มาขอขมาฝาชี โอ๊ะ...ขอขมาสามีกันเถอะ

[เเมงสะดิ้ง]

ตามที่จริงเรื่องราวของการขอขมาผัว คั่นเว่าแปนๆ เนาะตามประสาคนบ้านเฮากะด่าย
กะได้ยินได้ฟังมาต่ะเหิงแล่วล่ะ จากผู้เฒ่าผู้แก่บ้านเฮาใซ่บอกลูกสอนหลาน
บ่วาสิมาจากตำหรับตำราที่เฮาได้ร่ำเรียนมากะดี ที่เพิ่นกล่าวถึงการบูชาทิศทั้ง 6
โดยพระพุทธองค์เพิ่นได้อธิบายความหมายของ แต่ละทิศไว้วา



ทิศเบื้องหน้า ได้แก่ มารดาบิดา
ทิศเบื้องขวา ได้แก่ ครูบาอาจารย์
ทิศเบื้องหลัง ได้แก่ บุตร ภรรยา สามี
ทิศเบื้องซ้าย ได้แก่ มิตรสหาย
ทิศเบื้องล่าง ได้แก่ คนรับใช้ คนงาน หรือบริวาร
ทิศเบื้องบน ได้แก่ สมณพรหมณ์ หรือพระภิกษุสงฆ์



ยิ่งมีโอกาสได้สดับรับฟังเทศน์จากหลวงพ่อบุญเสริมจากเว็บบ้านมหาเฮาแน่
จากแม่ชีทศพรทางยูทูบแน่...ฯลฯ อันนั่นกะดี อันนี่กะมี
คั่นไปวัดไปวากะเคยได้ยินป้าๆ เพิ่นเว่ากันเรื่องนี้นำอยู่
ฟังดู๋ได้ยินดู๋จนเกิดความเป็นพหูสูตรกะจั่งหว่ะ...บึ๊ยลมปากแปๆ
แต่กะบ่ได้ลงมือเฮ็ดนำตามเพิ่นจั่กเถื่อดอกหวา...
หย่อนคำวา"กูโก้+อีโก้กูสูง" หรือควมมีทิฐินั่นเอง




เอ๋า...เว่าจั่งซี่แล่วคึดจั่งได๋ คือได้เป็นบ้าไปขอขมาผัวล่ะบาดเนี่ย
กะหย่อนสะเดิ่ดในควมเว่าของปั๋วจ่ะของนั่นแล่ว บ่ได้สะเดิ่ดซื่อๆ ได๋
ตื่นหยึ่บ ขนหัวลุกหย่าบพ่วนเด้อ จั่กวาเพิ่นคึดจั่งได๋มื่อนั่น
อัดอั้นตันใจหยังกับเฮามาดนกะบ่ฮู้คือกันนั่นล่ะหวา

"อัน...เถ่าอันนี่ ที่ซุมหมู่เจ้าวาตามหลักพุทธศาสนามีซาดนี่ ซาดหน่า กับซาดที่แล้วนั่นน่ะ
คั่นมันแมนอีหลี ซาดหน้าขอให่เฮากลับมาเป็นผัวเมียกันคือเก่าเนาะ แต่เฮาต้องเปี่ยนกันได๋
ให่เจ้ามาเป็นผัวข่อย แล่วให่ข่อยได้เป็นเมียเจ้า มีนิสัยคือเจ้าในตอนนี่พ้อม แล่วซาดหน้าข่อยขอเอาคืนเด้อ"
พ่ะนะ



หวึย....เว่ามาจั่งซี่กะหย่านล่ะเนาะคน หย่อนไปข่มเหงเหมบเต็งเพิ่นไว่บ่แมนน้อยๆ
ฮ่วย...อยู่นำกันดีๆ สิมายัดเยียดหนี้ในอนาคตให่เฮานำไปใซ่เพิ่นคืนซาดหน้าพ่ะนะ
ป๊าดโธ๊...ถึงสิถืกสิผิดกะบ่ขอยอมง่ายๆเด้อ คั่นเลือกได้บ่อยากมีสัญญากรรมกับไผกะจั่งหว่ะ



แต่ที่ปรารถนาแฮงกะคือการมีกัลยาณมิตรที่คอยนำยู้ส่งเสริมซึ่งกันและกันนั่นแล่ว
อันควมที่ตั้งใจปฏิบัติหวังบืนใส่อยู่ทุกมื่อนี่กะเพื่อหลุดพ้นจากวัฏฏสงสารนั่นตั่ว
แต่คั่นบุญบ่ฮอดจอดบ่ถึงป้ายนั่น อย่างน้อยๆ กะบ่ขอหลายดอกสั่น
ความตั้งใจขอได้ปิดทางอบายให่แจบสนิทกะเป็นบุญหัวอยู่ดอกหวา




"เอาจั่งซี่สาเถ่า...เพื่อควมสำบายใจของเฮาทั้งสอง ให่เจ้าคึดใหม่สา แต่กะปฏิบัติดีนำข่อยคือเก่านั่นล่ะ
คึดซะวาซาดที่แล้วข่อยเป็นผัวเจ้า ปฏิบัติดูแลดีกับเจ้ามาตลอด จนมาฮอดซาดนี่เจ้าเลยกลับมาใซ่หนี้ข่อยเนาะเถ่าเนาะ"
เป็นอันวาเจ๋ากันเด้อเฮา



มีโอกาสเหมาะๆ อาศัยมื่อของขึ้นนั่นล่ะ อารมณ์ดีๆ ใจเบิกบาน กะงวกไปกอดเพิ่นแหน่ะ
ไหว้งามๆ เถื่อแรกซบลงอกนั่นล่ะขอโทษเด้อเถ่าอันนี่ อันได๋กะซ่างที่ข่อยเฮ้ดให่เจ้าหนหวย อุกอั่ง และคันแข่วกะด่าย
และไหว้อีกเถื่อที่สองมือกะบ่กุดหย่อนดอก ขอบคุณหลายๆเด้อเถ่า ในควมใจดีและอดทนที่เจ้ามีต่อข่อย
ถึงข่อยสิทำตัวเร้าตรีนปานได๋ แต่เจ้ากะยังมีอุเบรคตรีน อุเบรคขาเสมอมา ขอบคุณที่เจ้าบ่ถือสา เคียดโทษโกรธเคืองเด้อ
เฮากะฟ่าวเว่าเองเออเองโลด...รับรองเพิ่นบ่กล้าปฏิเสธดอกมัดมือชกปานนั่น อย่าให่เป็นกรรมเป็นเวรต่อกันเด้อ สาธุคุณผัวเอ๋ย



ฮ่วย...ยามได๋เปิดเวทีอภิปรายโต้เถียงกันกับท้าวทิศเบื้องหลังยามได๋ โลดคึดฮอดคำเว่ายายทองพูนตั่วล่ะ
"มีผัวให่ซางหย่อง มีน้องให่ซางออยเด้อนาง" พอเห็นป่่องสิได้ หม่องเฮาสิชนะขาดลอยแล่ว
กะเอาควมจริงใจวัดกันโลดตั่วพี่น้องปะสาผัวซื่อๆ .... ฮิ๊ว... :l-



หย่องให่เป็นซุปเปอร์แมนเพิ่นแห่งมัก เว่าให่เป็นหมู่กะถืกคีง ออยให่เป็นน้องพอเฮาได้ล่อสับมักกอกยามคันแข่วเพิ่นกะบ่วาหยังตั่ว
ผัวสิเป็นผู้จั่งได๋ เพิ่นสิปฏิบัติต่อเฮาจั่งได๋ คำเว่าคำจาผู้เป็นเมียกะมีส่วนสำคัญอยู่เด๊ะเห็นวากะด่าย

คั่นไผมีผัวเป็นตาคันแข่ว กะอย่าฟ่าวกัดแข่วใส่กันเด้อ ปฏิบัตินำเพิ่นดีๆ โลด
แห่งผัวไผเป็นตาซัง นั่นล่ะต้องแผ่เมตตา มอบควมฮักให่เพิ่นหลายๆ
เดี๋ยวจั่กหน่อยกะตายหนีจากกันดอก บ่เจ้ากะข่อยนั่นล่ะ ไผสิไปก่อนกันจั่งถ่าเบิ่ง
แต่อย่าไปแซ่งให่เขาตายก่อนเด้อล่ะ ...ส่ำอวยพรให่เขาอายุยืนเด๊ะนั่น
อดเอาเด้อพี่น้อง ดีหรือซั่วกะผัวเฮาดอก 55555555555555+



ฝากไว้แหน่เด้อซุมเฮา มื่อดีคืนดีอย่าลืมเช็คเรตติ้งกับสามีจ่ะของเบิ่งแหน่เด้อล่ะ
" อัน เถ่าๆ เจ้าเห็นข่อยเป็นจั่งได๋ในสายตาเจ้าซู่มื่อนิ่? "
แต่บางเถื่อคำถามตรงๆ เพิ่นอาจสิบ่กล้าบอกเฮาผ่านวาจาอันสามหาวเพิ่นกะเป็นได้



ให่เวลาเพิ่นคิดทบทวนสักนิด สักมื่อได๋มื่อนึงล่ะหว่ะ
ควมในใจเพิ่นกะสิได้ปลาดุก โอ๊ะปรากฎ
อาจสิเผยออกมาในรูปแบบได๋แบบนึงแบบนี้
...อันนี่กะแม่นโตข่อยเด้อเถ่า...




ส่วนแมงโตนี่จ่ะแม่นคือเจ้าคั่กเนาะ



อันนี่ล่ะคือเฮาสองคนบนชายคาฮ่างๆ




ฝากไว่ให้นำไปเฮ็ดปฏิบัติแหน่ะเด้อพี่น้องผู้ที่มีผัวเป็นตัวเป็นตน
กรุณาดูแล ห่วงใย ไว้ใจ และให้เกียรติ อย่าด่าผัวในที่แจ้ง
คั่นอดบ่ได้หลายกะให่ดึงหูไปเมี่ยนในที่ลับสั่นตั่วเพิ่นวา
เอาล่ะเนาะพี่น้อง... ทางนี่เมี่ยนเสร็จแล่วเด้อ
ขอเวลานอกไปเก็บซากก่อนดอกบาดเนี่ย
...ฮึ่ม...