สวัสดีครับ มื่อนี้ครัวเซียงเหมี่ยงฯ มีโอกาสรับใช้พี่น้องบ้านมหา เข้าครัวนำเสนอเมนูกับข้าวอีกแล้วครับ สองสามมื่อที่ผ่านมาเห็นครัวสาวบ้านแต้ น้องอี๊ท นำเสนอเมนูแก้หวัดมาสองเมนูแล้ว มื่อนี่เซียงเหมี่ยงฯ กะรู้สึกว่าเจ้าของหายใจบ่สะดวกปานได๋ ตันดังหน่อย ๆ กะเลยคิดหาเมนู ทะลวงเข้มูกจักหน่อยน๊า พอให้หายใจโล่งครับ.
เลยได้ไปหาหย่างจ่ายตลาดหาวัตถุดิบมาแปรรูปเป็นแนวกินข้าวจักหน่อย กะบังเอิญว่าชาวบ้านเผิ่นได้หมูป่ามาขายอยู่ตลาด กะเลยเอาล่ะมื่อนี่ได้เมนูผัดเผ็ดหมูป่านี่ล่ะ เผ็ดฮ้อนไล่หวัดจักหน่อย ได้หมูมาแล้วกะจัดแจงหา เครื่องปรุง กับผัก กะได้ พริกไทยอ่อน กระชาย ข้าวโพดอ่อน บักเขืออ่อน บักพริกหยวก พริกแกงเผ็ด(คร้านตำเองครับ ฮ่า ๆ) กะทิกระป๋อง(เอาง่ายไว้ก่อน) ส่วนกระเพา ลูกดีปลี กับ ใบบักกรูด บักหูด(คราวนี้บ่ลืมครับ ฮ่า ๆ ) เก็บเอาหลังบ้านครับ บ่ได้ซื้อ
ขั้นตอนแรกหั่นหมูก่อนเนาะครับ หมูหั่นเป็นชิ้น ๆ ครับ สำหรับการหั่น อย่าหั่นให้ติดหนังหลายครับต่อหนึ่งชิ้น เพราะว่าหนังหมูป่ามันเหนียวครับ เดี๋ยวหย่ำบ่แหลก
พริกแกงเผ็ดครับที่เตรียมไว้ครับ
ผักเครื่องปรุงทั้งหลาย
ส่วนกระทิเซียงเหมี่ยงฯ ใช้กะทิ กระป๋องครับ
ใบกะเพราเก็บหลังบ้านครับกำลังงาม
บักเขือครับ ฝานแล้วแช่น้ำเกลือเด้อครับจั่งบ่ดำ
ตั้องกระทะ ใส่น้ำมันเอาพริกแกงลงผัดให้ได้ที่ สังเกตจากเสียงจามของสมาชิกในบ้านหรือเพื่อนบ้านครับ ถ้าบ่มีเพื่อนบ้านกะตะของนี่ล่ะครับ ฮ่า ๆ ๆ ...
นำเนื้อหมูป่าลงผัดครับ พอผัดเนื้อหมูป่าสุกแล้ว ปรุงรสด้วย ซอสปรุงรสฝาเขียว ซีอิ้วขาว ซีอิ้วดำหวาน น้ำปลา ซอสหอยนางรม น้ำตาล แล้วเติมกระทิลงไปครับ
เติมกระทิลงไปแล้วผัดต่อไปเรื่อย ๆ ครับให้กระทิเข้ากันกับเนื้อหมู ผัดจนเกือบแห้งนั่นล่ะครับ
จากนั้นใส่ผักที่เตรียมไว้ลงไปครับ
ผัดพอให้ผักสุกกะถือว่าได้ที่แล้วครับ ชิมรสเอาตามใจที่ตะของว่าแซบเนาะครับ รสชาดผัดเผ็ดกะต้องเผ็ดพริกแกง ฮ้อนเครื่องจากพริกไทย กระชาย ดีปลี กะเพรา เนาะครับ มีหวานตัดนิดจากน้ำตาลกับกระทิ พอให้กลมกล่อม
ขั้นตอนสุดท้ายปิดไฟใส่ใบกะเพรา ผัดให้เข้ากันเป็นอันเสร็จเรียบร้อยพร้อมเสริฟครับ
จากนั้นตักใส่จาน กับ กินกับข้าวสวยฮ้อน ๆ บวกไข่เจียวหมูสับอีกอย่างหนึ่ง โล่งจากอาการตันดังดีแท้ ๆ เลยครับ ความเผ็ดร้อนจากพริกแกง กับ เครื่องปรุงสมุนไพรไทย มีประโยชน์ครับผม ยาอยู่ใกล้ ๆ เฮานี่เอง เซิญแซบ นำกันครับ
ขอบคุณทุกความเห็นที่เข้ามาเยี่ยมชมชี้แนะ และขอได้รับความขอบคุณจากครัวเซียงเหมี่ยงฯ เช่นเคยครับผม
Bookmarks