ทำงานจักหน่อยก่อน อิอิ...ไปร้านอาหารเอเชียมาจ้า เลยได้ปลาตะเพียน(หรือเปล่า)มาถุงหนึ่ง
หมักเกลือนึ่งใส่ผักไปแล้วโตหนึ่ง แต่กินยากๆ ก้างหลายพาโล...เป็นปลามาจากเวียดนามจ้า
กะเลยเอามาเฮ็ดปลาส้มซะ ล้างปลาให้สะอาดอีกครั้งจ้า แล้วกะใช้มีดคมๆบั้งถี่ๆเลยจ้า
แล้วกะเอาปลาไปแช่ไว้ในน้ำซาวข้าว เนื้อปลาสิได้แน่นๆขาวๆ เป็นเคล็ดลับ อิแม่พาเฮ็ด พะนะ
หลังจากนั้นกะเอาปลามาบีบๆน้ำถิ่มไปแหน่ ใส่ชาม ติ๋มสิบ่ตัดหางปลาถิ่มเด้อจ้า ย่างหรือทอดแล้ว เพื่อความสวยงาม อิอิ
จากนั้นกะใส่ข้าวเหนียวนึ่งจักปั้น เอาทอกำปั้นหนี่หละ กะๆเอา
กระเทียมโทนโขลกๆจัก5หัว ใส่หลายแหน่จักหน่อย ดับคาวปลา
เกลือ ปลา5โตนี่ ติ๋มใส่ประมาณ2ช้อนชาหนี่หละ
แล้วกะจัดการนวดๆ จนทุกอย่างเข้ากันดี โดนๆแหน่จักหน่อย
จากนั่นกะเก็บข้าว+กระเทียมยัดเข้าไปไว้ในท้องปลาส่วนหนึ่ง บ่ต้องถิ่ม เสียดาย บุ๋ยยยย...ออกแนวประหยัด
แล้วกะห่อ ไล่ลมออกจากถุงให้เบิด ปิดปากถุงแน่นๆ...ถิ่มไว้จัก3-4มื้อ แล้วกะนำไปทอด ปิ้ง ย่าง แล้วแต่มักได้เลยจ้า
เดี๋ยวมื้อใด๋ทอดแล้วสิเอามาลงให้เบิ่งอีกครั้ง...ว่าสิกินได้บ่ หรือเน่าหว่า 5555++
และแล้วกะได้เวลาเอามาทอด...ทอดใสกระทะย่างสะเต็กเลยหละ บ่อยากใช้น้ำมันหลาย อีกอย่างบ่ติดกระทะนำเนาะ
ออกมาใช้ได้จ้า บ่เน่า รสชาติกำลังดี เปรี้ยวดีอยู่จ้า...รับรอง แซบคักอิหลี
จัดใส่จานเสริ์ฟแล้วจ้า...เบิ่งหน้าตาแล้ว ถ้ากินกับข้าวเป็นตาตายเบื่อแท้ กินกับแนวอื่นซะเป็นหยัง...555++
หาเรื่องมาวววว...วันหยุดแหม๋ พะนะ....
แล้วกะมาถึงส้มหมู อันนี่เฮ็ดฝากหมู่คนไทย ตอนบ่สบายเขาเทียวมาส่องเบิ่ง ส่งข้าวส่งน้ำ น้ำใจให้กันเนาะจ้า
สูตรเดียวกัน
หมูเนื้อแดงซื้อมาบดเองเลยจ้า600กรัม
หนังหมูต้มสุกหั่นเส้นหลายเติบ หมู่บอกขอเป็นพิเศษ
เกลือกะๆเอา ใช้วิธีทอดก้อนน้อยๆชิมไปนำ เติมไปนำ นวดแล้วกะอิ่มพอดี อิอิ
กระเทียมโทนโขลก หัวเดียวพอ
ข้าวเหนียวนึ่งสุกปั้นน้อยๆเด้อจ้ากะเอา
นวดทุกอย่างจนเข้ากันดี จังใส่พริกขี้หนูสวนลงไป
จัดการห่อเลยจ้า อยู่เมืองไทยห่อใบตอง อยู่เมืองนอกใส่ถุง ไล่ลมออกปิดปากแน่นๆ
3-4มื้อกะส้มแล้วจ้า...ใช้เวลาหลายมื้อแหน่ เพราะบ่ได้ใส่ผงทำแหนม หมู่บ่มัก เขามักแบบลูกทุ่ง เมืองอุดรฯ
ได้ส้ม14ห่อ ติ๋มเอาไว้กินเองแค่2 นอกนั่น เพื่อนรักเอาไปเบิดสา กินเผื่อฉันด้วยกะแล้วกัน...
Bookmarks