ใกล้สงกรานต์มาแล้วครับ เร็วปานหมอลำหมู่ หลายคนกะกลับบ้านไปเยี่ยมไปยามญาติพี่น้อง บรรยากาศกะสิกลับมาคึกคักอีกเทือหนึ่ง รถยนต์ส่วนโตเต็มถนนมิตรภาพ ขนของฝากของต้อนไปฝากพ่อแม่พี่น้องบ้านเฮา
ช่วงหน้าเทศกาลทุกปี กะสิเป็นช่วงผจญภัยของ พล พระยาแล ที่สิต้องไปยาดกันซื้อตั๋วรถอยู่หมอชิต บ่ค่อยได้จองปานใด๋ เพราะเหตุว่าการจองตั๋วถูกจำกัดด้วยเงื่อนเวลา กะเลยบ่มัก ว่างยามใด๋กะไป แต่ปัญหาคือบ่มีรถกลับบ้าน
สมัยหมอชิตเก่ายังอยู่ รถโดยสารกะหน่อย หาหม่องยืนกะบ่มี อย่าว่าแต่หม่องนั่งเถาะ ซูมื่อนี่พี่น้องมีรถยนต์ส่วนโตกันหลาย กะเห็นเอิ้นหมู่เอิ้นพวกไปนำ นั่งโจ้เหล้ากันอยู่ในรถ ร้องรำทำเพลงกัน ยามแวะปั้มน้ำมันกะลงไปทาแป้งกัน ซึ่งปีละเทือที่สิมีโอกาสดีจั่งซี่
ทุกปีก่อนสงกรานต์ ทางบ้านแม่เถ่ากะสิตั้งโรงทาน เพราะก่อนช่วงสงกรานต์กะสิเป็นการบวชชีพราหมณ์ของผู้เฒ่าผู้แก่ และวัยรุ่นผู้ที่ใฝ่ในธรรมะ เป็นภาพที่เห็นแล้วปลาบปลื้มครับ
ของฝากผู้เฒ่าผู้แก่ในช่วงเทศกาลสงกรานต์กะสิเป็นสบู่ ยาสีฟัน แป้ง ที่ซื้อจากร้านค้าชุมชนในหมู่บ้าน ลงชื่ออีแม่ เพราะสิได้เงินปันผลพร้อม ดีกว่าไปหาซื้อในตลาด ซื้อแล้วกะแบ่งใส่ถุงอ้อนต้อนแอ้นแต้น เอาไปให้ผู้ที่เฮาเคารพนับถือ สรงน้ำเพิ่น เพิ่นกะหาฝ้ายหาด้ายมาผูกแขนให้อยู่ดีมีแฮง ชุ่มชื่นกายและใจ
ส่วนวัยรุ่นกะเล่นน้ำปะแป้งกันตามถนนหนทาง รถยนต์รถมอเตอร์ไซต์แล่นกันให้ว่อนไปเบิ๊ด ใต้ล่างบ้านแต่ละบ้าน กะตั้งวง ตั้งเครื่องเสียงกินเหล้ายาปลาปิ้งทั้งฟ้อนทั้งเต้นกันเป็นที่สนุกสนาน จักหน่อยกะสิมีรถพยาบาลแล่นผ่านหน้าบ้านเป็นระยะ ๆ ...ตายแน่ ๆ ๆ ๆ
หลายคนกะบ่อยากกลับช่วงหน้าเทศกาล เพราะรถกะหลาย อุบัติเหตุกะบ่อย ยาดกันอยู่กันกิน กะแล้วแต่ควมคิดของไผของมัน แต่ข่อยว่ามันได้บรรยากาศดี ดื่มกินกะแซบ คึกคักดี
ปีนี้เป็นปีพิเศษกว่าทุกปี เพราะเป็นปีที่สิฉลองครบ 7 รอบ ให้อีพ่ออยู่บ้าน ทางพี่น้องตกลงกันว่าสิหาหมอลำกลอนมาลำยามกังเว็นให้เลาฟัง เพราะอีพ่อมักหมอลำกลอน งดเครื่องดื่มมึนเมาทุกประเภท และงดการช่วยทำบุญ หรือการใช้เงินผูกข้อมือ ทุกกรณี
แต่หากพี่น้องมีความประสงค์สิเฮ็ดบุญ หรือสิใช้เงินผูกข้อต่อแขน กะให้เอาเงินไปเสียบใส่ต้นผ้าป่า สินำเงินส่วนนี้บริจาคเข้าเป็นผ้าป่าให้โรงเรียนสหราษฎร์นุเคราะห์ ซึ่งเป็นโรงเรียนประจำหมู่บ้านทุกบาททุกสตางค์ สมทบกับผ้าป่าที่ไปจากกรุงเทพฯ
ขอให้พี่น้องวางแผนการเดินทางให้ดี ๆ ทางลัดทางเลี่ยงที่ออกไปทางม่วงค่อม ชัยบาดาล หรือลำนารายณ์ และออกไปทางชัยภูมิ ออกไปช่องสามหมอกะดีครับ วิวกะงาม แต่บ่คึกคักเท่ากับถนนมิตรภาพ ร้านอาหารสิหน่อยจักหน่อย ถ้ารถบ่ดีมีสิทธิ์ได้กินข้าวลิง
พี่น้องวางแผนช่วงสงกรานต์สิพากันไปไสครับ จั่งใด๋กะขอให้มีความสุขในช่วงปลาย ๆ เดือนมีนาคมจั่งซี่ และช่วงเทศกาลสงกรานต์ที่สิฮอดนี้เด้อครับ เดินทางใกล้ไกลกะให้ปลอดภัยทุกถ้วนหน้าครับ ธุจ้า:,1-
ขอบคุณภาพจาก...หนังสือพิมพ์เดลินิวส์ ครับ
ลิงค์ที่เกี่ยวข้อง http://www.baanmaha.com/community/thread32253.html
Bookmarks