สวัสดีเอื้อยๆ อ้ายๆ พี่น้องบ้านมหาทุกท่านจ้า มาพบพ้อพี่น้องมื้อนี้ ขามป้อมเอางานประเพณีชักพระ ของอำเภอเกาะสมุยมาฝากพี่น้องบ้านมหาจ้า อิหลีแล้ว แต่ละวัดที่อยู่ในเกาะสมุย เพิ่นเริ่มชักหรือลากพระรอบเกาะกันมาตั้งแต่ออกพรรษาแล้วล่ะจ้า แต่งานที่เริ่มอิหลีกะคือ 31 ตุลาคม -8 พฤศจิกายน 2553 ซึ่งกะหมายถึงมีการประกวด ขบวนบุษบก ที่ใช้ลากหรือชักพระโดยการเอามาจอดโฮม (รวม)กันไว้ บริเวณท่าเทียบเรือหน้าทอน อำเภอเกาะสมุยกัน เพื่อให้พี่น้องในเกาะสมุยได้ชื่นชมความงดงามของบุษบกและทำบุญนำกันจ้า ก่อนที่สะถึงมื้อตัดสินว่าบุษบกของวัดได๋ตกแต่งได้สวยงามก่อกัน งานนี้จัดขึ้นเป็นประจำซู่ปีจ้า แต่ขามป้อมหาก่อได้มีโอกาสเอาภาพบรรยากาศมาฝากพี่น้องจ้า
ภาพบ่ค่อยงามปานได๋จ้าพี่น้อง ฟ้าฝนบ่เป็นใจ พายุเข้าจ้า บ่เห็นตะเว็นหลายมื้อแล้ว เทิงย้านฝนฮำ ขามป้อมกะเลยจอบไปเบิ่งยามเว็นเอาจ้า ตะปานนั้นลมกะแฮงคักจ้าพี่น้อง น้ำทะเลกะขุ่นๆ ก่อสะมาตะเว็น ยามค่ำมา หาหม่องจอดรถยากคักจ้าพี่น้อง ภายในบริเวณงานกะสะมีเวทีสองเวทีจ้า พร้อมด้วยบรรดาร้านค้า ขายของกินของใช้ ของที่ระลึกจ้า
ย่างๆไป เห็นคนหลายๆ แม่นเพิ่นพากันหุ้มเบิ่งหยังน้อบาดนี่ เสียงแตกแซวๆ
หยับเข้าไปเบิ่งใกล้ๆ ซูมๆ อ้อ เพิ่นแข่งขันกันปอกบักพร้าวจ้าพี่น้อง ภายในเวลา 5 นาที ไผสะปอกได้หลายหน่วยก่อกันจ้าขามป้อมไปพ้อเพิ่นแข่งกันรอบสุดท้ายแล้วจ้า ตอนนี้เหลือผู้แข่งขันสองคน คือทีมจากหาดแม่น้ำ(เสื้อขาว) กับหาดลิปะน้อย(เสื้อฟ้า)
ผลออกมาแล้วจ้า นี่ล่ะจ้าผู้ชนะ ได้รับรางวัล 5.000 บาทไปครอง 5 นาทีเลาปอกได้ 33 หน่วยจ้านำคู่แข่งไปแค่ 4 หน่วยท่อนั้นฉิวเฉียด ทีนี้กะย่างกันต่อเลยจ้า
มาฮอดขบวนบุษบก จากวัดต่างๆ ในอำเภอเกาะสมุยแล้วจ้าพี่น้อง ถ้าฟ้าฝนเป็นใจ ขามป้อมสะมาเก็บภาพบรรยากาศยามกลางคืน มื้อสุดท้ายของงานมาฝากพี่น้องจ้า
Bookmarks