สิบ่ลาจากอ้าย

[พลายแก้ว]

อ้ายทิดจ่อยเอ้ยยยย...

ลุ้นมาดนนานมื้อ เป็นตาคือแน่บ่พี่
น้องทางนี้ฝนมีดถ่า ว่าสิได้ล้มงัว
ผักหอมบั่วหมากพริกน้อย ทยอยต้อมเตรียมการ
งานวิวาห์กินดอง สิจองหม่องคองตะลู๊ด
ใบมะกรูดกะมีแล้ว เทิ่งส้มแสวแนวพานัว
เทิ่งข้าวคั่วหัวขิงไค จั่งแม่นหลายเหลือล้น
เตินหมู่คนเทิ่งสองก้ำ ที่พร้อมพร่ำนำเชียร์
เหล้าและเบียร์เซ็นมา กินจนว่าสิเหมิดแล้ว
เทิ่งฝนแข่วถ่ากินก้อย ซ่างให้คอยลอยละล่อง
รอแต่ทองเทิ่งสองก้ำ คำสิแหน่นเป็นแผ่นเดียว
อย่าให้เหี่ยวก่อนเด้อหน้า แขนขาสิล้าหล่อย
สิบ่มีแฮงเฮ็ดก้อย คอยเก้อแก่ชรา...ก่อนเด่ะ อิอิ

จั่งได๋กะสิเชียร์คือเก่าเด้ออ้าย 55555

[หญ้านาง]

อ้ายทิดเอ๊ย....
คันแม่นคาดสิได้
หาไสกะมีใส่
คันแม่นคาดบ่ได้
ขุดไง้กะบ่เห็น
บุญบ่เข็ญได้พ้ออ้าย
บุญนางหลายได้พ้อพี่
กรรมบ่มีไล่ต้อน
คำก้อนได้กล่าวจา
อุปมา.....อ้ายเกิดเป็นนาเฮื้อ
นวลนางสิถางถาก
อุปมา.....อ้ายเป็นภังคีฮาก
สิถากค้นก่นใส่ยา.......ดอกจ้า

ย้านเด้..
ย้านแต่วาจาต้าน
อ้อยหวานปนเกลือหว่าน
ย้านแต่หวานทางกก
ย้านมาฮกใบ
ย้านมาคายกากถิ่ม
ชิมแล้วกะเหล่าหนี

[ทิดจ่อย]

บ่าวก๋าคามเอ้ย อะฟ้าวกินเถาะลาบก้อยนั้น ...ข่อยสิถืกเขาก้อยอยู่นิ
แต่งไวมันกะจบเรื่องถ่อนั้นล่ะเนาะ แต่งแล้วมะสิได้เว้ากันติ้ เหอ เหอ เหอ

อ้างถึง
อุปมา.....อ้ายเกิดเป็นนาเฮื้อ
นวลนางสิถางถาก
อุปมา.....อ้ายเป็นภังคีฮาก
สิถากค้นก่นใส่ยา.......ดอกจ้า

มาสิให้อ้ายเกิดคือแท้หล่า เกิดเป็นนาเฮื้อว่านิแม๋
โอ้ยนาเฮื้อคือนามีแต่หญ้า งัวควายเขาสิล่ามแหล๋ว
แนวงานนาบ่อมีข้าว คันแทม้างมุ่นเพ
คือบ่ออุปมาให้เท่ๆ เกิดเป็นเทวดาอยู่ชั้นฟ้าหย่อนๆ
คันบ่อซั่นกะเกิดเป็นคู่ซ้อน คีงบางน้องหม่อมพะนาง (แค่สมมุติสื่อกะได้ อิ อิ อิ)


อ้างถึง
ย้านเด้..
ย้านแต่วาจาต้าน
อ้อยหวานปนเกลือหว่าน
ย้านแต่หวานทางกก
ย้านมาฮกใบ
ย้านมาคายกากถิ่ม
ชิมแล้วกะเหล่าหนี


โอ้ย ...อ้ายนี้เปรียบพะนางน้องคือยาขนานเอก
บ่อแม่นเฉกเช่นอ้อย ชิมหวานแล้วสิเหล่าคาย
นางนี้มีความหมายลื่นล้น เปรียบคือใจ-กาย อ้ายพุ้นตั่ว
บ่อแม่นมัวเว้าเล่น เห็นเป็นเรื่องม่วนยิน
คันแม่นซินซาตาคาดสิได้ ให้น้องเตรียมห่อผ้าหนีไปนำอ้ายได้บ่อ
เงินบ่อพอสิแต่งน้องค่าดองอ้าย หั่งบ่อมี .....สีนานวลซ้วนอ้ายไว้แหน่...หญ้านางเอ้ยยยยยย

[พลายแก้ว]

ฮ่าๆๆๆๆๆๆๆๆๆๆๆๆๆๆ หัวสาเถาะ...


มาส่างว่าแทะอ้ายข่อย อ้ายทิดจ่อยอ่อยสาวหนี
มันบ่ดีดอกพี่ชาย คนทั้งหลายสิกล่าวพื้น
แนะ..อย่ามัวยืนยิ้มแต้ ไปถะแม้สาวถ่าอยู่
แล้วสิไปนำรถตู้ หรือสิขึ้นขี่รถทัวร์...น้อ..

น้องสิเบิ่งต้นทางให้เด้อครับ..

[หญ้านาง]

55555 โอ๊ยเนาะอ้ายทิด อ้ายบ่าวก๋าคามกะดาย จั่งแม่นยู้ใส่ปานไก่ตีดอก


อ้ายทิดเอ๊ย...
นางนี้เผียบอวนอ้าย
เป็นไม้ก่ายกับขัว
เผียบเป็นงัวเทียมเกวียน
เอี่ยนกับตมฝนกับฟ้า
เผียบดาราเป็นอ้ายไว้
หัวใจนางเป็นแสงอ่อน
คันอ้ายกระพริบ
นางสิติดอ้อนต้อน
ไว้เฮียงซ้อนอยู่บ่เซา
อ้ายเป็นเสานางสิเป็นขื่อดั้ง
อ้ายเป็นหลังนางสิขอเป็นบ่าไหล่
อ้ายเป็นไหนางสิเป็นปลาแดกบั้ง
ขังไว้บ่ให้ลา

อ้ายทิดเอ๊ย....

ย้านแต่วาจาล่อ
ตั๋วลาพรากหน้าพ่อ
ย้านอ้ายมาหลอกล่อ
พอให้เล่นเป็นหมู่ลา....แท้น้อจ้า

[ทิดจ่อย]

โอ้ยๆๆๆๆ ปลื้มมมมม แฮงงงงงง ตะเกิดมาบ่อเคยมีสาวใด๋เว้านำม่วนปานนี้จักเถื่อ
แบบนี้ต้อง หลองแล้วบ่าวก๋าคาม พี่น้องบ้านมหาสู่คู่สู่คน :b-b:b-b:b-b

พอได้ยินคำต้าน คำหวานๆ ผู้สาวเอามาล่ออ่อย
ประดุจน้ำอ้อยกะบ่อปาน ประดุจน้ำตาลกะบ่อท่อ
แน่นจ่อหล่อความปลาบปลื้ม ใจห่าวซื่นบาน
บ่อแม่นเคาะจานกระเบื้อง ให้หมาน้อนแกว่งหางบ้อน้อคำแพง

ให้มันสมใจอ้าย ความจริงใจที่ตั้งต่อ
เกิดเป็นหยังขอให้น้องและอ้าย หมายมั่นเป็นคู่กัน
คันน้องเกิดเป็นมันแซง-ฮืบ อ้ายสิเกิดเป็นเสียมคอยขุดก่น
น้องเกิดเป็นฝน อ้ายสิเกิดเป็นเมฆตั้งเค้าโฮมเข้าเป็นห่าฝน
คันน้องเกิดเป็นโพน อ้ายสิเป็นบักจ๊กทื้นขุดค้นปลูกแตงถั่ว
น้องเป็นขัว อ้ายสิเป็นฝั่งน้ำ ขัวข่วมได้ฮักแพง
น้องเป็นแกง อ้ายขอเป็นถ้วย น้องเป็นกะบวย อ้ายสิเป็นหม้อแอ่ง
เซ้าฮอดแลง แลงฮอดเซ้า บ่อมีมื้อสิห่างกัน
น้องเป็นขัน อ้ายสิขอเป็นน้ำ น้องเป็นชามอ้ายสิขอเป็นบ่วง
น้องเป็นพวงดอกได้ อ้ายสิเป็นเผิ่งภู่ภมร
คือจั่งมอนกับม้อน คือจั่งหนอนกับปลาแดก
คือจั่งแอกกับข่าวคล้อง คือขี้กะบองกับไฟป๊ก(กับไฟผู้เฒ่าสมัยเก่า)
คือจั่งครกสากก้อมบ่อมีมื้อสิจากกัน

[หญ้านาง]

อ้ายทิดเอ๊ย...
ฟังเสียงอ้ายจาต้าน
หวานกะเบาเข้ามาใส่
อยากมาหยับสวนมอน
อยากมาซอนสวนมี้
อยากมาลี้ฮ่วมพะนาง

อ้ายเอ๊ย...
ขั้นอ้ายฮักน้องแท้
แพรไหมให้มาห่ม
นางสิข่มไม้หนาม
นางสิฮานไม้เป้า
ถ่าเจ้าบ่าวพี่ชาย
คันเป็นคือจั่งคำอ้าย
สิบ่หมายซ้นผุใหม่
สิขอไหมต่างบ้าน
สิขอว่านต่างต้น
มานอนซ้นใส่เฮือน...สาเปี๋ยงอ้ายทิด อิอิ

[ทิดจ่อย]

หล่าน้างเอ้ย...อ้ายนี้ใจประสงค์ซ้อน อยากนอนเฮือนซ่นห่มนำแล๋ว
ใจประสงค์นาถน้องทางอ้ายสิแล่นหา
แพรผืนผ้า สิ่นไหมแพรวา เฒ่าแม่อ้ายทอไว้อยู่
พออยากไปสู่ขอนาถน้องมื้อแลงนี้ให้ส่วงใจ
ติดแต่ทางโตอ้ายยังคลางแคลงหลายอย่าง
ย้านแต่ทางน้องล่อใ้ห้เตะไม้คุบตอ
คึดต่อไห่ย้านแต่ได้หญ้าคา
คึดต่อนาย้านแต่ได้หญ้าแฝก
ย้านแต่แฮกถืกไม้ไถสิม่างมุ่นเพ
ย้านแต่โซเซล้มหลงคารมเว้าอ่อย
ไปฮอดเฮือนผัดสิเห็นแต่พ่อบักน้อย
ขันหมากอ้ายสิเอาห่อยไว้บ่อนใด๋

[หญ้านาง]

อ้ายทิดเอ๊ย...

นางนี้แนวนามเนื้อ
เกลือเอือบใส่ทอห่าง
กุลาหาบต่างบ้าน
บ่หาญพ้อผุสิเอา.....ดอกจ้า

ย้านแต่ทางโตเจ้า
ตั๋วเอาเลาเป็นตอกอ่อน
ตั๋วนางติดอ้อนต้อน
บ่สนซ้อนอ่อนนาง
ย้านแต่ทางโตอ้าย
ต่ำไหมผัดมาเป็นฝ้ายอ่อน
ผ้าบ่ลายไหมผัดมีหมี่ซ้อน
สวยบ่ส่อนใส่ฟืม...........นั้นแหล้ว

[ทิดจ่อย]

หล่านางเอ้ย
อ้ายนี้แนวนามแบ้หากินใบไม้อ่อน
ได้มาพ้อต่อนซี้นสาแล้วบ่ออยากไป
เห็นไทกุลาหาบต่าเนื้อสิเอือบเกลือหรือว่าบ่อ
ขอซื้อแล้วบ่อขาย ขอกินแล้วบ่อให้
สิเอาไม้ลัดตีเอาแหล่ว

อ้ายเปรียบดั่งฟืมซาวห้า หนาบ่อหนาต่ำได้ฮอดผ้าห่ม
ฮอดไหมพรม เทิงใยสังเคราะห์พร้อม ทางอ้ายหากบ่อสน
ตกกะเทินว่าได้ต่ำหูกแล้วขอเป็นไหม บ่ออยากได้ผ้าอื่น
ตกกะเทินว่าสิมีคู่ซ้อน ขอเป็นน้องแต่ผู้เดียว...คำแพงเอ้ย