เมนูหมกพุงปลาปึ่ง
มื้อนี่กลับมาจาก กาฬสินธุ์ ผ่านมาทางสารคาม ข่ามลำน้ำชีมา(บ้านดินดำ) เลยจอดรถแอบข่างถนนไปฝั่งตรงข่ามสิมีตลาดน้อยๆ มักสิมีปลาจากลำน้ำชีมาขายซวงบ่ายๆ เลยได่พุงปลาปึ่งมาหมกกินแลงยูโคราช มาครับพี่น้องกินหมกพุงปลาปึ่งนำกานนนนนน
พุงปลาปึ่งจากตลาดบ้านดินดำ 50บาท ณ.มหาสารคาม
จัดการล้างทำควมสะอาดแล้วหั่นเป็นต่อนพอดีคำ
เครื่องปรุงบ้านเฮา เกลือ ข่า หัวซิงไค ใบมะกูด กระเทียม พริกแห่งหรือพริกสดกะได่ตำจักหน่อย(บ่ต้องตำละเอียด)
เทลงใส่หม่อ พร้อมพุงปลาปึ่ง เติมน้ำปลาแดกลงหน่อย ใส่ผงนัวลงนำ ต้นหอมและผักชีลาว กับผักอีตูนำ พร้อมลูกโดด(พริกสด) คนให่เข่ากัน
จัดการห่อด้วยใบตองขนาดตามเหมาะสม
ห่อได่สามหมกครับ
เหล็กปิ้งวางเทิงเตาถ่าน จัดการปิ้งให่สุกจนใบตองไหม่ โอ้ยหอมเต๋ดังฮวยๆ หิวๆๆๆๆๆๆ
สุกแล้วเปิดใบตองออก โบ้ยพี่น้องหอมกลิ่นผักอีตูแฮง มาๆๆเอาเข่าเหนียวมาจ้ำ มาอาวมาหยับเอากันแนมาจ้ำนำกัน แซบบบบบ....
เมนูเสริม ลาบปลาโจก ปลาลำน้ำชีคือกัน
เอาเนื้อปลาโจกมาฟักลาบ ที่เหลือติดก้างกับหัวกะต้มซดน้ำนำ...
หมกพุงปลาปึ่งเทใส่จานพร้อมลุยครับผม....เซิญญญญญญ
จ้ำคำใหญ่ๆๆเลยอาว งานนี่ขาดผักกินกับลาบหาบ่ทันเฮือนได๋มีผักกาดฮินถือมากินกับลาบปลานำแนเด้อ....
ขอขอบคุณพื้นที่ บ้านมหา ดอทคอม ที่ให่นำเสนอ หมกพุงปลาปึ่ง+ลาบปลาโจก
Bookmarks