สู่...ดินแดนพุทธ-ธรรม

[ข้าวต้มมัด]

พุทโธ ธัมโม สังโฆ ประนมมือขึ้นเหนือเกล้า กล่าวว่า ..สาธุ
สิขอสาธยาย จ่ายผญ๋าว่าให้สิ้น ในสุบินที่นางผ่าน
คือได้เฝ้าพระเจ้า ไหว้ธาตุใหญ่พระเจดีย์
ผ่านประตูโขงก้วง มีพุทธสิมมา
ดินแดนทาสีทอง ส่องสว่างกระจ่างแจ้ง
มีคนหลายเหลือล้น เฒ่าแก่แม่ชรา
ต่างนุ่งขาวห่มขาว ปฏิบัติธรรมกันทั้งสิ้น


ก่อนสิก้าวไปข้างหน้า หลังจากผ่านด่านประตู
มีซุ่มครูพระฤาษี ประดิษฐ์มีคนไหว้พร้อม
มีประทีปของหอม ดอกไม้ถวายพระ
คนยกสากราบไหว้ นางได้ดอมใจนำ
อยู่ทางก่ำข้างหน้า ทีศาลาประธานใหญ่
พระประดิษฐ์ใสส่องนั้น สีทองส่องอัมพรรณ
ต่างพากันกราบไหว้ นางกะได้ไหว้นำหมู่
พร้อมในมือชูพานพุ้ม ปทุมนี้ขึ้นปูชา
แม่นางหล่านั่งข้างน้อง ถือประคองดอกผ้าไตร
เฮ็ดใจใสเพื่อบูชา ผ้านำพระสงฆ์พุ้น
มีซุ่มพวกพี่น้อง กราบไหว้กันยกใหญ่
อยู่ทางในหม่องนี้ คนนั้นแมนล้นหลาม


ตามสังเกตุการณ์เบิ่งแล้ว เป็นแนวแปลกเอานิ
พุทธสถานแห่งนี้ แต่ก่อนกี้เคยอยู่มา
เป็นที่หน้าแปลกตา แต่ก่อนหน่าเป็นป่าไม้
เป็นสถานที่เคยใช้ ในราชการ (ของจริง)
เหตุไฉนถิ่นสถาน เหตุการณ์เปลี่ยนปานนี้


นางนี้งงแสนสิตื้อ ตื่นขึ้นคือคนบ่อส่วง
ยังห่วงหวงอยากไปเฝ้า พระพุทธเจ้าอีกเทือสอง
แต่ว่ามองเวลาแล้ว ตีห้าเคิ่งแมนพอดี
นางนี้มีกิจสิทำ ประจำวันคือกันจ้า
จบสาธยายเพียงท่อนี้ ฝันหวานที่นางผ่าน
ดั่งตำนานแต่เค้า ได้เข้าพุทธรรม นี้แล้วพี่น้อง






แก้ความฝันให้พี่น้องฟังฝันเมื่อคืนนี้ค่ะ ขออนุญาติใช้ศัพย์สูงเพื่อความคลองจองและไพเราะ ค่ะ (สุบินแปลว่าฝัน)

[จำปา]

ธุจ้าเอื้อยคือแต่งได้หลายแถะค่ะ ข่อยแต่งบ่เกินห้าบรรทัด เก่งๆค่ะนับถือ

[ข้าวต้มมัด]

ขอบใจน้องจำปาที่ชม กลอนผญ๋าบทนี้บ่ได้แต่งแค่จินตนาการเหมือนบางบทกลอนที่เอื้อยแต่ง แต่มันคือเหตุการณ์ที่เอื้อยฝันเห็นตอนข้อนสิแจ้งจริงๆเมื่อวานนี้ค่ะ
ดีใจหลายเลยแต่งมาให้พี่ๆน้องๆ ได้ทัศนานำ

[chudhancock]

หลานข้าวต้มมัดเอ๋ย ฝันอันนี่ เป็นฝันดี สิมีโชค ตั๋วหล่า
ฝันเห็นองค์ พระพุธทา ได้บูชา แมนดีล้ำ เป็นคุณงาม ตามฝันเจ้า
นิมิตเฮา ได้เห็นฮุ่ง ภาระกิจ เจริญรุ่ง สิ ลือเลื่อง ดอก เรื่องการ
เป็นความฝัน ผ่านก้าว เข้าไปสู่ สรวงสวรรณ์ เป็นความฝัน ของคนบุญ
บูชาคุณ พระองค์จ้าว เป็นเรื่องราว อันดีแท้ หลานฝันแต่ สิ่งดีดี
ขอให้มีความสุข ทุกอย่ามีมาไกล้ หย่างไปไส อย่าได้พ้อ มวนมารอย่ามาผ่าน
สุขสำราญ ราบรื่นบุญล้น ให่อยูดี เด้อ สาธุ

[ข้าวต้มมัด]

ฟังแม่ป้าว่าจาต้าน ใจสำราญด้านเนื้ออุ่น
ขอกุศลผลบุญ ห่อหุ่มป้าแมนคือก้น
นางได้ฝันไปแล้ว ใจผ่องแผ้วเกิดประกายใสส่อง
ใจผุดผ่องสะอาดล้ำ ความฮ้ายแมนบ่มี
จึงเฉลยเอ่ยพี่น้อง พอให้รู้เรื่องราว
นางได้ไหว้พระเจ้า ก่อนเข้านอนของทุกมื่อ
และได้ถือศิลห้า ภวานาเป็นประจำ
นางได้ทำทุกวันพุทธ ไหว้บูชาขันดอกไม้
บางมื่อนางกะได้ เฮ็ดมาลัย ไหว้หล่วงปู่
เพิ่นนั่งอยู่เพิ่งหิ่ง แน่นิ่งจ้องเบิ่งนาง
ตาบ่ว่างปากกะท่อง เว้านะโมจบสามเทื่อ
บอกไปเหนือหรือใต้ ให้เพิ่นได้คุ้มครอง สาธุ



พุทธัง อนันตัง ธัมมัง จักกะวาลัง
สังฆัง นิพพานัง ปัจจะโย โหตุ

[ข้าวต้มมัด]

นางได้ฝันผ่านพ้น ถึงสถานที่อัน ศักดิ์สิทธิ์
มีศาลาพระฤาษี มีฤทธิ์ธรีประดิษฐ์ด้อย
มีพระพุทธรูปใหญ่น้อย ล้อมสถูปเจดีย์ใหญ่
มีศาลาอยู่ไกล ประดิษฐ์ไว้พระประธาน
คนกราบกรานนบไหว้ นางกะได้กราบนำหมู่
ความอยากฮู้จึงได้ แก้ฝันนี้ให้ปราชญ์ฟัง
ป้าคนดังชื่อลำซิ่ง เป็นหญิงเก่งคนหนึ่ง
เพิ่นจึงได้เจรจา ว่าให้น้องนี้เข้าใจ
ดีใจหลายเหลือล้น บ่คือผุลางคนนิ
ตีเป็นเลขพุ้นตี้ ตีให้ว่าเก้าห้า เก้าเก้า
ให้ชื้อเอาน้องหล่า เพิ่นว่าอย่ากลับเด้อ
ฟังแล้วน้องแมนเก้อ อะเหอๆๆ แมนอยากหัว (อิอิ หยอกเป็นคักอาจารย์ใบ้หวย)