กำลังแสดงผล 1 ถึง 5 จากทั้งหมด 5

มหาดเล็ก ความคิดดี

  1. #1
    แบ่งปันความรู้และประสบการณ์ สัญลักษณ์ของ prayoon
    วันที่สมัคร
    Jul 2010
    ที่อยู่
    จ.นครปฐม
    กระทู้
    120
    บล็อก
    3

    มหาดเล็ก ความคิดดี

    สวัสดีครับ พี่น้องบ้านมหาทุกท่าน ผุถืกเลขและผุบ่ถืกเลข โดยเฉพาะแฟนๆนิทานก้อม หรือนิทานสั้นพื้นบ้าน มื้อนี้ เพิ่น Prayoon สิได้นำเสนอนิทานอีกจักเรื่องหนึ่ง ให้แฟนๆ ได้ม่วน มื้อนี้รับรองสิเล่าให้จบ เพื่อบ่ได้เสียอรรถรส ขอเชิญติดตามได้เลยครับ

    เรื่องมีอยู่ว่า......... ณ เมืองแห่งหนึ่งมีพระราชา และมหาดเล็กคู่ใจผุนึง ซึ่งเอิ้นง่ายๆว่าเป็นคนสนิทคอยติดตามพระราชาตลอดบ่ว่าสิไปไสมาไส มีอิหยังพระราชากะสิมักถามเจ้ามหาดเล็กอยู่เสมอๆ
    เมื่อฤดูแล้งที่ผ่านมาหวั่งนึงฮั่น ซาวนากะบ่ได้พากันเฮ็ดนา เฮ็ดเข่า ปลูกพืชปลูกผักบ่ได้เลย ย้อนหยังว่าติ กะย้อนว่ามันแห้งแล้ง ฝนฟ้าบ่ตกบ่มีน้ำ สะแหล่ว พระราชากลุ้มใจหลาย กะจึงถามมหาดเล็กว่า.....
    พระราชา “ มหาดเล็ก เจ้ามีความคิดเห็นว่าจั่งใด๋? ว่ามาดุ๊ “
    มหาดเล็ก “ ดีพะยะค่ะ “
    พระราชา....เพิ่นกะงงเนาะ “ ดีจั่งใด๋? เดอนี่ “
    มหาดเล็ก “ กะงัว ..ควาย..มันพากันทำงานหนักมาทั้งปี มันกะสิได้มีโอกาสพักผ่อน พะยะค่ะ “

    บาดนี้พอมาถึงหน้าฝน มีฝนตกมาตลอดมื้อตลอดเว็น จนซาวบ้านเดือดฮ้อนไปไสมาไสบ่ได้สะแหล่ว
    พระราชากะเอิ้นหามหาดเล็กคู่ใจมาถามอีกคือเก่า มหาดเล็กสิตอบว่าจั่งใด๋ล่ะพี่น้อง ฟังต่อ
    มหาดเล็ก กะตอบว่า.... “ ดีพะยะค่ะ “
    พระราชากะทรงตาขวงๆจั๊กหน่อย .... “ ดีจั่งใด่อีกวะ! ไปไสมาไสกะบ่ได้นี่ “
    มหาดเล็กกะเลยกราบทูลว่า “ กะเฮาสิได้เก็บกักน้ำเอาไว้ใซ้ยามหน้าแล้งเด....พะยะค่ะ “

    อยู่มามื้อนึง พระราชาคิดม่วนในหัวเอิ๊กหัวใจอยากสิออกไปล่าสัตว์สะแหล่วพี่น้อง กะเล้ยนำดาบมาทำความสะอาด สิ่งบ่คาดคิดกะเกิดขึ้น เพ.ล้.ง อุบัติเหตุเกิดขึ้นได้เสมอ ดาบหลุดมือหล่นไปตัดเอานิ้วโป้ตีนพระราชาขาดจั๊ด พระราชากะยังนึกถึงมหาดเล็กคู่ใจอีก...อยากฮู้ว่า....มหาดเล็กสิคิดสิตอบว่าจั่งใด๋อีก จึงเอิ้นมหาดเล็กเข้ามาเฝ้ามาถามคือเก่า

    มหาดเล็กกะตอบคือเก่าอีก ....” ดีพะยะค่ะ “
    สูน....สูน...พระราชาสูนบักใหญ่แหล่วพี่น้อง ฮ้ายเฟ็งๆ ว่า “ ปาดสิโธ่ นิ้วโป้ตีนเราขาดขนาดนี้ โตยังบังอาจมาบอกว่าดีอีกหรือ ฮ่วย! ทหาร....ท...หา..ร เอาโตมหาดเล็กไปขังเคียวนี้ “ มหาดเล็กถืกขังจ้อยพี่น้อง

    แล้วพระราชากะเข้าป่าไปล่าสัตว์กับพวกทหารจำนวนนึงอย่างสนุกสนาน ม่วนบักขนาด พระราชาเหลือบไปเห็นกวางน้อยสีขาวจุ้นพุนโตนึงแล่นหนีเข้าไปในป่าลึก กะเลยสั่งให้ทหารตามไปล่ากวางสีขาวโตนั้นมาให้ได้ พระราชาและทหารกะได้แล่นนำเข้าไปในป่าลึก ลึกอีหลี หรือเอิ้นว่าลึกคัก และแล้วเหตุการณ์ที่บ่อาจคาดคิดกะเกิดขึ้นอีกล่ะบาดนี้

    พระราชาและทหารกะเข้าไปพ้อกับพวกมนุษย์กินคนจำนวนบักหลายในดงลึกแห่งนั้น ในที่สุดทหารและพระราชากะถืกมนุษย์กินคนจับ และถืกกินมื้อละคน มื้อละคน จนมื้อสุดท้ายเหลือพระราชาองค์เดียวสะแหล่วบาดนี้ พวกมนุษย์กินคนกะต้มน้ำใส่หม้อบักใหญ่เติมสมุนไพรปรุงรสหอมฮีนๆ เพื่อสิต้มแซ่บพระราชากินกันสั้นแหล่ว บังเอิญมนุษย์กินคนผุนึงกะเหลือบไปเห็นนิ้วโป้ตีนพระราชาขาด กะพากันท่วง

    หมอทำพิธีของพวกมนุษย์กินคนกะเลยกล่าวออกมาว่า “ คนผุนี้พวกเฮากินบ่ได้ เพราะเป็นคนนิ้วขาด เป็นกาลกีณี ผิดผีกินบ่ได้ ต้องปล่อยไป “ พี่น้องเอ๋ย พระราชารอดแล้ว

    พระราชากะจึงเป็นผุเดียวที่รอดพ้นจากการถืกกิน และกลับมายังพระราชวังได้

    กลับมาเถิงวังกะยังคิดฮอดมหาดเล็กคู่ใจคือเก่า จึงสั่งให้ทหารนำเอาโตมหาดเล็กที่ถูกคุมขังมาเข้าเฝ้า และกะถามความคิดเห็นมหาดเล็กว่า เป็นจั่งใด๋แหน่อยู่ในคุกน่าน...?

    มหาดเล็กกะตอบว่า....” ดีพะยะค่ะ “ คือเก่าอีกล่ะ
    พระราชากะสีสงสัย จักสิฮ้ายสิว่าจั่งใด๋ สีงงๆ ..... “ ดีจั่งใด๋วะ ถืกขังคุกนี่!.... ฮึ ? “
    มหาดเล็กกราบทูลไปว่า.....”.คันถ้ากระหม่อมบ่ติดคุกนี่ กะคือสิถืกพวกมนุษย์กินคนเฮ็ดต้มแซ่บกินไปแล้ว...พะยะค่ะ “ ….

    จบจ้อย

    นิทานเรื่องนี้สอนให้ฮู้ว่า คันถ้าเฮาคิดดี คิดบวก กะอาจสิส่งผลดีกับชีวิตของเฮา การคิดดี คิดในทางที่ดี ออกมาจากใจของเฮา มันสิเป็นพลัง พลังแห่งความสุข เฮ็ดอีหยังได้ผลนิดหน่อย กะฮู้สึกมีความสุข บ่ทุกข์บ่ฮ้อนอีหยังหลาย บ่ว่าบางครั้งเฮาอาจสิเจอกับปัญหาหรืออุปสรรคยากๆ กะมีความฮู้สึกว่า บ่ทุกข์ฮ้อนอิหยังมากมาย เพราะว่าปัญหาทุกปัญหามีทางออกทางแก้เสมอ เพราะฉะนั้นกะให้เฮามีความคิดเป็นบวกในปัญหาที่เกิดขึ้น
    ขอได้รับความขอบคุณพี่น้องบ้านมหาซุคน หรือผุที่ผ่านที่แวะเข้ามาอ่าน มักบ่มักกะบอกออกมาเป็นโตหนังสือกะได้ ขอบคุณหลายๆครับ เรื่องหน้าพ้อกันใหม่
    เพิ่น Prayoon คนโก้

    ขอขอบพระคุณแหล่งที่มา อาจารย์ รศ. ดร. ชัยณรงค์ วงศ์ธีรทรัพย์ หนังสือ ถอดรหัสแนวคิด เพื่อชีวิตที่มีคุณค่า



    แก้ไขครั้งสุดท้ายโดย prayoon; 17-11-2010 at 08:13.

  2. #2
    เจ้าหน้าที่ประชาสัมพันธ์ สัญลักษณ์ของ ลุนนี ศรีเกษ
    วันที่สมัคร
    Jun 2009
    ที่อยู่
    ศรีสะเกษ กรุงเทพ จอมเทียนชลบุรี
    กระทู้
    858
    บล็อก
    1
    -ขอบคุณPrayoon เดอจ้า นิทานดีๆแบบนี้ มันยังเหลืออีกหลายเรื่องยุมั้งจ้า ในหนังสือเล่มนั้น
    เอามาลงเดอจ้า ม่วนดี ฟรีด้วย อิอิ ขอบคุณนิทานคิดบวก

  3. #3
    Banned

    วันที่สมัคร
    Oct 2010
    กระทู้
    798
    บล็อก
    4
    เข่ามาอ่านตามคำเชิญชวน..ดีพะยะค่ะ..:l-สิ่งที่ผ่านมาแล่ว ถึงจะเป็นเรื่องที่ดีหรือบ่อดี ถ้าเราคิดบวกไว้เราก็สบายใจ
    แต่ถ้าเป็นสิ่งที่คาดว่าจะเกิดขึ้นในอนาคตขอคิด2ด้านเด้อจ้าเผื่อเราจะได้เตรียมใจ คิดหาทางแก้ปัญหาล่วงหน้าไว้พร้อม

    จะได้บ่อเป็นคนประมาทกับอนาคตนำจ้า....
    ขอบคุณเด้อจ้าสำหรับนิทานที่ให่ข้อคิดดีๆ

  4. #4
    แบ่งปันความรู้และประสบการณ์ สัญลักษณ์ของ นักรบหัวใจ
    วันที่สมัคร
    May 2009
    กระทู้
    235
    ดีพะยะค่ะ.ขอบคุณเด้อPrayoon

  5. #5
    ฝ่ายเทคนิค และถ่ายทอดสด สัญลักษณ์ของ อาวอ้วนเมืองยศ
    วันที่สมัคร
    Apr 2010
    ที่อยู่
    เมืองบั้งไฟ
    กระทู้
    1,594
    ครับผม คิดบวกคิดดีน้อครับน้อ จั่งผมนี่หละ บ่ยากจักเทื่อแมะ ย่อนคิดจั่งซี้หละ 555
    โอ้ยม่วนตลอดคับผม เหอๆๆ