หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 12

...เดือนแปดเข้า เนาว์พรรษา...

  1. #1

    ...เดือนแปดเข้า เนาว์พรรษา...

    อัฐมาสระยาตรเยื้อน อสุนีเตือนฝนเร่ง
    เสียงเค็ง เค็ง ครึ้นฮ้อง ดังก้องกล่อมพะโยม
    วายุโหมฮานไม้ ไพรพะนอมโน้มเหนี่ยว
    ธัญญาเขียวอั้วอ้ม ภิรมย์รื่นซื่นขจี
    สกุณี-กุณาซ้น สาละวนจัดเจียด
    ไพเพนียดสอดซ้อน คอนไม้ก่ายฮัง
    เหล่าพระสังโฆเจ้า จำเนาว์เข้าพรรษา
    อ่านตำราสิกขาเพียร เฮียนพระธรรมคัมภีร์ก้อม
    อดสังฮอมยอมหยุดยั้ง เว้นหว่างทางจาริก
    ซุมหมู่พิกสาชาติเชื้อ ยามฝนเอื้อปิ้นป่งแหนง
    ซุมมวลแมงมดน้อย ทยอยเทียวจากทางลุ่ม
    อุทกสุมสาดท่วม พอได้ข่วมม้มหว่างมรณ์....



    อัฐมาส(เดือนแปด) ระยาตรเยื้อน(เคลื่อน,เลื่อน) อสุนี(สายฟ้า) พะโยม(ท้องฟ้า) วายุ(ลม) ไพรพะนอม(ป่าไม้) ธัญญา(ต้นข้าว) สกุณี-กุณา(นก) ไพเพนียด(ไพหญ้าคา,เศษใบหญ้า) สิกขา(ศึกษา) จาริก(การเดินทาง) พิกสาชาติ(พืช) อุทก(น้ำ)


    ธุจ้าธุจ้าธุจ้า
    แก้ไขครั้งสุดท้ายโดย พลายแก้ว; 15-07-2011 at 08:14.

  2. #2
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,362
    บล็อก
    23
    เหว๋ย มะแต่งคล้องดีแท่ะบ่าวพลายแก้ว ว่าแม่นสึกมาใหม่ๆแม่ะ เอิ้กๆ..

  3. #3
    ฮ่าๆๆ หึยยย แม่นอิหลีล่ะครับ หัวกะสึกมาได้เดือนกว่าๆ ตอนบวชเณรบวชตั้ง 6 พรรษา บาดตอนบวชพระ บวชได้ 10 มื้อกะยังว่า ฮ่าๆๆๆ...ส่ำนี้กะเอาเถาะเนาะเพิ่น..

  4. #4
    อนุโมทนาสาธุการ กาลพรรษาเข้ามาใหม่
    สิเริ่มไตรสิขามาตรย์ บาทบ่เยื่องแห่งสงฆ์
    ดำรงค์ภิพพื้นแผ่นฟ้า พิรุณมาข้าวนาป่ง
    เขียวทั่วท่ง กบเขียดฮ้อง ท้องฟ้าคลื้มคึ่มก่ำฝน
    ลมพัดไหว ใบไม้โหย่น พริกเทิ่งโพนเริ่มจูมจี
    ทั้งผักหมี่แลหนอไม้ ออกมาได้ให้คนกิน
    หมากแตงโมเต่งเต็มดิน พร้อมข้าวโพดออกฝักอ่อน
    คิดออนซอนปลาในหนอง พองน้ำหลากไหลท่วม ถิ่นหนองสา
    คนิงมาอยากกลับบ้าน คืนอีสานบ้านหม่องอยู่
    ไปย่างดูป่าอ้อย แม่ของข่อยปลูกไว้นา เด้น้อ

  5. #5
    การใช้คำใช้ภาษานิคือสุดยอดแท้น้อ ญาอ้าย ฝากเนื้อฝากโตเป็นศิษย์แนเด้อคับผม

  6. #6
    ป๊าดดดดด ญาอ้ายฮับข้าน้อยเป็นศิษย์แนคับ คั้นบ่อฮับเป็นศิษย์ ข่อยสินั่งกินเบียร์ให้เมาซุมื้อเลย ฮ่าๆๆๆๆๆๆ

  7. #7
    [COLOR="DarkGreen"]ขอขอบคุณ ข้าวต้มมัด เพื่อนรัก ที่มาแจม ม่วนคักครับผญาเพิ่น ติดตามอ่านสุบทเด้อเพื่อน..

    หนุ่มน้ำโขง1... mahadet...
    -
    ขอบคุณมากครับที่ชื่นชอบผลงาน และกำลังใจที่มีมาให้ตลอด เป็นแรงบันดาลใจให้ขะน้อย มีกำลังใจในการแต่งต่อไป ขอบคุณอีกครั้ง ขอรับ... ส่วนที่ว่าจะมาขอเป็นศิษย์นั้น ขะน้อยต้องอนุญาตบอกว่า ขะน้อยบ่ได้ปานนั้นดอกขอรับ ทุกบทที่แต่ง ก็แค่จินตนาการ แต่งตามอารมณ์ ตามกะเยิม จับพลัดจับพลูมาใส่กันให้มันค่องสื่อๆ สำหรับท่านที่เป็นปราชญ์จริงๆ มีความรู้แตกฉานและรู้ลึกซึ้งถึงผญา แห่งบ้านมหาของเฮานั้น ขอยกให้ท่าน อาจารย์ ศรีสะท้าน ปราชญ์อีสาน กะแล้วกันเนาะขอรับ.. ส่วนขะน้อยคันว่าตามบทผญา อักขระ เนื้อหา วรรณยุกต์ วรรณกรรม ความวิจิตร และความรู้เป็นแค่รุ่นหลาน รุ่นเหลนของเพิ่น ท่อนั้นละครับ....ด้วยความเคารพ...ขอรับกระผม..[/
    COLOR]

  8. #8
    ปาดดดดดดดแม่นไผ๋คือมาแต่งผญาม่วนแท้น้อ

  9. #9
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,975
    อ่านได้เข้าใจนำม่วนหลายจ้าหลานพลายแก้วจ๋า แต่ว่า ป้าแต่งไปนำบอเป็น อิอิอิ คือว่าคนปึก

  10. #10
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    ม่วนแท้นอนอหล้า คำผญาอันเจ้ากล่าว
    หลงลืมคราวคีดฮอดบ้าน สถานกว้างแก่วอีสาน
    วัสสากาลพรรษายั้ง มูลมังสิหมุนเปลี่ยน บ่นอ
    บุญทอดเทียนวัดนั้น โฮมจังหันวัดนี้-ยังคือกี้เก่าหลัง บ่เด
    คันแม่นคือแต่ครั้ง-อดีตเก่าคลองเดิม ให้ส่งเสริมฮักษา-สร้างซาเอาไว้
    อย่าซิไลลาถิ่ม-มูลเดิมเซื้อเก่า ฮีตคลองดี-ผู้เฒ่าเพิ่นพาเค้า แต่งตาม ท่านเอย