ฝากคำถึงคนคอย

[ข้าวต้มมัด]

ต่อยแต่งแต้ม ติดตามตนแต่ง
สิแจงเรื่องซอสี อี่ ออ อ๋อ อ้อย
ตำนานต้าน หวานรักปักจิต
ความรักเหมือนยาพิษ หรือยากำลังแท้
สิแต่งแต้ม ตนนี้ให้ติดตาม
ตอนคนงามนี้ เป็นสาวรุ่น
ตอนอรุณ์นารถน้อง ได้อ้อย อี่ สีซอ
ได้มีหนุ่มรูปหล่อ ส่งตาตรงต้อง
จ้องตากัน ใจเต้นตูมตาม
สาวคนงาม ตริไตร่ตรองดู
บุญบ่อยู้ มีผุบ่าวใหม่ มาขอแต่ง
อ้ายคำแพง บ่ได้แต่งสาวหล่า
คอยเวลา รอท่าแต่นาง
จนลูกชาย ของน้อง เติบโตหมดแล้ว
ต๋อตอ่งต้อย สิตรมตรอม ใจตามพี่ คำเอ้ย
ฮักที่มีเป็นบ่ได้ สิถ่าต้อยเฮ็ดหยั่ง
เป็นห่วงหลายแต่เจ้า บัดเฒ่าไผ๋สิแต่ง
ติดตามต่าว ตักน้ำให้กิน
คำคิงไข้ บัดย่ามเจ้าได้ป่วย พี่คำเอ๋ย
ให้เจ้าอ่วย หาใหม่ซ้อน
อย่ามาถ่อน ถ่าอีนาง สั่นแล้วคุณพี่เอ้ย









----บ่ต้องท่าดอกอ้ายฟ่าวๆแต่งโล้ด ผู้หญิงเกิดมาปานดอกเห็ดตั๋ว อิอิ----

[จำปา]

ป้าด..เอื้อยข้าวต้มจนลูกใหญ่แล้ว เผิ่นยังถ่ายังคอยยุติค่ะ อิอิ แสดงว่าเผิ่นฮักเดียวใจเดียว แม่นถ่าจนแห้งเหี่ยว กะยังคอยเจ้าผุเดียว พะนะ อิอิอิ

[wundee2513]

ฟังผญาต่าน หวานหลายหล่า
หวานวาจา แท้แล้วหล่าเอ่ย
ย้านแท้หล่า ย้านอ้ายนี้เกิดเลย
ผู้สาวเพิ่นหัวเยาะเย้ยย้อนเกิดโดน...แท้น้อ...

(แต่งบ่เป็นเด้อ สาวหล่าข้าวต้มมัด แต่อยากแจมนะครับ...)

[prayoon]

ตนมาตรมใจแท้ นวลนางป่าจาก
ตรากตรำตอมตัวเจ้าตามตื้อต่อนโต
คำนางจาปากต้านตกแต่งตนซาย
ให้มุ่งหมายม่อมเมียแม่นมาอยู่ซ้อน
ย่านนอนเดียวดายเฒ่าตอนแก่เหมิดแฮง
ขนขวายหาของกินกันตายตกท้อง
ตายตามตายโตต้องตามต่อนตนมัก
บ่อาจหักหัวใจจากนางนวลน้อง
นางเอ้ย ฮักมาเถิ่งตอนนี้ ญิงใด๋สิเทียมทอ เจ้าแล้ว
หญิงในโลกากว้างแทนเจ้าบ่ห่อนมี หล่าเอย

[ข้าวต้มมัด]

ตกแต่งแต้ม สิโต้ตอบตนชาย
ผู้เคยหมายมามัก อยากเคียงคู่ซ้อน
ออนซอนหลาย คำชายเว้า
น้องเข้าใจ หมดทุกอย่าง
แต่หมดทางสิกู้ เลยบ่ฮู้เฮ็ดจั่งได๋
ใจน้องตรมตรอมตื้น ห่วงชายยุคือเก่า พี่เอ้ย
ย่านชายเฒ่าแก่ไป บ่มีไผ๋ไว้เบิ่งแงง
อ้ายคำแพงของน้อง แนวเฮาบ่อแมนคู่ ชายเอ้ย
บ่มีบุญผลายู้ ให้ได้ฮ่วมกัน
หากผันวันเก่าได้ สิเลือกชายนี้มาก่อน
แต่มันบ่อาจย้อน เฮ็ดให้น้องนี้ตรอมตรม สั่นแล้ว

[chudhancock]

บะ ๆ ๆ หลานข้าวต้มมัด กับหลานประยูร มาคือจ่ายผญา แก้กันได้ม่วนดีแท้หล่ะ หลาน มวนๆจ้า

คั้นแมนบุญคาดสิได้ แมนอยู่ไสก็มาฮ่วม คั้นแมนบุญคาดบอได้
ถึงอยู่ไกล้ก็บอสมซั้นแหล่ว เนาะหลาน อิอิอิอิ

[หญ้านาง]

คันแม่นคอนหาบตุ้ม
กรรมรุมกะหลุดบ่า
คันผลาส่งยู้ชูขึ้นกะบ่เสีย....................มาแจมนำเด้อจ้าเอื้อยข้าวต้มมัด

[ศรีสะท้าน]

โอ๊ะ...มืย..เกือบแม่นล้ม เข้ามากระทู้นี้ มีแต่ ตอ ต. หลายคักแท้ เกือบแม่นตำ ตอ เฮ่อ ๆ ๆ

[ข้าวต้มมัด]

อิอิ คุณป้าลำซิ่ง น้องหญ้านาง มีแต่คนแต่งม่วนๆ จ้า
มื่อนี้ อ.ศรีสะท้าน เพิ่นกะมานำ ยินดีต้อนรับการกลับมาของอาจารย์อีกครั้งหนึ่งค่ะ


อย่าเว้าหลายเดัอค่ะ พี่ชายเอ้ย
ตัวน้องน้อย ชื่อหลายแมนคือต่อ
แต่ว่าต่อหย่างบ่เบิ่ง สิตำตีนเจ็บเด้พี่ อิอิ ลงหม่องนี้หล่ะ