยัง ได้ยินเมิด บ่ได้ปิดไมค์ คิคิ
ขนาดแซวว่าดีเจคันคอบ่กะยังงง คิคิ เทิ่งเสียงไอ เทิ่งเสียงจ่ม (ให้ไผบุ๋ล่ะ 55++)
ขอบคุณดีเจทุกท่านเด้อจ้าพี่สละเวลาอันมีค่ามาเปิดเพลงสู่พี่น้องฟัง
ขอเป็นกำลังแรงใจให้ดีเจอาสาทุกท่านจ้า

[สะใภ้อิสาน]

เข้าใจและเห็นใจดีเจอาสาบ้านมหาคุณคนคะ น้องเอาใจช่วยนะคะที่ชาย

[ฅนภูไท]

ถ้าฟังจากอาการ น่าสิเป็นโตเพาเวอร์จอเสีย ซ่อมกะบ่จักบาทครับ รึเปลี่ยนจอใหม่เลยจอกะบ่แพง
ส่วนโน๊ตบุ๊ค ที่ว่าเสียงไมค์บ่ดีนั้นเป็นที่การเซ็ทค่าไมค์บ่ถืก ปิดไมค์แล้วยังได้ยินเสียง สามารถแก้ไขได้ครับ ลองปิดไมค์ที่โตเครื่อง แล้วตั้งค่า Recoding control หรือที่ Volume control เลือกเป้น advanced control ตรง Recoding control ติกถูกที่ไมค์ ส่วนที่ Volume control ติกปิดเสียงให้หมด ยกเว้น speaker , wave (คร่าวๆเด้อครับ ส่วนรายละเอียดต้องดูที่ชิปเสียง)

ลองเบิ่งครับ ถ้าบ่ได้กะต้องใช้โปรแกรม TeamViewer เดี๋ยวผมเข้าไปเซ็ทค่าให้

[กำลังใจ]

ส่งกำลังใจให้ดีเจอาสาบ้านมหาฯ ทุกคนจ้า

[ข้าวปาด]

555555555 ลงจากเก้าอี้ ย่างปานเป็ดถึกฆอ้น พะนะ เซแถดๆๆเลยวะติอ้ายพล ดีเจข้าวปาดแฮงคัก ลังมื้อน้ำกะบ่ได้อาบ เลิกงานมากะโดดขึ้นฮ้านโลด กั่วสิลงฮ้านกะตีหนึ่งพุ้นนะ ตีหนึ่งฟินแลนด์เด้ หาลังมื้อกะค้านตั่วเนาะ เซ็นไว้กะมีเป้นบางมื้อ อิอิ ลังเทือกะหล่อยหลับป๋าแฟนเพลงกะมีแนอยุ่ 555555555 แต่กะบ่เป้นหยังจ้า ดีใจที่ได้จัดเพลงสู่พี่น้องฟัง อิอิ ว่าตะได้เปิด หย่าววววอย่างเดียว 55555

[sompoi]

น่านับถือและเห็นใจดีเจอาสาอิหลีค่ะ แต่ทั้งนี้ทั้งนั้นทางเวบมาสเตอร์เพิ่นกะเฮ็ดดีเจออโต้ไว้สำรอง คงสิเพราะเห็นใจดีเจอาสาด้วยประการฉะนี้ละเนาะ จั่งได๋กะอย่าพากันหักโหมหลายเด้อล่ะ มันสิไปบ่ได่ดนฮั่นหน๋า ย่านพากันเมื่อยก่อน อยากให้ค่อยเป็นค่อยไปแต่กะอยู่นำกันไปดนๆเนาะจ้า เอาใจส่อยเชียร์อยู่ข้างหลังเด้อค่ะดีเจอาสาทุกท่าน สู้ๆจ้า ..

[siranee]

เอาใจซอยและเป็นกำลังใจให้ดีเจอาสาที่รักทุกๆคนค่ะ :l-:l-

[แมงงอดน้ำ]

การจัดรายการทางเว๊ปนิเป็นตะยากเน๊าะตรงที่เฮาต้องแนมข้อความว่าพิน้องสิขอเพลงหยัง
ลางเทื่อกะแนมบ่ทัน ไสสิพิมพ์คุยทักทาย ไสสิหาเพลง ดีเจที่บ่ค่อยคุยหน้าไมค์ กะยังโอเคยุ
บางคนมักคุยทักทายพิน้องต้องยอมรับว่า เก่งอิหลี ขอบคุณดีเจทุกๆคนที่มาให่ความม่วนซื่นจ้า:l-

[บ่าวข้าวจี่]

เบื้องหลังความม่วนซืน...บางเทือกะทุลักทุเลพอสมควร..ครับอ้าย...