...พุทธทำนายบอกไว้ อีกบ่โดนโลกสิแตก คนสิเกิดเดือดร้อน วายวุ่นทั่วไป
ไฟบรรลัยกัลป์เข้า สรรพสัตว์สิจมจุ่ม คนสิลุกขึ้นฆ่า ซิงแย่งแข่งกัน
...ไฟบรรลัยกัลป์นั้น คือคนขาดคุณธรรม โลภโกรธหลงมัวเมา มืดมัวเหมิดด้าน
คนบ่กลัวเกรงย้าน บาปกรรมนำส่ง มีแต่ฆ่า ปล้นจี้ โจรฮ้ายขึ้นนั่งเมือง
...คนผุมีศิลสร้าง มีคุณธรรมไปอยู่ป่า พี่น้องเอ้ย คนผุใจคดเลี้ยว ได้ครองบ้านนั่งเมือง
อาศัยอำนาจถ่อย โกงกินประเทศชาติ เงินบาทลอยอยู่ฟ้า ราคานั้นผั่นอยู่ดิน
...พวกหญิงชายวัยรุ่น บ่ฟังความพ่อกับแม่ มีแต่มื้อ ดีดเต้น โตนเข้าสู่อบาย
มอเตอร์ไซด์แม่ซื้อให้ แล้วหาญิงมาเป็นคู่ ขึ้นขี่ม้าบักจ้อน หาเทียวซิ่งก่อนตาย
...พวกชาวนา กะตีกลองกินเหล้า จับกลุ่มคุยกัน นินทากันไปมา ว่าบ่ดีหาแนวอ้าง
ไผผุมีศีลสร้าง บอกเป็นคนบ่มีหมู่ พะนะ ต้องมั่วสุมท่อนั้น คนสิตุ้มแห่แซว
...มันเป็นสงครามฮ้าย เศรษฐกิจตกต่ำ ตกเป็นทาสต่างด้าว เงินกู้ใช้บ่เหมิด
เขามาบงการให้ เฮ็ดนำเขาเหมิดสุอย่าง กลายเป็นเมืองขึ้นแล้ว ไทยนั้นอยู่หว่างได๋ ซั่นดอกพี่น้องเอ้ย...
Bookmarks