..เขมราฐ พาไปเฮ็ดบุญสังฆทาน งานกะทิมัน บ้านหนองไหล..

[เขมราฐ]

วันอาทิตย์ที่ 11 ต.ค. ที่ผ่านมา น้องหลินไปเอาบุญสังฆทาน งานกะทิมัน อยู่บ้านเก่าพ่อใหญ่
บ้านเกิดเพิ่น อยู่บ้านหนองไหล ต.หนองขอน อ.เมือง จ.อุบลราชธานี แล้วเพิ่นย้ายหนี สภาพน้ำท่วม
มาอยู่บ้านใหม่ คือ บ้านหนองผือ เอื้อย น้อง เพิ่นกะยังอยู่บ้านเก่า ครอบครัวน้องหลินเลยถือโอกาส
ไปเยี่ยม พ่อใหญ่ แม่ใหญ่ นำค่ะ ปีล่ะเทื่อยามไปเอาบุญกะทิมันนี่ล่ะค่ะ



ไปฮอดแต่ 9 โมง ภายในศาลาหัวแจง วัดป่า สิริจันโท บ้านหนองไหล


ฝ่ายแต่งพาข้าวถวายเพล ทุกคนที่ไปเพิ่นกะแต่งเครื่องเพลไปพร้อมค่ะ



ฝ่ายของหวาน ผัก ผลไม้


พระเอกของงาน “กะทิมันนก” สองถังนี่เพียงส่วนน้อยเอามาเลี้ยงแขกในศาลาหัวแจก



ทำบุญ พร้อมได้ของแถม บัตร 20 ได้รางวัลทุกใบค่ะ รายได้เข้าวัดทั้งหมด
หลานชายน้องหลินจับได้ ไม้กวาด หมวก แล้วกะสาด ไปนอนเว็น



หลวงปู่เจ้าอาวาส วัดป่า สิริจันโท เพิ่นเป็นครูบาอาจารย์ พ่อใหญ่น้องหลิน
ปีนี้ 93 แล้วค่ะ ลูกศิษย์กลับบ้านไปหลายคนแล้วค่ะ



หลังจากถวายเพล กินข้าวกินน้ำ แล้วกะเข้าไปในบ้านเยี่ยมยาม น้องสาวหล่า
พ่อใหญ่น้องหลิน ปีนี้ 80 ปีแล้วค่ะ แต่ว่า ยังเป็น นางสาวจันทร์ พูลเพิ่ม อยู่ค่ะ



หลังจากเยี่ยมยาม ถามข่าวพี่ข่าวน้องแล้ว กะได้เวลาโงเมือบ้านแล้วค่ะ
ได้ของฝากของต้อน เต็มคันรถ เครือเอ็นอ่อน ผักเม็ก ผักขนองม้า (เขียนถูกบ่บุนี่)
มันนก หมากส้มโอ หมากส้มเกลี้ยง ถั่วดิน หมากพริก ฯลฯ

แต่สิ่งที่ได้แล้วสุขใจที่สุด คือความฮักแพงของพี่น้อง ถึงแม้ว่าพ่อใหญ่บ่อยู่แล้ว
แต่ลูกหลานกะยังบ่ห่างเหินกัน ไปมาหาสู่กันอยู่เสมอ ไปพุ่นกินปลา มาพี้กินข้าว