ขอนุญาตประกาศก้อง ห้องแห่งเฮือนมหา
ฝากผญาหาคนงาม อยากไต่ถามตามเว้า
อยากฮู้ข่าวเป็นได๋บ้าง ทางสาวส่าคนไค
ไปอยู่ใสน้อนาง จั่งเงียบหายหลายมื้อ
ซ่างมาคือมิดโดนแท้ เลยแวมาถามข่าว
หวนโอ้อ่าวคึดพ้อ ผู้เคยส่อต่อกระบวน
ตอนบ่าวเว้าเจ้ายังซ้วน ผญาม่วนชวนหัว
ยามหลวมตัวลืมคราว เคยได้สาวมาซ่อยเสี่ยม
หม่องบ่เคี่ยมยังเคยซี้ หม่องได๋ดีซี้บอกฮ่อม
ยินดีดอมโดยอ้าง ทางเจ้าท้าวว่าครู
เคยอิดูตั้งแต่กี้ มามิดหมี่ไปทางได๋
จนปีเก่าผ่านพ้นไป เข้าปีใหม่หลายวันแล้ว
บ่เห็นแววคืนมาบ้าน วอนส่งสาร์นให้ฮู้แน่
วอนมาแลล่ำเยี่ยม เฮียมบ้างให้ส่างเหงา
นับแต่มื้อบ่าวเข้า เนาว์ฮ่มเฮือนมหา
ผู้เข้ามาจาดอม แต่ปฐมนั้นคือเจ้า
โปรดส่งข่าวมายามบ้าง หม่อมพะนางเป็นได๋แน่
เห็นตั้งแต่กุญแจ กับป้ายแป๋บ่อยู่บ้าน ส่วนโตท่านไปอยู่ใส...น้อ ขอรับ..
Bookmarks