ขอบคุณสำหรับมิตรภาพกับการเดินทางที่คุ้มค่าที่สุด

**เเมงสะดิ้ง** · 30-10-2010, 21:22

โอ...หนอพี่น้องเอ๊ย....
จั่งแม่นบุญหลายสายยาว พอลงจากเรือบินกะโต่นใส่พาข้าวโลด
ขอบคุณอ้ายพล กับแมเสี่ยวที่รัก สำหรับที่พักพิงอิงแอบ
พ้อมกับของฝากกางเกงลายดอกสีสะท้านจิต ถืกใจแฮง

พอเสร็จธุระยุเมียงกุง แล่วกะฟ่าวเจิ่ดไปลงหม่องนิ่ล่ะ ด้วยควมคึดฮอด
ไผผ่านไปผ่านมา อยากแวะเยี่ยมยามถามข่าวแมงดิ้งกะหม่องนิ่ล่ะเด้อพี่น้อง

โอ๊ยใจสิหลาดสิขูด....หย่อนคึดนำหลานน้อยกะจั่งหว่ะ
ฟ่าวอย่างแฮงหย่อนอยากมาตุ้มมาอบอุ่นเอาลูกหลานเล่นน้ำขี้สีก

คั่กนั่นแล่วเพิ่น ได้มาหย่างแหยงคีงเบิ่งข้าวเขียว
เด็ดดอกไม้งามตามทางเหน็บหู จินตนาการบรรเจิด
เพิ่นกะสิคึดวาเพิ่นเป็นนางเอกสั่นตั๊ว จั่งค่อยยิ้มหวานปานนี่

สุขใดไหนจะเท่าได้เห็นพ่อกับแม่สุขภาพดีมีควมสุขตามสังขารและกาลเวลา ให่ลูกเต้าใช้งานไปดนๆ
โอ๊ะ....ให้สุขภาพดีมีแฮง อยู่เป็นฮ่มทองโพธิ์ไทรให้ลูกหลานไปดนๆ สั่นดอกเนาะ :l-

อากาศดี ลมดีเย็นส่วยๆ อารมณ์คนได้นอนเว็นกะดีเลยร้องเพลงขับกล่อมผุเฒ่า
"พ่อแม่ทำงานหนัก เพราะอยากเห็นลูกพักผ่อน จิตใจอาวรณ์ถึงตอนลูกนั้นลำเค็ญ"
พ่ะนะ...

ไปยามปลาจากไซมาได้โตได๋ ก็อยากปิ้ง อยากจี่ให้ลูกนั้นได้กินอิ่มเต็มท้อง
โอ๊ย....สะออนเพิ่นหลาย นั่งเบิ่งภาพนิ่ยามได๋ น้ำตาสิไหลยามนั้น
จั่งแม่นเพิ่นอยากเฮ้ดให่อยู่ให่กิน สิจับสิบายอิหยังซ่อยเพิ่นกะบ่อยากให้ลูกเมื่อยนำ

หลังจากที่สูดและเสพเอากลิ่นไอและกำพืดของตัวเองกลับคืนสู่คีงน้อยๆ แล่ว
กะถึงเวลาเดินทางต่อ แต่ตอนนี้ขอเตียมโตหาของต้อนของฝากสาก่อน
หมากน้ำบ่เต้า ต้มหน่อไม้ หมกปลา ตำแจ่ว

เก็บเสื้อผ้ายัดใส่ถุงปุ๋ย....เทิ่งก่องข้าวจับใส่กะต่าน้อยพ้อมแนวอยู่แนวกินเพียบ
คั่นหลงทางหาฮ่มหมากมี้บ่พ่อ กะหาได้แคร์ไม่ จั่งได๋กะมีข้าวมีน้ำกินล่ะหว่ะ
กินอิ่มท้องจ่ะของแล่วกะตีตั๋วรถทัวร์กลับมาโก้ๆ สั่นแล่ว ควมคึดเพิ่น

แต่กะเป็นหยังบุญยุพี่น้องเอ๊ย....ไปฮอดจอดกึ๊กยุฮ่มหมากมี้ก่อนเจ้าของเฮือนอีกต่างหาก
เพื่อบ่เป็นการเสียเวลา กะหล่วยจกหาเอาแนวต้อนนั่นล่ะ กินถ่าเจ้าของเฮือนกะด่าย
เหลือแข่วจ่ะของ จั่งเอาต้อนเพิ่นกะจั่งหว่ะ ฮิ๊ว....ด้วยควมขอบคุณ

เสร็จจากการอัดในค่ำคืนนั่น ต้องขอบคุณอ้ายต่วง อ้ายบ่าวยางตลาด อ้ายปั๊ม ท้าวพงศ์น้อย
ที่มาส่งเมรีขี้เมากับสาวเข้แตก กว่าหัวจะถึงหมอนก็เป็นรุ่งสางของวันใหม่
บ่เป็นอันได้หลับได้นอนพี่น้องเอ๊ย....เพราะข้าศึกโจมตีประตูหลังอย่างดุเดือด

พอได้รับยากับน้ำเกลือแร่ชุดแรกประทังกายแล้ว ใจมันกะห่าวไปต่อ
โดยมีเพื่อนรักเมรีเป็นเพื่อนร่วมทาง เป้าหมายต่อไปคือพายกะต่าไปตีเมืองบูรพา
โดยมีคุณป้าแดง มานั่งบริจาคเลือดให้ยุงรอถ่าการมาเยี่ยมด้วยควมอดทน
ขอได้รับควมขอบคุณไว้ ณ หม่องนี้ ขอความสุขสำราญจงเกิดมีแด่คุณป้าด้วยเทอญ

และฝ่ายเสบียงอิหล่าเพ็นนีและผู้ปกครองกะมาสมทบ
สักครู่ไหย่ๆ พ่อเสี่ยวข่อยกะยกครัวมาฮอด ก้อยกันสดๆ ขมตายบ่เอาเรื่อง

สักพักไทพี่น้องกะหลั่งหล่วยๆมา มีไผแหน่กะเบิ่งแหยงกันเอาเด้อจ้า
ประกาศ.......ถึงผู้มีอุปการะคุณงอดโปรดทราบ "คิดถึงมาก"

นางไหในสังกัด อิหล่าเพ็นนีที่รู้งาน เอื้อยสุ สาวแพม อ้ายโย่ง ท้าวกึ่ม
นำเสนอรูปภาพพ้อมบรรยากาศระหว่างมิตรภาพที่ไร้พรมแดน

มีมาทุกมือในค่ำคืนนี้ บ่วาสิเป็น มือย่าง มือซอย มือชง มือแชท
และแล้ว ฟ้าฝนกะบ่เป็นใจ แต่พวกเฮากะหาได้แคร์ไม่

"ไม่เสียใจเลย...ที่เฮาย้ายหม่อง" ขอได้รับควมขอบคุณจากแมงสะดิ้งอย่างสุดใจ
ไปหาผู้มีอุปการะคุณคุ้มบูรพาทุกผู้ทุกนาม โดยสะเพาะคุณยายโอ๊ะ ...คุณนายงอด
ที่ให่แหล่งพักพิง อิงแอบ และส่วยคีง ไผเห็นนำยกมือขึ้น...อ่ะยก

**เเมงสะดิ้ง** · 30-10-2010, 21:24

ถึงเวลาอันดึกสงัด จึงสมควรแก่การถ่ายรูปหมู เพื่อเก็บไว้ดูเป็นที่ระทึก

พอน้ำเกลือแร่ทำงาน....ควมห่าวควมม่วนกะกลับคืนสู่คีงน้อยด้องแด้งของแมงดิ้ง
ขอบคุณกางเกงลายดอก มักแฮงกะจั่งหว่ะ รับกับใบหน้าคั่กพี่น้องเอ๊ย....

ใคร ทำอะไร ที่ไหน อย่างไร ตามภาพ
หลังจากนั้นอ้ายเฒ่าพาโลกะเดินทางมาฮอด
ซึ่งได้รับคำสั่งให้มารับสมาชิกคุ้มสามเสนกลับบ้าน
ขอโทษที่บ่มีภาพอ้ายพงษ์ประกอบการแสดง
หย่อนควมเที๊ยะเลยขอโตไปนอนก่อนวงการจะเลิกลา

ตัดบทมาฮอดยามเซ้าของวันใหม่ ตกใจตื่นมาด้วยควมเสียดายยิ่ง
โอ๊ว....ชีวิตแสนสุขบายกับคฤหาสถ์หลังงามของฉันคงสิ้นสุดลงแล้ว
ควมสุขสบายที่ฉันอุตส่าห์ยอมใจป้ำควักจ่ายค่าเช่าให้กับคุณนายงอด
เป็นจำนวนเงิน 10บาท + ทิปอีก1 บาทเพื่อให้ได้มาซึ่งบ่าวรับใช้อีกสามนาย
เกิดจั๊กซาติสิได้พ่ออีกพี่น้องเอ๊ย...ค่าเสียหาย 11 บาทแถมฮอดคนล้างถ้วยล้างบ่วง

ด้วยควมซึ้งใจยิ่งนักกับมิตรภาพที่ได้รับมา ที่เพื่อนๆ พากันเยียวยารักษาให้ข้าวให้น้ำพ้อมที่พัก
และยินดีจะรับฝังทุกเมื่อหากมีการตายขึ้นมา พ่ะนะ จึงเป็นเหตุให้มีการกักตัวเพื่อเฝ้าดูอาการ
สมบัติติดตัวที่หวงแหนคือกะต่าปาอิฮือกับก่องข้าวน้อย เพื่อนจึงเฝ้าอาสาดูแลให้อย่างดี
ใจของฉันอยากจะบอกออกไปให้มากกว่าคำว่า"ขอบคุณ"

แต่ฉันก็ไม่สามารถจะหาคำใดมาถ่ายทอดความรู้สึกดีๆ นี้ออกมาป่าวประกาศได้อีก
เพราะมันตื้นตัน ในมิตรภาพที่แสนดีที่ฉันได้รับมาอย่างไม่เคยคิดมาก่อน :*-

"ขอบคุณค่ะ สั้นๆ จากใจ"

พอกลับไปบ้านนอก กะตำเติ่งโลด พี่น้องเอ๊ย.... บุญแลนตำโตบักไหย่ กะจั่งหว่ะ
หย่อนผุเฒ่ายุเฮือนเพิ่นรับเป็นเจ้าภาพถวายธรรมาสน์ในงานทอดกฐินในหมู่บ้าน
กะเลยได้พาไทพี่น้องบ้านเมืองเพิ่นไปหาซื้อเครื่องกฐินที่จะได้ใช้ในงานบุญ

หลังจากนั้นกะนั่งอิหลากอิเลีย เฟียกินแจนั่นแจนี่ เทิ่งป่นจิโป่ม ต้มข้าวโพด
นั่งอุกอั่งนำเฮือนงามพ่อไหย่สูนที่ยังสร้างบ่เสร็จ แต่เงินเบิ่ดก่อนล่ะ อุกนำเด๊

ได้กลับมานอนมานั่งพอมีแฮงคีงจั่กหน่อยแล้ว ถึงเวลาลาเมือกะห่อเอาปลาแดกใส่กะปุก
มัดปาอิฮือใส่ถุงยาง ขอดปุ้มยัดลงกะต่า คอนกลับมาสู้การสู้งานยุทางสวีเดนต่อสั่นแหล่วพี่น้องเอ๊ย
กะส่ำนี่ตั่วเนาะชีวิตคนเฮาเจ้าข่อยกะด่าย หากลมไม่สิ้น กลิ่นปลาแดกยังไม่จาง พวกเฮาก็จะสู้ต่อไป

ตอนนี้ข้าน้อยมาฮอดสวีเดนแล้วอย่างปลอดภัย ขอได้รับควมขอบคุณจากแมงดิ้งแด่มิตรภาพชาวบ้านมหา
ขอความสุขสวัสดีจงเกิดมี โชคดีมีเงินใช้กันทุกคน ให่อยู่ดีกินแซ่บทุกผู้ทุกนามที่ผ่านเข้ามาอ่านเจอ นะเอย
ลงวันที่30 ตุลาคม 2553
อวสานนิทานก้อม

**เเมงสะดิ้ง** · 30-10-2010, 22:06

ปล. รูปภาพตอนยุฮ่มหมากมี้ ยุกล้องดิ้งมีส่ำเห็นเด้อจ้า เพราะตั้งใจทำงานอย่างคั่ก
หลังเลิกจากเวลาอัดกะบ่ได้อยู่ได้เซา นั่งเป็นหลับ ขยับเป็นแหลก
ผลสุดท้ายเลยเข้แตกอย่างที่เป็นข่าว หย่อนกินโป่มหลาย
ไผที่มีรูปบรรยากาศระหว่างมิตรภาพโปรดได้แปะ ร่วมด้วยช่วยกัน เพื่อควมม่วนซื่น
เพื่อเป็นการระลึกฮอดถึงควมทรงจำที่ดีๆค่ะ จบรายงานข่าวเหี่ยน

:*-

**กำพร้าผีน้อย** · 30-10-2010, 22:26

.... แมงสะดิ้ง สัญลักษณ์แห่งความม่วนซื่น สนุกสนาน มิตรภาพ..

ห่าวตลอด 24 ชม อีหลีเนาะ กลับมายามบ้านเทื่อลุนกะมายามอีกแนเด้อ...

**อาวอ้วนเมืองยศ** · 30-10-2010, 23:05

ยินดีและยินดีอย่างยิ่งที่ได้ต้อนรับขับสู้ และไ้ด้ดูแลจ้า เสียดายแต่ท้องใส้บ่ค่อยดี จั่งซั่น แม่นสิได้เต็มที่กั่วนี่เนาะ แต่ว่าก้อดีใจมากๆ ดีใจที่แมงสะดิ้ง เพื่่อนรักเมรีเข้เมา น้องเพ็นนี และสาวๆ คนฮักบ้าน ที่ได้แวะมายาม มาม่วนซื่นโฮแซวนำกันจ้า (เสียดายแต่เจ้าบ้านที่บ่ได้มานำกันนั่นหละครับ)
ยินดีต้อนรับทุกท่านทุกคนนะครับผม แวะเวียนมาเยี่ยมเยือนพวกเราได้นะครับ ที่นี่มีมิตรภาพ ความรัก ความห่วงใย มิตรไมตรี และความม่วนซื่นเสมอ ย่านตะบ่มายามกันครับ

**chudhancock** · 30-10-2010, 23:52

โอ้ย มาคือเป็นตามวน คักเนาะจ้า อยากไปนั่งแจมนำหมู่แท้แท้เลย หลานสะดิ้งจ๋า หลานเป็นคนที่มีบุญวาสนาดีมากๆเลยเนาะจ้าไดไปพ้อหน้าพ้อตากันกับหลานๆพี่ๆน้องๆมากมายหลายหน้าหลายตา
เห็นนาแล้วเป็นตาได้ข้าวหลายเนาะจ้างามคัก พุ้นปิ้งปลา หน่อไม้ กับเทิ้ง แนวกิน หลายๆอย่าง
ขอให้ หลานแมงสะดิ้ง จงมีแต่ความสุขมากๆ เลยเด้อ ขอบใจสำหรับ รูปภาพที่เอามาปั๋นให้เบิง

**สาวทองแพง** · 31-10-2010, 00:17

ธุจ้า สาธุเอาคำอวยพรก่อนจ้าอันดับแรก
ดีใจนำพี่ดิ้งจ้าที่การพักผ่อนผ่านไปด้วยดี
เดินทางกลับมาด้วยความปลอยภัย
ชีวิตบ่สิ้นก็สู้ต่อไปละน้อเอื้อย เฮ็ดแนวได๋น้อจ้า
หน้าหนาวปีนี้คือสิบ่หนาวดอกน้อจ้า หอบความอบอุ่นมาแต่บ้านเฮาหลายปานนี้
:l-ขอบคุณสำหรับภาพและข้อความที่บรรยายออกมาจ้า มายามได๋บ่ผิดหวังเลยจ้า

**เเมงสะดิ้ง** · 31-10-2010, 00:26

สาธุ น้อมรับมาด้วยใจยินดียิ่ง
สำหรับสิ่งดีๆ คำเว่าม่วนหู
ที่นำมาป้อใจให้กันและกัน

**แจ่มใสยิ้มสวย** · 31-10-2010, 01:46

[SIZE="3"]เวลากลับเมืองไทย ดูเวลาแห่งความสุขผ่านไปอย่างรวดเร็ว ไม่กี่วันแมงดิ้งแจ้งข่าวกลับไทย ไม่กี่วัน ภาพความสุขที่ไทย และแล้วก็กลับสวีเดน ดีใจกับภาพความสุขกับพ่อ แม่ พ้องเพื่อน มีความสุขด้วยจริงๆ ค่ะ[/SIZE]