หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 17

แจ้ง...งานแต่ง ดอกมันปลา เด้อพี่น้อง

  1. #1
    ร่วมถ่ายทอดความรู้สู่สังคม สัญลักษณ์ของ หนุ่มหน้าลาว
    วันที่สมัคร
    Jan 2010
    ที่อยู่
    สระบุรี
    กระทู้
    449

    แจ้ง...งานแต่ง ดอกมันปลา เด้อพี่น้อง

    จูงเอาแขนนารถน้อง คนงาม ของอ้ายบ่าว
    ไปกราบลงแทบเท้า มารดาข่อย แล้วกล่าวจา
    ว่าแม่เอ้ย..ลูกนี้น่า สิขอเลือก เอาญิง
    เอามาเป็นภรรยา อยู่ครองสองซ้อน
    แม่เอ้ยกรูณาถ่อน ให้เอานาง มาเป็นลูกสะใภ้ย่า แหน่เด้อ
    ดอกมันปลาผู้ฮู้ สิขันเลี้ยง แม่ย่าเอง
    เสียงเลาเค็งเค็งเว้า ว่าเอาตี้ สะใภ้ย่า
    สิอาสารับเลี้ยง ยายเฒ่า บาดแก่คิง
    เห็นญิงหลายคนแล้ว มาเฮือน ของย่า
    บ่เป็นตาสะแตกย้อน มีแต่โอ้ อวดทรง
    บาดย่าเหลียวเบิ่งหล่า ถืกซาตา ไคยุดอก
    บักตาปลอกลูกแม่นี้ ซ่างหาพ้อ ผู้จั่งนาง แท้หือ
    ...กลับมาทางฝ่ายเจ้า เฒ่าพ่อ ดอกมันปลา
    ทั้งมารดา เลือกฤกษ์ยาม สวัสดิ์รุ่ง
    จูงแขนนางมาก้ม กราบพ่อแม่ สองตายาย
    ขอบูชาคุณความดี ที่เบิ่งแงง นางน้อง
    จนว่าโตของหล่า ดอกมันปลา ได้เติบใหญ่
    ย้อนพ่อแม่ฮักมอบให้ เป็นคนฮู้ ผู้ดี
    แต่มาฮอดมื้อนี้ สิมีคู่เคียงสอง แล้วแม่เอ้ย
    ลูกสิอาสารับ เลี้ยงดู พระนางน้อง
    กับสิอาสาเลี้ยง สองตายาย พ่อกับแม่
    ซ่อยกันก่อสืบสร้าง ดูแลท่าน จนบ่ยัง พุ้นล่ะ
    น้ำตาพัง ฟังคำเว้า สองตายาย เพิ่นสอนสั่ง
    รับน้ำสังข์ฟังแม่เว้า โตเจ้า ให้ฮ่ำฮอน เอาเด้อ
    แม่นี้อดส่าห์เลี้ยง ซิ้นกี่ ปลาเผา
    บ่เคยเอามือตบ ต่อยตี พอน้อย
    มีแต่ออย ออยเว้า ปลอบประโลม ยามนางเคียด
    มื้อนี้ เจ้าหากมีคู่แล้ว อย่าลืมถิ่ม เฒ่าแม่ยาย เด้อ
    คันเจ้ามีผัวแล้ว แลงงาย ให้รีบแต่ง
    อย่ามัวเลาะ อ้อมบ้าน โบราณเว้า ว่าบ่ดี
    ยามกินข้าว ให้ผัวแพง กินก่อน
    ได้สามคำก่อนแล้ว คำแพงหล่า จั่งค่อยกิน
    ให้เจ้ายินดีด้วย นำสามี บาดเข้าบ่อน
    หักดอกไม้มาไหว้ บาทาท้าว จั่งค่อยนอน เด้อนาง
    ให้เจ้าลุกแต่เช้า เตรียมตักบาตร จังหัน
    อย่ามัวนอนหลับใหล ขี้เซา อยากอายบ้าน
    ขอให้นงคราญหล่า ดอกมันปลา ลูกสาวแม่
    ปฏิบัติให้คล่อง อย่าขายหน้า อีแม่เฮียม เด้อนาง
    ...ฝ่ายเฒ่าพ่อกะเว้าอย่าผิดฮีต โบราณ เด้อคำ
    สองคนสู ผัวเมีย ให้อยู่กัน จนเฒ่า
    อย่าสุมีคำเว้า กูมึงอย่าได้ว่า เด้อหล่า
    มีแต่ข่อยและเจ้า ตะผองเท่า ชั่วชีวัง
    อย่าไปฟังความนอก ของคน ที่เขากล่าว
    บ่ให้เอา ความนอกบ้าน มาเข้า ให้อั่งเฮือน
    อย่าเอาความในบ้าน ออกไปขาน ไขต่อ คนใด๋แหล้ว
    ซุมคนอยู่นอกบ้าน เขาสิเว้า แหย่หยัน
    ให้รักษาเอาไว้ ไฟใน อย่านำนอก
    พ่อขอบอกกำชับไว้ ลูกสาวพ่อ ให้เชื่อคำ แหน่เด้อ
    ส่วนว่าเจ้า บักเถิกใหญ่ มาเป็นเขย
    อย่าสะเบยใจหลาย ว่าโต มีเมียซ้อน
    บ่แม่นนอนสบายเนื้อ ตาเว็นเพล กะยังกรน อยู่ซู้ซู่
    ให้เจ้าลุกแต่เช้า ฮู้จักเวียก หว่างสิทำ
    อย่าสุไปนำเหล้า นำสุรา ยาฝิ่น
    กินแล้วตา หยืดย้าวย้าว เบิ่งตี้บ้า กะบ่ปาน
    อย่าเป็นคนเกียจคร้าน ให้เจ้าหมั่น ขยันเพียร
    ให้เจ้าเก็บออมเอา ทรัพย์สิน เพียรสร้าง
    วางหนทางเจ้าของไว้ บาดต่อไป ลูกสิได้ เอิ้นอีพ่อ
    ฮีบฟ้าวก่อ ฟ้าวสร้าง เฮือนเหย้า ให้ยืนคง
    อย่าไปหลงนำส้น กกขาขาว ส้นอีหย่อง
    บ่แม่นคลองฮีตเค้า โตเจ้ากะอย่าเหลิง ท้าวเอ้ย
    ...น้ำตาโห่งเปิ้งเปิ้ง พ่อแม่ เพิ่นมาจา
    ระลึกถึงบุญคุณ ผู้เพิ่นกรูณาเลี้ยง
    เอียงมาทางแฟนอ้าย ดอกมันปลา น้องกะน้ำตาหลั่ง
    ฟังอีพ่ออีแม่เว้า เข้าใจซึ้ง แล้วจื่อจำ
    พาเอาคำแพงอ้าย ย้ายเข้าสู่ เฮือนหอ
    บ่อยากรอให้มันโดน สิรับขวัญ นางน้อง
    อ้ายเลยปิดประตูห้อง ลงกลอน จบแจบ
    อ้ายแอบจูบนารถน้อง ของอ้าย บ่าวพี่ซาย
    เจ้านั้นอายจนม้วน บ่สบตา หลบหลีก
    แต่กะเอียงแก้มให้ พี่ซายได้ ซื่นซม
    อ้ายเลยโจมเอ้าหล่า ดอกมันปลา ขึ้นเทียมผ่าง
    สองเฮานอนแนบข้าง จนแจ้ง สว่างตา
    ...มือคัวหานางตอนแจ้ง ไปไสน้อ แฟนพี่
    หรือแม่นน้องไปลี้ อยากอายอ้าย บ่ให้เห็น
    หรือแม่นนางไปเล่น นำหลานอยู่ใต้ล่าง
    เอิ้นหานางแล้วกะแล้ว ฮ้วย ฮ่วย แม่นข่อยฝัน ตั้วนี่...
    แจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้อง
    แจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้อง(โอ้ย555 ฝัน ฝันนนน ฝันนนนนนนนนน ห่าเมิงเอ็ย 5555 ว่าแม่นแม่นอีหลี555)แจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้องแจ้ง...งานแต่ง ดอกมันปลา เด้อพี่น้อง

  2. #2
    เจ้าหน้าที่ประชาสัมพันธ์ สัญลักษณ์ของ วัฒนชัย หาริโร
    วันที่สมัคร
    Jan 2010
    กระทู้
    884
    น่าสิแม่นอิหลีชะเนาะสิได้ชดก้อยขมๆ55555555

  3. #3
    Maximum learning
    ศิลปิน นักเขียน
    สัญลักษณ์ของ khonsurin
    วันที่สมัคร
    Apr 2008
    ที่อยู่
    ท่าตูม สุรินทร์
    กระทู้
    9,605
    บล็อก
    197
    5555555555555 คิดว่าจริง ว่าจะมาดีใจด้วยน๊า กลายเป็นฝันไปน้อ....55555

  4. #4
    แบ่งปันความรู้และประสบการณ์
    วันที่สมัคร
    Feb 2009
    ที่อยู่
    สวิส....พะนะ
    กระทู้
    608
    เหอๆๆๆมะฝันคักฝันแนแท้...ทางผู้อ่านล่ะวาตะแม่นเรื่องอิหลี......โอ๊ยเนาะ

  5. #5
    สุดยอดจ้าผญ๋าบทนี้ ครบทุกรสสาระดีเยี่ยม ให้คะแนนเต็มสิบจ้า ซวดๆๆ

  6. #6
    มิสบ้านมหา 2010
    ศิลปิน นักเขียน
    สัญลักษณ์ของ เขมราฐ
    วันที่สมัคร
    Sep 2008
    ที่อยู่
    กลางท่งเมืองเขมฯ
    กระทู้
    2,078
    แล่นคาดลาดเข้ามาว่า ยินดีนำน้องสาวหล่า ฝันพ่ะน่ะว่า...555

  7. #7
    ร่วมถ่ายทอดความรู้สู่สังคม
    ช่างภาพอิสระ
    สัญลักษณ์ของ ดอกมันปลา
    วันที่สมัคร
    Sep 2008
    ที่อยู่
    Roi Et City
    กระทู้
    318
    ออย.....เป็นแค่ความฝันเด้อจ้าพี่น้อง
    เรื่องจริงนั้นอีกโดนยุจ้า...คนเขียนกะดายน้อจ้า55555555555555

  8. #8
    แบ่งปันความรู้และประสบการณ์ สัญลักษณ์ของ มะเหมี่ยว
    วันที่สมัคร
    Jan 2010
    ที่อยู่
    สุดประจิมที่ริมเมย
    กระทู้
    958
    ขอลาบงานแต่ง ขมตายบ่เอาเรื่องจักถ้วยแนจ้าๆๆๆๆๆๆๆๆๆ คริ คริ คริ

  9. #9
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,986
    บล็อก
    1
    ฝันฝันนี่บ่เป็นตาหน่าเชื่อ..เนาะ..หืยส์
    นอนกับเมียแท้แท้ยังฝันหว่าได้กอดกิ๊ก..5555
    ผุ้นแหล่วเฒ่า(หนุ่มหน้าลาว)ฝันกลางเว็นหรือกลางคืนน้อ
    จงฝัันต่อไปแล้วสักวันความฝันจะเป็นความจริง555
    :,1-:,1-:,1-

  10. #10
    55555555555 ฝันคักฝันแน่ ฝันอยู่ฝันกินเนาะเพื่อน ฝันยาวโพดดอกอ่านจนตาลายเว้ย ฮึ..555555

    ฝันอยู่ฝันกินฮ้าย เป็นตาหน่ายพวกหมู่
    ฝันเป็นตู๋เป็นตะ เป็นขะบวนม่วนแม้ง
    ฝันว่าแต่งงานกับหล่า ดอกมันปลาพุ้นเด่ะเพิ่น
    กะโพดเกินไปดอกเจ้า ค่าดองเว้าล่ะไปน้อ
    มาข้ามขั้นคักกะด้อ อยู่ลูกปืนสั่นบ๊อจั่งกล้ากล่าว
    ทางพ่อเฒ่าเสือเด่ะท่าน มาอ่านพ้อเพิ่นสิขิว..เด่ะ
    ย่านเพิ่นซิวสอยร่วง ย่อนว่าหวงลูกสาวคัก
    คันว่ามักคักแท้ เอาแก่เฒ่ามาเว้าโอม สาก่อน
    นี่อิหยัง...ถิ่มหัวนอนแล้วฝันฮ้าง ฝันเห็นทางพ่อเฒ่าบ่
    ยืนเบิ่งอยู่เด้อพ่อ ฝันต่อแมะคันกล้า หรือคิดว่า..สิอยู่ปืน...อิอิ


    พ่อเฒ่าเสือเพิ่นบอกมาเด้ออ้าย...555555