ได้ฟังข่าวเขาประกาศ ภัยพิบัติทางทะเล
เป็นห่วงเด้ทางเจแปน แดนอาทิตย์อุทัยพุ้น
น้ำนองหนุนดันยู้ คลื่นปานภูขึ้นริมฝั่ง
เข้าโถมทั่งพังภาคพื้น เป็นเกลียวคลื่นคั่งพะลาน
เสียงกึกก้องเป็นตาย่าน ซัดเฮือนซานบ้านซ่อง
กวาดสิ่งของเร็วราบ เภท์พังพาบหมุ่นทะลาย
ธรณีพิโรธฮ้าย เข้าทำลายเพราะกริ้วโกรธ อันได๋น้อ
บทลงโทษไร้ปราณี หลายชีวีต้องดับดิ้น
ซ่างตัดฉินท์ชีวาวาต ขาดไปบ่ได้สั่ง
พอได้ฟังใช่หน่อยๆ มีหลายร้อยที่ลื่นพัน
บ้างกะอันตรธานจ้อย หาฮอยบ่เห็นฮ่อม
ยอมือน้อมนบแก่ฟ้า ให้เห็นหน้าแน่กะไค
สาธยายบ่ทันแล้ว ผัดมีแนวมาบังเกิด
ข่าวระเบิดเตานิวเคลียร์ แฮ่งเหลือใจไปหลายล้น
คนแฮ่งสาระวนหยุ่ง นำเรื่องสึนามิ
เรื่องกัมมันตภาพรังสี ผัดเกิดมีแซมซ้อน
จักสิเฮฮนฮ้อน อนาทรทนโศก
แสนส่วนสิวิโยคย้าย ทะวายรุ่มเรื่องได๋
ขอส่งใจไปซ่อยยู้ ซ่อยซูอีกแรงหนึ่ง
ถึงอยู่ไกลหลายพันลี้ ไมตรีน้อมพร้อมส่งแฮง...
Bookmarks