เฒ่าพ่อจ่มอยากกินหมาน้อย แม่ใหญ่นวล นาข้าง ๆ เพิ่นเลยเก็บมาให้ถุงบักใหญ่ค่ะ
เลยมีเมนู ลาบหมาน้อย สมานฉันท์ (ภายในครอบครัว) ขึ้นค่ะ
เตรียมเครื่องปรุง
1. ใบหมาน้อย (บ่มีรูปค่ะ สามารถหาเบิ่งได้ในกระทู้อื่น ๆ ของบ้านมหา)
2. ป่นกบ ป่นเห็ด ป่นปลา อย่างใดอย่างหนึ่งค่ะ
3. ถั่วฝักยาว หอมแดง หอมเป (ผักชีฝรั่ง) หมากเขือขื่น ตะใคร้ เลือกอ่อน ๆ ค่ะ หลายท่อได๋แฮ่งดี
4. ข้าวคั่ว พริกป่น ผงชูรส น้ำปลา
ปรุงได้ค่ะ
ลุงสมร เอาเห็ดมาฝาก เฒ่าแม่เลือกเห็ดไค ล้าง ปิ้งให้สุกแล้วกะตำป่นค่ะ
(ขออภัยในบางลีลา แค่อยากให้เห็นว่า 50 ยังเฟิร์ม )
เครือหมาน้อยเลือกเอาแต่ใบอ่อนล้างให้สะอาด หย่องกับน้ำฝนสะอาด
ปล. นายแบบอาบน้ำหากะแล้วค่ะ ล้างมือสะอาดดีค่ะ :l-
หย่องแล้วจะได้หมาน้อยหน้าตาแบบนี้ค่ะ ยังบ่แล้วเด้อค่ะ ยังบ่ได้ปรุง
เครื่องเคียงทุกอย่างหั่นให้เรียบร้อย เฒ่าแม่เลาหั่นโฮมกันไว้ถ้วยเดียวเบิดเด้อค่ะ
เหตุผลง่าย ๆ จั่งได๋กะใส่โฮมกันอยู่แล้ว แยกหยังให้มันยาก พ่ะน่ะ
เอาส่วนผสม หมาน้อยที่หย่องไว้ ป่น เครื่องเคียงผสมกัน ปรุงรส น้ำปลา ผงชูรส
พริกป่น ชิมเบิ่งแซ่บกะใช้ได้ค่ะ
ยืนยันว่าแซ่บซ่ำได๋ค่ะ
เฒ่าพ่อบอกว่า หมาน้อย มีสรรพคุณ เป็นยาเย็น กินแล้วสบายท้อง รวมทั้งเครื่องเคียง
ต่าง ๆ กะเป็นสมุนไพรนำค่ะ บ่มีสารพิษเจือปน นอกจากในถั่วฝักยาวที่ซื้อจากตลาด
เด้อค่ะ
Bookmarks