หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 15

นิทานธรรม..ประวัติบุญข้าวสาก..

  1. #1

    นิทานธรรม..ประวัติบุญข้าวสาก..

    นิทานธรรม..ประวัติบุญข้าวสาก..

    ขอสาธกยกกลอนซี้ ประเพณีฮีตเก่า
    ถึงเรื่องราวตั้งแต่เค้า สำเนาคู่ถิ่นอีสาน
    เป็นตำนานแต่กาลพุ้น ประวัติบุญกลางเดือนสิบ
    ขอยกหยิบนิทานธรรม น้อมนำมาเผยแก้
    พอได้แผ่ให้โลกรู้ ตามฮูที่เฮียนอ่าน
    เป็นหลักฐานตามจารีต ฮีตเค้าแต่เก่าหลัง
    ขออภิวาทะตั้ง ยังคุณพระไตรรัตน์
    พรพิพัฒน์ปกเกศเกล้า กวมกุ้มแผ่ผาย
    ยอมือนบนอบไหว้ ปิตุเรศมารดา
    ทั้งครูบาอาจารย์ โปรดประทานป่องอ้อ
    แม่นติดขัดในข้อ ขอให้มีหม่องแหว่
    ขอให้แลเห็นช่อง ขอให้มองเห็นส้น บาดยามด้นดั้นผญา..สั่นแหล่ว....



    บัดนี้...สิได้พรรณนาเรื่อง ที่เล่าขานนานมา
    มีบุตรากุฎุมพี บิดาตายวายชนม์แล้ว
    เหลือแต่แม่มิ่งแก้ว กวมกุ้มเกศกระหม่อม
    ผู้ถนอมกล่อมตุ้ม ออยอุ้มให้ใหญ่มา
    คราบุตราชันสาถ้วน สมควรสมรสแต่ง
    แม่จัดแจงแต่งลูกใภ้ หวังมาให้แม่นคู่เฮียม
    ฐานะเทียมทงท้าว สวยสาวดรุณแรก
    บ่ผิดแผกล่วงล้ำ สองก้ำพร่ำเสมอ
    แต่..ทุกคนเด้อในโลกนี้ บ่ห่อนมีครบทุกสิ่ง
    ความเป็นจริงมีอิงอ้าง เขินขาดบ้างบ่ต่างกัน
    ภรรยาท้าวนั้น เกิดเป็นหมันบ่มีบุตร
    สิสิ้นสุดสูญสืบสาย จั่งได้หมายหญิงใหม่ซ้อน
    พอได้ซอนเลยหลงส่าว ป๋าเมียเก่าให้เหงาจิต
    นางเลยคิดริษยา พร่ำพรรณนาน้ำตาย้อย.....

    “โอ้..พี่เอ้ย..น้องนี้คอยคองถ่า ภัสดาบ่มาแหว่
    ไปหลงแซ่ซมเมียน้อย ปล่อยให้น้องนี้นั่งเหงา
    ลืมเมียกกเมียเค้า ไปหลงสาวขึ้นใหม่
    ส่างอ่วยใจให้คะเจ้า ให้สาวเฒ่านี้นั่งซึม
    เหมิดซากฮักอ้ายบ่ปลื้ม ซ้ำมาตื่มให้ใจเจ็บ
    คือดั่งเหน็บหนามแทง ถั่งในมะโนเนื้อ
    คอยเศษเหลือฮักจากอ้าย ใจดวงเดียวมาปันแบ่ง
    เจ็บปวดแฮงอิดอ่อนล้า พอปานฟ้าผ่าสมอง
    เมื่อสุดทนจำเป็นต้อง หาป่องสนองตอบ
    ลืมผิดชอบชั่วฮ้าย กำเนิดนางมารร้าย ณ บัดนาว..ฮ่าๆๆๆ
    เฮานี้เป็นเมียเค้า สิเอาอุบายมาล้ออ่อย
    กำจัดนางเมียน้อย ให้มอดม้อยมรณา..ก่อนแหล่ว..”

    พอแต่ได้ว่าแล้ว เลยลงจากเฮือนตน
    หยิบยาฝนฟ้าวด่วนหา เฮือนภรรยาผู้เป็นน้อย
    ทำเป็นสอยวอยหน้า จ๊ะจ๋าอ้อยอิ่น
    “แม่นอยู่กินสบายบ้าง หรือนางหล่าขาดเขิน
    พี่ดุ่งเดินมาหาน้อง ด้วยใจจ่องจำนงหมาย นางเอ้ย..
    เฮาฮ่วมชายคนเดียวกัน สร้างสัมพันธ์ไมตรีไว้
    คันมื้อได๋นางหล่า ถือครรภาให้บอกพี่
    มียาดีสิให้น้อง รับรองเรื่องสรรพคุณ
    เป็นยาคูณควรค้ำ บำรุงคิงบ่ให้หล่า
    บำรุง-ภา เพียบพร้อม ถนอมตุ้มสู่ขนาน
    ยามหญิงมานท้องโย้ ความโสภาสิล้าหล่อย
    ความงามถอยถดเข้า เอายานี้เข้าซ่อยซู
    เจ้านั้นผู้งามเพี้ยง เพียงสาวสวรรค์แต่ง
    ให้เจ้าแพงความงามไว้ อย่าสุให้หล่าถอย..เด้อนางเด้อ”..

    ผู้ข้าฝอยมาฮอดบั้น ภรรยาหลวงมาล่ออ่อย
    ยาแท้งลูกให้เมียน้อย สำออยเอื้อนเอ่ยความ
    เป็นไปตามกรรมสร้าง เมียน้อยนางบ่ฮู้เหลี่ยม
    บ่ได้เตรียมท่าต่อสู้ หวนฮุ้ฮ่อมอุบาย
    ลูกมาตายแท้งในท้อง ตั้งสองคราจั่งคึดฮ่ำ
    เป็นย่อนกรรมข่อยยิ่งยวด ให้หมอตรวจเบิ่งกะนา...

    หมอตรวจแล้วบอกว่า เป็นย่อนยาที่กินก่อน
    เข้าบั่นทอนให้ลูกแท้ง จึงจาแจ้งแก่กะใจ
    “อุกฤทัยที่หลงเชื่อ ไปหลงเซื่อคำหวาน
    หลงซาบซ่านหฤทัย ลุ่มหลงใหลนำคำล้อ
    แกล้งยกยอตอแหลปิ้น หลงถวิลนำคำม่วน
    ล่อให้กินน้ำง้วน ที่แซมซ้วนสิ่งเบื่อเมา
    ตั้งสองคราวที่เฮาแท้ง ลูกแดงมรณาต
    ชีวาวาตด่าวดิ้น สูญสิ้นแม่นบ่ยัง
    ย่อนว่าฟังความเว้า หูเบาเชื่อคนง่าย
    ลูกมาตายแม่หัวปู้ บ่หวนฮู้ฮ่อมการณ์
    นับแต่มื้อนี้นั้น คันถือครรภ์สิปิดเสื่อง
    บ่ให้ข่าวราวเรื่อง เถิงเบื้องผู้ใจมาร…



    โปรดติดตามตอนต่อไป..อิอิ
    แก้ไขครั้งสุดท้ายโดย พลายแก้ว; 09-09-2011 at 22:08.

  2. #2
    ศึกษาหาความรู้ สัญลักษณ์ของ lungyai1123
    วันที่สมัคร
    Oct 2008
    กระทู้
    382
    บล็อก
    63
    สุดยอดเลยครับพลายแก้วหอก่อได้ฮู้นี่หละว่ามีประวัติมาจั๊งซี้นอ

  3. #3
    Banned

    วันที่สมัคร
    Oct 2010
    กระทู้
    798
    บล็อก
    4
    ป๊าดสุดยอดเลย แต่วาต้องมาแปลลาวเป็นไทยอีกเพื่อทำความเข้าใจลึกซึ้งในความหมายแต่ละคำ หื่อๆ

    ถามแน่ค่ะ น้ำง้วน หมายความว่าจั่งได๋ค่ะเป็นคำอิสานบ่อ กับคำว่า ปิดเสื่อง หมายความว่าจั่งได๋ค่ะ
    แก้ไขครั้งสุดท้ายโดย หนึ่ง; 09-09-2011 at 19:40.

  4. #4
    แบ่งปันความรู้และประสบการณ์ สัญลักษณ์ของ นา ดอกจาน
    วันที่สมัคร
    Mar 2009
    ที่อยู่
    FL,USA
    กระทู้
    263
    เอามาให่ฟังต่อไปแนะจ้า มีต่ออีกบ่น้อ?

  5. #5
    แบ่งปันความรู้และประสบการณ์ สัญลักษณ์ของ มะเหมี่ยว
    วันที่สมัคร
    Jan 2010
    ที่อยู่
    สุดประจิมที่ริมเมย
    กระทู้
    958
    แง แง แง นางอยากเมือบ้านยาดเข่าสาก........

  6. #6

    ตอน 2 (ต่อ) ครับ..

    ตอน 2 (ต่อ)

    วันคืนผ่านกาลล่วงพ้น ดนเดือนจนท้องแก่
    ท้องเคยแปกะเริ่มป้าง ที่บังไว้กะพ้นเผย
    เมียหลวงเลยเล่าฮู้ เห็นฮ่อมกระบวนครรภ์
    ต้องจัดการมารหัวขน ลูกของคนอีนางน้อย
    บ่อาจปล่อยให้ลอยหน้า ความอิจฉามาบังเบียด
    ความคิดเคียดปิดทางแจ้ง ด้วยแรงร้ายริษยา
    จึงเอายาว่าผีบอก กรอกปากอีนางครรภ์
    หวังสังหารบุตรา ในครรภาให้สูญสิ้น
    เมียน้อยกินกลืนลงท้อง ของแสลงเริ่มแผลงฤทธิ์
    แนวยาพิษมีฤทธิ์ฮ้าย ลูกตายดิ้นอั่งอุทร
    ซ้ำมานอนตายขวางท้อง ถิ่มแม่ทรมาน์
    แม่ได้หันใจปลา ดวงวิญญาณ์สิดิบดิ้น
    ด้วยดวงจินต์มุ่งหมั่น อธิษฐานด้วยอาฆาต
    แรงพยาบาทของผู้ข้า เกิดชาติหน้าสิเอาคืน
    สุดจะฝืนคนใจร้าย นางเมียใหญ่ผู้ใจโหด
    ขอลงโทษมันชาติหน้า วิญญาณข้าฯขอจองเวร…


    เลยเกิดเป็นคู่ค้ำ เวรนำจิตอธิษฐาน
    ผู้ตายมานท้องกลม กรรมสร้างสมเป็นแมวฮ้าย
    ส่วนเมียใหญ่ไปบ่ม้ม ผัวฮู้ปมที่นางก่อ
    มีดบั่นคอคนใจร้าย ให้ตายดิ้นสิ้นชีพชนม์
    ดวงกมลวิญญาณเจ้า กลายมาเข้าอยู่ในไก่
    พอออกไข่มาแล้ว แมวฮ้ายกะห่อนกลืน
    บืนไปฮอดสามครั้ง แมวกะยังรังควาญต่อ
    หย่ำฮอดคอแม่ไก่แก้ว สิสิ้นแล้วจั่งว่าวอน


    สาธุถ่อนชาตินี้ข้า ได้เกิดมาเป็นไก่
    แมวมาไล่กินไข่สิ้น เทิ่งกินข่อยผู้อ่อนแฮง
    เดชะแรงอธิษฐานะตั้ง ยังสัมปรายะภพใหม่
    ขอผู้ข้าฯเกิดได้ อย่ามีพ่ายให่แก่มัน..
    พอแต่ตายจากชาตินั้น แม่ไก่เกิดเป็นเสือ
    แมวเป็นเนื้อกวางสมัน จองเวรกันบ่จบสิ้น
    เสือก็กินลูกกวางน้อย ตามฮอยกรรมเก่า
    พอแต่เหมิดลูกเค้า เลยกินเจ้าแม่สมัน
    เป็นเฉกเช่นนี้นั้น หลายกัลป์โบราณว่า
    อุปมาคือดั่งแมวกับหนู คือดั่งงูคู่จอนฟอน
    กาเป็นเวรกับนกเค้า หมีเอาเวรกับไม้สะคร้อ บ่มีหย่อให้แก่กัน..


    ตอน 3 (ตอนจบ) รอมื้ออื่นเด้อครับ...อิอิ

  7. #7
    เจ้าหน้าที่ประชาสัมพันธ์ สัญลักษณ์ของ ลุนนี ศรีเกษ
    วันที่สมัคร
    Jun 2009
    ที่อยู่
    ศรีสะเกษ กรุงเทพ จอมเทียนชลบุรี
    กระทู้
    858
    บล็อก
    1
    ถ่ากะถ่านอจ้า สิได้ฮู้ว่ามันสิออกมาเป็นบุญข้าวสากแนวได๋ นอนถ่าจักคืนเนาะพี่น้อง อิอิ

  8. #8
    ซวดๆๆๆๆๆๆๆๆๆ สมฉายาปราชญ์อีสานเวฟฮีตจ้า ม่วนสุดยอด:l-:*-


    แก้ไขครั้งสุดท้ายโดย ข้าวต้มมัด; 10-09-2011 at 13:56.

  9. #9
    ตอน 3

    อวสานะกาลจ้อ ขอมาต่อตอนสาม
    ผู้เพิ่นตามอ่านตอนสอง คงสิคองดำเนินเรื่อง
    อันเสือเหลืองพอแต่ตายจากชาตินั้น กะได้หันมาเกิดใหม่
    เป็นธิดาตระกูลใหญ่ นาม กุลธิดา ในชาตินี้ มีพร้อมทุกสิ่งสรรพ์
    นางกุลธิดาว่านั้น หลังแต่งงานพอสมคู่
    สองกะอยู่สบสืบสร้าง จนนางน้องท้องใหญ่มา
    ย้อนเวลาไปหาเนื้อ นางสมันแต่กาลก่อน
    หลังม้วยมรณ์ย่อนเสือฮ้าย เวรจ่องให้ได้พบกัน
    กรรมบันดาลเกิดชาตินี้ เป็นยักษิณีอยู่กลางป่า
    เนาว์พนาหาต่อนซิ้น จอบกินเนื้อมนุษย์คน
    เกิดบันดลมีคนเว้า ได้ฟังข่าวแล้วเคืองจิต
    ด้วยแรงพิษริษยา ที่นำพาแต่กาลพุ้น
    เวรกรรมหนุนน้อมนำเกี้ยว เกาะเกี่ยวกันหลายชาติ
    แรงพยาบาทเคียดแค้น ให้อุกแหน่นอั่งมะโน
    เกิดเป็นโกธาเกรี้ยว เดินทางเทียวยืนนอนนั่ง
    มาคิดซังนางอั่นนี้ จำต้องรี่ฟ้าวรุดไป..สาแหล่ว...


    พอแต่ได้ว่าแล้ว เลยโอมอ่านพระคาถา
    ด้ายฤทธามนต์ขลัง กลับกลายร่างเป็นคนจ้อย
    เพศเพียงนงนางน้อย หน้าสอยวอยคือเพื่อนเก่า
    นางกุลธิดาแจ่มเจ้า บ่หวนฮู้ฮ่อมอุบาย
    เดินทางไปเสนอหน้า ทำท่ามายามหมู่
    หวังค้ำซูยามเจ็บท้อง ประครองร่างบ่ห่างคิง
    แนวนามหญิงสหายเพื่อน บ่แชเชือนบาดยามยาก
    อุปัฏฐากซ่อยค้ำ ยามล้าได้ซ่อยแฮง
    พอได้แบ่งเบาบ้าง คันนางเกิดล้าหล่อย
    บาดยามมีลูกน้อย สิคอยอุ้มเปลี่ยนมือ..พะนะว่า..

    กุลธิดาฟังคำเว้า ยักษ์ในเงาร่างหมู่
    นางบ่หวนฮ่อมฮู้ ถึงเล่ห์เหลี่ยมกระบวน
    นางจึงชวนให้อยู่บ้าน ซ้นฮ่มชายคา
    จนเวลาครรภ์เถิง ฤดูเดือนสิเคลื่อนคลอด
    พอแต่ทาระโกรอด หลุดพ้นอุทรแม่
    ยักษ์กะแปรเปลี่ยนปิ้น กินลูกน้อยบ่ยัง
    จนเถิงสองคราวครั้ง นางกุลธิดาจึงฮู้ฮ่อม
    บ่ยินยอมให้ลูกม้วย ตายด้วยยักษิณี
    นางจึงหนีไปซ้น หลบส้นอินางยักษ์
    หนีไปพักพิงคาเม ฮ่อมเฮือนสามีเค้า
    แล้วได้เนาว์อยู่หั่น จนว่าครรภาแก่
    และได้คลอดลูกน้อย งามซ้อยจั่งผุเขียน..อิอิ

    จนหลายเดือนผ่านพ้น ยักษ์กะวนหาข่าว
    ฮู้เรื่องราวข่าวหม่องซ้น กะเลยด้นดุ่งไป
    นางกุลธิดากะได้ ชวนผัวกลับบ้านเก่า
    โอบอุ้มเอาลูกน้อย ตามต้อยดุ่งเดิน
    ย่างเพลินๆมาเถิงเบื้อง สระโบกขรณี
    ที่ได้มีหว่างเคิ่งทาง ย่อนกรรมวางเวรเกี้ยว
    ได้น้อมเหนี่ยวนางหล่า กายาเกิดฮ้อนฮุ่ม
    บอกให้ผัวอุ้มลูกถ่า ส่วนหล่าลงส่วยคิง
    ตาผัดสิ่งหลิงเห็นหน้า นางยักษาใจซั่ว
    ด้วยความกลัวยักษ์ฮ้าย อุ้มลูกได้ฟ้าวแล่นหนี...
    เดชะบุญปางก่อนกี้ หนีเข้าสู่เชตะวัน
    เข้าถิ่นฐานอารามสงฆ์ พระพุทธองค์ทรงยั้ง
    ทรงบดบังกายนางหล่า กับบุตราน้อยอ่อน
    ยักษ์บ่ห่อนเห็นได้ จึงถามไถ่พุทธองค์...

    พระพุทธองค์ทรงแสดงให้ ฝักใฝ่ในธรรมะ
    ให้ยักษ์ละบาปเว้น เวรข้องเลิกจ่องกัน
    ทรงบอกกาลแต่ก่อนกี้ มีกรรมนำจ่อง
    วัฏฏะวนเวียนข่อง นำคล้องบ่ส่างซา
    ยกคาถาแสดงอ้าง เป็นตัวอย่างบางตอน
    ทรงสั่งสอนสรรพสัตว์ พระสุคตตรัส..แบบนี้...

    น หิ เวเรน เวรานิ สมฺมนฺตีธ กุทาจนํ
    อเวเรน จ สมฺมนฺติ เอส ธมฺโม สนนฺตโนฯ
    “ในกาลไหนๆ เวรทั้งหลายในโลกนี้ ย่อมไม่ระงับด้วยเวรเลย
    ก็แต่ย่อมระงับได้ด้วยความไม่มีเวร ธรรมข้อนี้เป็นของเก่า”




    ตอนอวสานหม่องสิเป็นบุญข้าวสาก กำลังแต่งยุ มื้อแลงเด้อขะน้อย 5555

  10. #10
    Banned

    วันที่สมัคร
    Oct 2010
    กระทู้
    798
    บล็อก
    4
    นิทานธรรมล้ำค่า เป็นผญาว่าไว้
    ให้ลูกหลานได้อ่าน พอเป็นทานธรรมมะ
    ผุเพิ่นเสียสละ แบ่งจะจะเป็นตอนตอน
    ตามคำสอนที่วาไว้ มาให้พี่น้องอ่าน
    ขอขอบคุณเด้อท่าน ที่สานคำเว้าเกลามาเป็นผญา
    เบิ่งชั่งมีคุณค่า ประมาณค่าบ่อได่
    แม่นผุใดใส่ใจ อ่านแล้วได้ไปตีความ
    กะซิสวมความคิด จิตบ่อไปยึดมั่น
    ตามฮ่ำฮั่นอาฆาต ไปมุ่งมาดใส่ร้ายป้ายสีผุอื่นเพิ่น
    ตกกะเทินอ่านแล้ว ใจผ่องแผ้วปล่อยวาง
    บ่อสร้างความเดือดร้อน บ่อให้ฮ้อนผุอื่นเขา
    เอาความดีเข้าสู้ดู๋เฮ็ดเข่าวา ศีลศรัทธาอย่าให้พร่อง
    ใจให้ต้องไฝ่ธรรม งดสร้างกรรมทำความดีเข่าไว้
    ชาติซิไปบ่อมีไผนำปองร้าย ทั้งเจ้ากรรมนายเวรละเว้นบ่อมาใกล้
    ขอโทษเด้อจ้าท่านผุเจ้าผญา คำนางจานางเว้าเดาไปตามที่คิด
    แม่นซิถึกซิผิดกะขออภัยเด้อจ้า นางบ่อค่อยไขแจ้งแถลงถ้อยคำอิสาน
    แต่อยากแจงคำขานหว่านเป็นผญาซื่อๆ จ้า....


Tags for this Thread