เฒ่ายาวถืกหมากเสียม...

[หนุ่มหน้าลาว]

ข้าวต้มมัดเอ้ยหล่า น้ำใจนางซ่างงามค่อง
ยอมอภัยให้อ้าย อยากอายบ้านหมู่คน เด้น้อ
อ้ายตั้งแต่มื้อนี้ สิขอแบน เจ้าของออก นางเอ้ย
ย้อนว่าปากอ้ายนี่ร้าย บ่คือบ้านคนอื่นเขา
สิขอเซาเจ็ดมื้อ ไปอบรมเจ้าของปาก ก่อนเด้อ
หยุดผญาไว้ส่ำนี้ ปากดีแล้วจั่งสิมา
ขอให้นงนางหล่า คนดีเจริญยิ่ง เด้อนาง
อ้ายขอสั่งส่ำนี้ อยากอายบ้าน เพิ่นสิหยัน หล่าเอ้ย
ธุจ้าธุจ้าธุจ้า

[ข้าวต้มมัด]

โอน้อ อ้ายหน้าลาวเอ้ย
เจ้าสิไปบวชติอ้าย ไปวัดไหนซ่อยบอกแน่
ไปแน่แน่ติเจ็ดมื่อ คือดนแท้น้องคิดนำ
อันว่าคำที่นางเคยเว้าให้ เศร้าหมองน้องได้ลบ
เพื่อกลบแผลในใจอ้าย ชายนี้ให้ส่วงเซา
เอาน้ำเย็นรินให้เจ้า ดื่มลงไปสาน้อพี่
มาเว้าความดีดี สิ่งบ่ดีให้ลบล้าง ส่างมันเถาะอย่าถือซา
ปรารถณาเป็นพี่น้อง ได้มาค้องเอาแขนพี่
ฝ้ายผูกแขนที่ผูกนี้ คือมิตรแท้สิบ่ลืม นั้นแหล่ว

[พลายแก้ว]

บทผญามีหลายบั้น แบ่งปันออกหลายบ่อน
ผญาสอนภาษิตเสี้ยม เฮียมเจ้าได้กล่าวแปลง
ยอแสดงแถลงอ้าง วาทวางปนความม่วน
อ่านแล้วได้หัวขวัญ มาจาม่วนมาดแม้ง แถลงเว้ากล่าวคือ
อย่าสุถือเด้อคำเว้า เอาความม่วนมาเป็นฐาน
อักษรสาร์นหว่านลง เจตน์จำนงค์ยังคงไว้
สืบต่อไปให้คงหมั่น หวังสร้างสรรค์เสริมต่อ
เก็บเอาอันแข่แหล่ ต่อกับอันข่อหล่อ พอได้ลื่นหมื่นม่อนมือ
บางบทซงขี้ดื้อ อย่าสุถือเถอะอัญญา
ย่อนศึกษามาบ่หลาย คำเว้าล่ายไร้สารบ้าง
ขอให้ทางท่านผู้รู้ วอนอิดูหมู่ผมแน่
หม่องบ่ถืกให้ดูแล มาซ่อยแก้เรียงร้อย สาระหน่อยให้แต่งเติม..

[หนุ่มหน้าลาว]

ความฮู้มีส่ำนี้ ขอเจียมตน บ่โอ้อวด
ไผสิว่าโง่เง่า ปัญญาด้อย กะซ่างเขา
โตของเฮาเพียงใจตั้ง หวังทำ ในครองฮีต
รักษาธรรม เนียมแต่เค้า ให้คงมั่น สืบไป
ขอรักษาเอาไว้ฮีตเก่า ครองหลัง
อยู่ในความครองคน นบประนม จิตตั้ง
หวังในใจของข่อย คงมีแฮงสู้ต่อ ท่อนั้น
สองมือ คาราวะต่อ แฟนผญาทุกท่าน สงสารข้า ผุพลอย แหน่เด้อ

ธุจ้าธุจ้าธุจ้า

[หนุ่มหน้าลาว]

ขอบคุณเด้อ เสี่ยวแก้ว ที่ซ่อย กำลังใจ
อ่านผญาของโต จนน้ำตา เฮามันย้อย
คือดั่งฮอยโบราณเว้า เห็นเพื่อนจริง ตอนทุกข์ยาก
หากมีเพื่อน จริงจั่งเจ้า โตเฮานี้ บ่หวั่นไหว ดอกเสี่ยวเอ้ย
ตั้งใจเดินไปข้างหน้า หาวิชา ให้ฮู้ครอบ
เก็บเทื่อเล็กเทื่อน้อย ตุนไว้ ใส่ถง
ลงว่าเป็นชายแล้ว คันใจเบา เขาว่าถ่อย เนาะเสี่ยวเนาะ
สู้มันไปข้างหน้า ชีวาม้วย อย่าห่วงมัน เสี่ยวเอ้ย...
:l-:l-:l-