..ซุปผักติ้ว จาก ครัวภูธร..

[เขมราฐ]

มาตามคำเรียกร้องค่ะ สืบเนื่องจากกระทู้ต้มกบ มีถ้วยซุปผักติ้วที่น้องหลินซื้อมาแต่ตลาดนำ แล้วมีเอื้อย อ้าย
ใทบ้านมหาหลายท่านเพิ่นบ่ฮู้จัก “ซุปผักติ้ว” น้องหลินเลยเอาสูตรมาให้เบิ่งค่ะ เทื่อมีผู้อยากลองเฮ็ดเบิ่ง
มีอ้ายบางคนถามว่าเป็นแนวกินประยุกต์แม่นบ่ น้องหลินกะบ่ฮู้คือกันค่ะ
แต่ว่าเกิดมาตั้งแต่จ้ำป่นเป็น เมนูนี่กะเป็นเมนูโปรดน้องหลินเป็นต้นมา
เฒ่าแม่เฮ็ดให้กินประจำ จนฮอดใหญ่ปานนี้ตอนนี้เฮ็ดให้เฒ่าแม่กินแทนแล้วค่ะ
จะว่าง่ายกะง่ายจะว่ายากกะยากน้อค่ะ.....
มาเตรียมส่วนประกอบก่อนเลยค่ะ



พระเอกคือ “ผักติ้ว” เลือกที่บ่อ่อนบ่แก่จนเกินไปค่ะ ถ้าอ่อนคัก รสฝาดจะแฮงกว่ารสส้ม
บ่แซ่บ แต่ถ้าแก่จนเกินไปกะหย่ำบ่ได้ค่ะ
(หมายถึงเฒ่าพ่อกับเฒ่าแม่เด้อค่ะ เพิ่นแข่วบ่ดี.. )



พระรองคือ “ป่นปลา” (ข้ามขั้นตอนต้มปลาป่นโลดเน๊าะค่ะ คึดว่าทุกคนคงจะเฮ็ดเป็น)
ปลาหยังกะได้ค่ะบ่ติยกเว้นปลาหมึก เพราะว่าอาจสิต้องตำจนแขนหล่อย...
เคล็ดลับน้ำปลาแดกนัว ๆ จักหน่อยค่ะ แล้วกะตำใส่หมากพริกแห้งคั่วหอม ๆ ใส่ถ้วยไว้



นางเอกคือ “วุ้นเส้น” ค่ะ แนะนำตราหงส์เด้อค่ะ บ่ได้โฆษณาแต่ว่ายี่ห้อนี่เส้นเหนียวนุ่มบ่เละ
แช่น้ำ ลวก ตัด ให้สั้นพอดี แล้วกะหั่นผักติ้วให้เพิ่นคู่กันไว้พระเอกกับน้องเอก



ตัวประกอบช่วยเพิ่มรสชาติ “ถั่วดินป่น” บางคนที่บ่มักถั่วอาจเป็นงาคั่ว โขลกหยาบ ๆ แทนกะได้ค่ะ
พอดีงาในตู้กับข้าวหมด เห็นแต่ถั่วน้องหลินเลยใช้ถั่วแทน มันส์ ได้คือกัน



ยังบ่หมดค่ะ “ต้นหอม ผักชี” ล้าง หั่นเตรียมไว้

ส่วนประกอบครบแล้วลงมือค่ะ



เอาพระเอก (ผักติ้ว) นางเอก (วุ้นเส้น) พระรอง (ป่นปลา) แล้วมีหมูสับนำค่ะ
บางเทื่อไปตลาดพ้อเอ็นต้มเปื่อยน้องหลินกะใส่เอ็นต้มเปื่อย ถ้าบ่มีใส่หมูสับแทน
ที่แม่ค้าเฮ็ดขายส่วนมากจะใส่เอ็นต้มเปื่อยค่ะเพราะว่าถูกกว่าเนื้อหมู



แล้วกะคลุกเคล้าคนให้เข้ากัน ชิมเบิ่ง ถ้าบ่นัวใส่น้ำปลา ผงชูรส
พริกป่น เพิ่มได้จนกว่าจะพอใจ หรือจนกว่าถูกปากเจ้าของแล้ว
กะใส่ถั่วโรยต้นหอมผักชี




เรียบร้อยค่ะ “ซุปผักติ้ว” ฝีมือแม่ครัวจำเป็น ข้าวเหนียวฮ้อน ๆ คุ้ยเลยค่ะ

อั่น... มีการผิดพลาดทางเทคนิคหน่อยหนึ่งค่ะ น้องหลินลวกเส้นใส่น้ำหม้อนึ่ง
ที่นึ้งข้าวแล้วใหม่ ๆ แล้วลืมเอาออกคาแต่ไปสับหมู เส้นเลยใหญ่กว่าปกติ
เล็กน้อย แต่กะแซ่บคือเก่าค่ะ :l-

[ต้องแล่ง]

อ๋อเฮ้ดจั่งสี้ติแต่แท้แล้ว

ขั้นตอนกะหลายเติบเด้เนาะ

สิลองไปเฮ็ดกินเบิ่งอยู่ดอก

ขอบคุณหลายๆ ที่มาบอกแนวแซบๆให้

[ข้าวปาด]

โอ...เป็นเมนูที่แปลกสำหรับเอื้อยเลยน้องเขม เห้นตะแม่ใหญ่เอื้อยนั่นแล่ว เลามักซุปผักติ้ว แต่คนละสูตร สุตรแมใหญ่ใส่ตะผักติ้วกับงาคั่ว แล้วกะน้ำปลาแดกต้ม ผงชูรส น้ำปลาแค่นั่น กะแซ่บไปอีกแบบเนาะ ถึงบ่ได้ซีมนำกะรุ้ว่าแซ่บอยุ่ดอกน้องเขม แนวกินคั่นใส่ผงชูรสเอื้อยแซ่บเมิด อิอิ

[ชิงช้าชาลี]

ป๊าด น้องหลิน ซุปผักติ้วไทอุบลคือเก๋แท้ ใส่วุ้นเส้นพร้อม ทางยโสธร บ่มีนางเอกแหม มีแต่พระเอกกับพระรอง ก็หรูแล้ว โอยอยากกิน

[หนุ่มน้อย]

เป็นอาหารโปรดของหนุ่มน้อยละครับ บ่อว่าจะเป็นซุปผักติ้ว ซุปผักเม็ก ซุปใบม่วงอ่อน ซุปหน่อไม้
ทั้งหลายทั้งปวงกะมีป่นปลาเป็นส่วนประกอบที่สำคัญ ประเภทป่น กะมีป่นปลา ป่นกบ ป่นกุ้ง บางครั้งกะป่นไข่ น้องหลินจ่งซุปผักติ้วไว้ให้แหน่เด้อ คึดอยากซั่นวา

[ลุงเดฟ]

ตะแซ่บเนาะชุปผักติ้ว เตยกินตะชุปใส่ข้อ(กระดูก หรือเอ็นเนื้อต้มเปื่อย)แซ่บคือกันครับ

[กำพร้าผีน้อย]

ลงมา กทม. มาเฮ็ดให้กินแนเด้อหล่า เป็นตะแซบยุ คล้ายๆยำเนาะ

[บ่าวต้นฅนมุกดาหาร]

บ่เคยกินจักเทื่อ ซิลองเฮ็ดกินเบิ่งอยู่ครับเบิ่งแล้วเป็นตาแซบอยู่

[Boom69]

ป๊าดดดดดดดดดดดด
ออนซอน ผ้าติ้วงามเนอะเอื้อยหลิน
ซุปผ้าติ้วกะเป็นตาแซ่บเนอะจ้า

[เซียงเหมี่ยงเมืองสุรินทร์]

น่ากินมากครับน้อง เขมฯ เคยกินแต่ที่เผิ่นเอาดอกมาซุปครับ แต่ว่าแบบที่นำเสนอมา กะเป็นตาแซบครับ ขอบคุณที่เรียกน้ำลายแต่เซ่าครับ ฮ่า ๆ ...