ล่ะมาบัดนี้ ยามมีฝนสั่งฟ้าเอิ้นลาหมู่เด้อฝูงปลา
ข้าวอยู่นาขจีเขียว ก่องใบยามลมต้อง..
ล่ะน้ำเต็มนา ปลามาบ้อน มาออนซอนขึ้นมันม่วน
ล่ะฟังเสียงฟ้าฮ้องฮวน คือสิลาจากแล้วว่าปีหน้าจังพบกัน ...
ล่ะทุ่งอีสานยามนี้นั้น เห็นแล้วม่วนชวนหลงใหล
ยืนคันแทแนมไกลไกล นกไก่นาถลาล่อน...
ล่ะเบิ่งพุ้นแหม หนุ่มขจรเพิ่นลงต้อน ไปดักปลาบ่อนนาลุ่ม
ข้าวแตกกอเขียวจุ่มกุ่ม เสียงปลาเข็งดีดบ้อน ปลาซิวน้อยกะแฮงหลาย ...
ล่ะคิดฮอดเด้ คิดฮอดน้องและอ้ายผู้ไกลถิ่นดินอีสาน
ไปทำงานอยู่เมืองไกล อยู่จั่งใด๋... น้อทางพุ้น
ล่ะข่าวทีวีซางมาวุ่น มีหลายซุมวุ่นหลายฝ่าย
ล่ะคันลำบากอยู่เมืองใหญ่ กลับอีสานบ้านเค้า...มากินข้าวแม่นบายปลา
ล่ะอยู่บ่อนใด๋ในแผ่นหล้า สิสุขทอดอกเฮือนเฮา
ยามใจเหงาให้คืนนา จ้ำป่นปลาก็สุขล้น
ชีวิตคนไทบ้านคนอีสานเว้ากันง่าย
มาเบิ่งเด้อ..ยามตะเว็นค่อยบ่าย กอข้าวเขียวแสงแดดต้อง มามองแล้วกะแฮงงาม
แล้วฝูงหมู่ปลาเต้นตื่นน้ำคันแทกิ่วสิบืนหนี
ปลาข่อตี้บืนตกหลุมหนุ่มขจรมาดักไว้
ล่ะแถวนาเทิงนาใต้ แนมไปไสน้ำล้นปรี่
เสียดายเด้ .. ปลาลูกคอกกะลงลี เสียงพ่อลุงแม่ป้าเพิ่นถามทวงแม่นข่าวคราว
ล่ะถามข่าวถึงลูกเต้าสิมาบ่ออกพรรษา ฝากเงินมาให้พอปุ๋ย แหน่บ่หนอลูกชายโต้น
ล่ะหน่อยบ่โดนเสียงกลองแลง ญาคูเจ้าดังมาก้องฮวนๆ
ได้ฟังแล้วซางมาม่วนคือดนตรีกล่อมทุ่ง ยามฟังแล้วแฮงสะออน ...
ล่ะนี่หล่ะคำค่าก้อนท้องถิ่นดินอีสาน เป็นวิมานของคนจน แม่นนั่งโพนกะสุขล้ำ
ล่ะยามฝนลาปลาพอน้ำไหลลงซออยู่ก้นลี
กลับมาเด้อน้องพี่ แต่งชุดสีน้อโก้โก้..... มาเดินผ่าย...มายท่งนาแน่เด้อพี่น้องเด้อ..
Bookmarks