ประนมหัตถ์นมัสน้อม ค้อมกายก้มกราบ
ศิโรราบแทบเท้า พระคุณเจ้าแม่กระผม
สิ่งได๋ลูกได้ล่วงม้ม ก้าวก่ายเกินการณ์
โปรดประทานการอภัย ให้ลูกชายแน่เด้อจ้า..
ขอสมาด้วยขันน้ำ ลอยมาลัยถวายส่ง
ประพรมสรงแม่เจ้า ขอเฮียมเฒ่าให้อยู่เย็น
ขอให้เป็นโพธิ์ไทรตุ้ม คลุมเกล้าเกศกระหม่อม
ขอสังฮอมคุณเลิศล้ำ ด้วยสายน้ำเทิดพระคุณ...แม่เอ้ย..
...มืออบอุนหนุนสองแก้ม แม่แนมตาแล้วจาต่อ
ว่าแม่ขอเชิญเทพไท้ พระรัตนตรัยสิ่งศักดิ์สิทธ์
จงปกปิดคุ้มภัย ให้ลูกชายของแม่
ให้มีแต่สุขีหมั่น ก้าวผ่านวันที่ล้าหล่อย
แม่ยังคอยอยู่ข้างๆ บ่ลาร้างห่างสะเทิน
ปากแม่กกกล่าวเอิ้น อัญเชิญขวัญมาโฮม
มือกระโจมแขนลูกชาย ฝ้ายด้ายขาวมาเคียนค้อง
มาเด้อขวัญเอ้ย...ขออย่ามีกรรมต้อง โพยภัยสังอย่าบังเบียด
แนวเสนียดให้คลาดแคล้ว ลูกชายแก้วแม่เด้อ
ฮักเสมอเด้อลูกหล่า หาเวลาพักแน่
นับมื้อแม่แฮ่งตะเฒ่า อยากให้เจ้าอยู่สบาย
ดูแลกายใจโตบ้าง ในบางอย่างกะปล่อยเสีย
ฟ้าวหาเมียอย่าอยู่นาน แม่อยากอุ้มหลานแล้วเด้อลูก พะนะ..
พอแต่ผูกฝ้ายให้ มาขานไขบ่คือเก่า แท้น้อ
กราบลงตรงแทบเท้า จักสิเว้าว่าจั่งได๋..แม่เอ้ย..
Bookmarks