สวัสดีเอื้อย อ้าย พี่น้องบ้านมหาซู่คนจ้า มื้อนี้ได้เวลาปล่อยกระทู้ดองเค็มเนาะจ้า เพราะแนวอยู่แนวกินในกระทู้นี้เป็นช่วงวันหยุดสงกรานต์พอดี
พี่น้องหลายๆ ท่านอาจสิได้เดินทางกลับคืนถิ่นฐานบ้านเกิดเฮาเนาะ แต่ขามป้อมกะเฝ้าเกาะไปตามระเบียบจ้า ลังเทื่อคะเจ้าปันมูลให้ อิอิ
สงกรานต์เกาะสมุยปีนี้ เงียบเหงาคักจ้า เพราะว่าก่อนหน้านั้นกะมีพายุเข้า แล้วกะน้ำท่วมเนาะจ้า ถนนหนทางที่สิเดินทางมาทางภาคใต้กะเสียหาย
แล้วกะเฮ็ดให้การเดินทางลงมาบ่สะดวกปานได๋ นักท่องเที่ยวบ่มีเลยจ้า ขามป้อมเองกะบ่ได้ออกไปเก็บภาพบรรยากาศมาฝากพี่น้องเลย
ย้อนว่า คายากนำกิน โอ๊ะ บ่แม่นจ้า คายากทำความสะอาดออฟฟิศ กับห้องพักจากผลกระทบของพายุเข้า พลังงานเบิดไป กะต้องหาแนวกินจ้าพี่น้อง
น้ำเฮลบลูบอย+โซดา หวานๆ เย็นๆ ซาบซ่า +อ่อมเครื่องในไก่ เมนูล้างตู้เย็นกับวัตถุดิบสำมะปิ
ตกแลงมาเชฟข้าวเหนียวกะหมูปิ้ง เพิ่นมากินข้าวแลงนำ กับเมนูเบาๆ (ตำซั่วเบาหม่องได๋)บ่หนักท้องพานะ แต่กินแล้วจุกอย่างคัก อิอิ
มื้อต่อมาเชฟยากนำแขก บ่ได้มากินนำ กะกินคนเดียวตามปกติ กับเมนูง่ายๆ ซุบหน่อไม้ส้มเฒ่าพ่อ ได้ฤกษ์เปิดไหแล้ว
เพื่อบ่เป็นการแสบท้องหลาย กะทอดหมูกินกับจ้า คำเตือน เมนูนี้อาจทำให้ท่านเกิดอาการแสบหมากโหกได้ ฮ่าๆ
ช่วงบ่ายเชฟโทรมาให้ออกไปกินข้าวนำกันแถวๆ โรงแรมเพิ่น ร้านอิสานตามสั่ง อิอิ เมนูเด็ดของร้านนี้ที่พากันลงมติให้เป็นจานโปรดกะคือ
อ่อมซี่โครงหมูจ้า มักหม่องเพิ่นใส่ผักให้หลายๆ รสชาดจัดจ้าน ซดแล้วโล่งคอดี
มื้อต่อมากระเพราหมูกรอบ@ศูนย์อาหารบิ๊กซี
ตอนบ่ายๆ เชฟมาฮับไปหากินตำหุ่งปลาเผาแถวๆ เฉวง ปลาเผาโตใหญ่คักจ้าเนื้อแน่นดี กินเกือบบ่เบิด
แลงๆ แกงไก่บ้านใส่หน่อไม้ส้มสู่เชฟกินจ้า แซบๆ กับตำหมากหุ่งใส่หมากกอก กินแล้วแสบท้องตาหน่าย
ต้มซุปเปอร์ถ้วยนี้ ส่งการบ้านอ้ายบ่าวยางตลาดนำเด้อจ้า ปิดท้ายกับของหวานแบบบ้านๆ ที่ขาดบ่ได้เลย กล้วยอิออง
หรือกล้วยน้ำว้าที่ต้องมีติดบ้านไว้ตลอดจ้า ของหวานมีประโยชน์ราคาประหยัด อิอิ
ขอบคุณยาวๆ ไปหาศิษย์น้องจ่อยน้อยหลายๆจ้า สำหรับกล่องใส่กระดาษทิชชู่สีหวานๆ ตะฮักๆ
ลูกค้าฝรั่งจอบสิลักของเจ้เมือบ้านหลายเทื่อแล้ว แล้วกะขอสารภาพนำว่า อันๆ กระต่าผักตบชวาที่มานำกัน
ขึ้นราเบิดแล้ว ตะช่วงพายุเข้า เสียดายคัก ขออภัยหลายๆเด้อจ้าที่รักษาไว้บ่ได้ ซื้อมาฝากใหม่แหน่เด้อ อิอิ
ขอบคุณพื้นที่ของบ้านมหาดอทคอม รวมถึงพี่น้องที่แวะเวียนมาในกระทู้จ้า พ้อกันใหม่ป้ายหน้าจ้า
Bookmarks