เหลือโตน ห้องแชทบ้านมหา

[หนุ่มหน้าลาว]

สงสารในใจข่อย ในเหตุการณ์ที่มันเกิด
ห้องแชทต้องมาฮ้าง ย้อนคนสร้างสิ่งบ่ดี
คึดฮอดพวกน้องพี่ ที่เคยอยู่เคยคุย
เคยสนุกเฮฮา ม่วนแซวคลายกลุ้ม
มรสุมขณะนี้ บ้านมหามีคู่แข่ง
หลายคนก่อประโยชน์สร้าง หวังผลได้ซื่อเสียง
วอนผู้เป็นเจ้าของบ้าน เร่งมองหาตรวจสอบ
อาจสิมีหนอนบ่อนไส้ ระวังไว้ให้ถี่ใจ
แนวคนสุมื้อนี้ สิไว้ใจกะบ่อได้ มีแต่โลภ โทโสหลง
คงยังมีอิจฉา ริษยาแฮงกล้า
ทำดีอยู่ต่อหน้า แต่ทางหลัง ตะแยงถั่ง
บ่ระวังอาจเดือดฮ้อน มีคนป้ายใส่ความ
อย่าหลวมตัวเข้าไปใกล้ คนจังไรสิขอบอก
อเสวนา จะพาละนัง พระเพิ่นเทศน์บอกไว้ ใจเจ้าให้ฮิ่นตรอง
แค่นี้ล่ะพี่น้อง สะกิดแหน่ ออกความเห็น
จักสิเป็นหรือบ่เป็น แล้วแต่ไผสิเห็นด้วย
แต่ว่าคนสวยอ้าย ขอจงหมายเชื่อใจพี่ แหน่เด้อ
สิ้นปีนี้คันฝนดี สิขายข้าวอยู่เล้า ไปขอน้องแต่งงาน หล่าเอ้ย
55555555 เอิ้ก เกี่ยวกันบ่นี่

[บ่าวสาเกตุนคร]

:l-สดยอดครับนับถือ พรสวรรค์พรแสวงอีหลีตั่วนี้เนาะ

[พล พระยาแล]

ขึ้นชื่อว่าหนอนบ่อนไส้ ซางจังไฮเกลือเป็นหนอน บ่ออนซอนปานใด๋พวกจังไฮซุมหมู่นี่
เอาความดีซอยยู้ ซอยซูอย่าย่านลืน ไผเฮ็ดผิดให้ซอยแก้ ไขต้องส่องกัน นั่นแหลว

[ไก่น้อย]

ซวดๆๆๆเด้อหล่า
ผญาเจ้าสางมาม่วน
อยากชวนบ่าวหน้าลาว
เข้าไปเล่นส่อยกันแหงง
บ้านมหาเฮาบ่แล้ง
ยังมีแฮงให้เฮาส่อย
คนละเล็ก คนละน้อย
หั่งสิถอยดอกคนเถื่อน
ส่งคำเตือนไปบอกเจ้า
สุมผุเฒ่ายุคไอที
แนวบ่ดีให้ละเว้น
อย่าสะเล่นหม่องบ่ควร สั่นละล๊า....

[พลายแก้ว]

หากหลายคนกะหลายยาก หลายปากความจา
หลายปัญหาหลายหัวใจ อั่งภายในบ้าน
ความต้องการบ่มีสิ้น เป็นมลทินพร้อยด่าง
บางคนเอาจั่งสั้น บางอันเอาจั่งซี้ บ่มีมื้อแม่นสิพอ
คิดหยังหลายกะด้อ สอพออยู่ค่อยอยู่ไป
หากินซามตายไผ๋มัน ด้ามดั่งกันเหมิดสิ้น
แล้วแต่ซินสมสร้าง บุพเพปางหลังเก่า
อย่าติเขาว่าขี้ล่าย เพียงแต่บ่ได้คิดคือ
อย่าไปถือสาถ่อน บ่อนคาใจหทัยหม่น
นี่แหละ..เอิ้นว่าคน มีปะปนเปบ้าง ดีชั่วบ้างกะส่างมัน..พี่น้องเอ้ย...

...อมิตาพุทธ... เฮ้อ....

[ข้าวต้มมัด]

ปัญหามีอยู่แล้ว อย่าเอาไฟไปสุมตื่ม
ต่างคนหากต่างซึมอยู่แล้ว บ๊อได้แซทเพิ่นสิสูน นั้นแหล่ว


มาแจมนำค่ะ