หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 12

หัวข้อ: นิทาน..ก่องข้าวน้อยฆ่าแม่ (ผญา)

  1. #1
    ศิลปิน นักแต่งผญา สัญลักษณ์ของ พลายแก้ว
    วันที่สมัคร
    Dec 2008
    กระทู้
    630

    นิทาน..ก่องข้าวน้อยฆ่าแม่ (ผญา)

    ก่องข้าวน้อยฆ่าแม่ (ฉบับผญา)

    พี่น้องเอ้ย.. ขอสาธกยกกลอนต้าน ถึงตำนานนิทานเก่า
    เป็นเรื่องราวตั้งแต่เค้า โบราณเล่ากล่าวมา
    ตำนานส่าคนแซ่ซร้อง ก่องข้าวน้อยฆ่าแม่
    เพื่อเผยแผ่หวังสืบไว้ ในราวเรื่องแห่งนิทาน
    คันไขขานผิดพลาดเพี้ยง สร้อยสำเนียงเสียงสังวาส
    คันเขินขาดตกหล่นบ้าง ขอทางท่านโปรดอภัย
    ด้วยหัวใจดำรงหมั่น เพื่อสร้างสรรค์เสริมต่อ
    เรื่องพระธาตุก่องข้าวน้อยนั้นนอ ลูกหลานขอยกแจ้ง แสดงให้..ท่านซม...สั่นแหล่ว

    …………………………………..

    บัดนี้...สิได้พรรณนาเรื่อง เหตุแห่งนิทานหลัง
    ยังมีบ้าน “ตาดทอง” หม่องสิเดินดำเนินเรื่อง
    สังกัดเมืองบั้งไฟโก้ ยโสธรนามม่วน
    ตำนวนควรคู่บ้าน ขอจาต้านสู่ท่านฟัง...
    ยังมีชายเช็งกล้า ขานนามว่า “บักทอง”
    เป็นลูกของชาวนา เรื่องหน้าตากะพอแล้ว (หล่อยุ..อิอิ)
    ทุกมื้อแจวลงไปทุ่ง จูงควายลงไปโท่ง
    ฮอดนาลงเร่งรุดฟ้าว กะเทิ่งจ้าวแม่นไถ
    ไถนาไปจนบ่ายคล้อย ตะเว็นลอยเลยเที่ยง
    ได้ยินเสียง จ๊อกๆ ฮ้อง อุทรท้องเหิ่มกระหาย
    แดดเผากายจนเมื่อยล้า แขนขาระโหยอ่อน
    ในอุทรแสบจ้าวๆ เทิ่งหิวข้าวกะแฮ่งฮน
    ท้าวพร่ำบ่นปนคำป้อย เทิ่งเฝ้าคอยเทิ่งเหลียวส่อง
    หล่ำแลมองส่องทางแม่ คือดนแท้แม่บ่มา
    แม่นข้องคาอิหยังเจ้า ข้าวปลาบ่มาส่ง
    หรือว่าหลงลืมลูกแล้ว หรือแอ่วเล่นแม่นอยู่ใส..น้อ อิแม่เอ้ย....
    ขอลงเอยหยุดโหยะไว้ ในบทบ่อนตอนทองหิว
    ความโกรธกริ้วโมโหสูน บั้นภายลุนสิเติมแต้ม…

    …………………………………………

    ขอเชิญแนมมาทางบ้าน บรรยายถึงบทแม่
    ผู้ชะแรชราร่าง กำลังตั้งแต่งภาชน์
    ได้จัดหาข้าวและน้ำ เพื่อนำส่งอาหาร
    ได้ไม้คานคอนไป เร่งไวกะเทิ่งฟ้าว
    กายสั่นเทากะเทิ่งล้ม คาดลาดหมื่นคะมำดิน
    ในดวงจินต์แสนห่วงใย เจ็บแอวหลายแต่ใจพร้อม
    โสใจยอมทนอดกลั้น ของสำคัญให้ลูกก่อน
    ใจอาวรณ์ห่วงเจ้า สิหิวข้าวจนตาลาย..แล้วละหวา..

    พอฮอดนาเลยฮ้องเอิ้น ขึ้นมาเถิ่นลูกชายแม่
    ฟ้าวมาแม้ทองคำก้อน มาเซาฮ้อนซ้นฮ่มเย็น
    แม่ได้เข็นขนข้าวน้ำ อาหารตามใจลูกโปรด
    ทางไกลโพดแม่มาช้า มากินเถาะหล่า..ลูกไว
    ปิ้งไก่..แม่กะปิ้งมาให้ มาไวๆ คำแก้วอย่าแอ่วจ่ม
    มาเซาฮ่มกินข้าวน้ำ อิ่มหนำแล้วจั่งค่อยไถ...หล่าเอ้ย คำเอ้ย...

    ........................................

    ความหิวหอดแฮ่งฮ้าย ตาลายล้าอ่อน
    บ่อาจถอนโกรธากุ้ม ที่รุมรั้งอั่งสมอง
    อันความหิวที่อยู่ท้อง พอแต่มองก่องข้าวแม่
    ส่างมาน้อยคักแท้ สิยาท้องหม่องจั่งได๋
    ความโมโหโกรธาฮ้าย โมหังกลายมาบังเบียด
    พาลคิดเคียดคั่งแค้น อุกแน่นหน่วงมะโน
    เกิดเป็นโกรธากริ้ว ละลิ่วใส่มือบายแอก
    ความสูนแทรกพะไมมึน แฮ่งฮึนแฮงฮ้าย
    สติหายกลายเป็นเคียด เดียดบุกๆในดวงจิต
    หลงลืมผิดชอบชั่วดี ฟาดแอกตีกะหม่อมแม่
    จนเฒ่าแซเซล้ม นอนสิ้นลมจมเลือดซ่าน
    สีแดงฉานลงฉาบพื้น แดงลึ้นทั่วท่งนา
    พอมารดาวายชนม์สิ้น หาข้าวกินอย่าเร่งด่วน
    ท้องเซาพวนพออยู่ยั้ง สติตั้งเข้าหลั่งโฮม
    แล่นไปโจมเอาศพแม่ มารดาผู้ประเสริฐ
    เกิดรู้สึกสำนึกได้ สายเกินแก้เมื่อแม่มรณ์
    เลยขอวอนวานไหว้ จากหัวใจของคนบาป
    ศิโรราบกราบก้ม ประนมน้อมระลึกคุณ
    ขอลงทุนเอาแฮงสร้าง เจดีย์ปรางค์หวังเตือนต่อ
    เพียรสร้างก่อพระธาตุก่องข้าวน้อย เพื่อคอยย้ำ...อนุชน..คนรุ่นหลังต่อไป....

  2. #2
    ศึกษาหาความรู้ สัญลักษณ์ของ lungyai1123
    วันที่สมัคร
    Oct 2008
    กระทู้
    3,644
    บล็อก
    63
    มาย้อนยุคคัดแท่หละเน๊าะอ้ายพลายแก้ว 555

  3. #3
    ศิลปิน นักแต่งผญา สัญลักษณ์ของ พลายแก้ว
    วันที่สมัคร
    Dec 2008
    กระทู้
    630
    ฮ่าๆๆๆๆ กะจั่งว่าละครับ ลุงใหญ่ เรื่องนี้กะมีมาดนแล้ว แต่หาที่เป็นบทผญาบ่ได้แมะครับ เลยเขียนไว้พอเป็นแนวทาง เผื่อนักเรียนนักศึกษาเพิ่นสิอยากได้ เวลาแสดงละครเวที เกี่ยวกับประวัติศาสตร์ หรือตำนาน ประมาณนี้แมะ ขอรับ...
    แก้ไขครั้งสุดท้ายโดย พลายแก้ว; 22-11-2011 at 19:02.

  4. #4
    ร่วมถ่ายทอดความรู้สู่สังคม สัญลักษณ์ของ หนุ่มหน้าลาว
    วันที่สมัคร
    Jan 2010
    ที่อยู่
    สระบุรี
    กระทู้
    430
    นั่นละนา....ศรัทธาโยม...โอ่ง ง่ง ง่ง อ่ง โอ่ง โอย โอย นอ งอ งอ นะนา อา อา อา ....ฮิ้ว ๆ โหม่ง
    ฮ่า ฮ่า ฮ่า ม่วนคักยังว่า

    บ้านนี้เขียนติดป้ายข้างทาง ฝรั่งอ่านแล้วงง Tadtong สระอาเป็นสระแอ สระออเป็นสระโอ...โอ้ยงึดคัก ฮ่า ฮ่า ฮ่า ฮิ้วๆๆๆๆๆ

    แก้ไขครั้งสุดท้ายโดย หนุ่มหน้าลาว; 23-11-2011 at 14:25.

  5. #5
    ศิลปิน นักแต่งผญา สัญลักษณ์ของ พลายแก้ว
    วันที่สมัคร
    Dec 2008
    กระทู้
    630
    หึยยย หน่ายฝรั่งเด้ บ่านนิ 555555

  6. #6
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,949
    กล่องข้าวน้อยฆ่าแม่
    ม่วนดีเนาะจ้า ยามเบิงลำเพินเล่นแฮงคัก ให่นำหมอลำพุ้นเด๊อิอิอิ

  7. #7
    ดีเจ นักจัดรายการ สัญลักษณ์ของ นู๋น้อย
    วันที่สมัคร
    Mar 2010
    ที่อยู่
    เมืองชลบุรี(เช่านอน) สีเกด(หม่องเกิด
    กระทู้
    1,261
    บล็อก
    31
    :l-:l- แม่นละเน๊าะาจ้าคุณป้า น้ำตาย้อนป๊อกๆ แม่นแท้ฟังเทศน์ เด้อ พระอาจารย์พาโศกคัก เรื่องนี้ :*-

  8. #8
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,883
    บล็อก
    1
    ศิษย์สำนักตักกะศิลาเค้า
    มาบอกเหล่าควมเดิม
    คอยมาเติมควมหลัง
    เชิญรับฟังเลยขะน่อย

    ธุจ้าธุจ้าธุจ้า
    มาตุฆาตขาดสิ้น ถูกดูหมิ่นทรพี
    กลายเป็นคนอัปปรีย์ ซั่วซามนามบ้าน
    ในตำนานขานไว้ ควมไขเปิดป่อง
    อนุชนรุ่นน้อง ให่มองแง่แต่ที่ควร
    อุทธาหรณ์ก่อนสิม้วน บอกคนหวนได้คิดฮ่ำ
    อนันตะริยะกรรมเกินสิแก้ หนักเพี้ยงเหงี่ยงสุเมรุ
    *******
    ปล.มามาแม่ออกคุณป้าแม่ออกนู๋น้อยไปถวายกัณฐ์หลอนพลายแก้ว..555
    แก้ไขครั้งสุดท้ายโดย pcalibration; 23-11-2011 at 16:08.

  9. #9
    ดีเจ นักจัดรายการ สัญลักษณ์ของ นู๋น้อย
    วันที่สมัคร
    Mar 2010
    ที่อยู่
    เมืองชลบุรี(เช่านอน) สีเกด(หม่องเกิด
    กระทู้
    1,261
    บล็อก
    31
    บัดนี้..นางกะยกมือน้อมทานนำยี่สิบบาท ให้ประกาศดังๆแหน่เด้อหลวงพี่ หากบุญมีชาติหน้าจะได้เกิดมาโตใหย่ๆ บ่เกิดมาโตน้อยฮ้ายแถมเตี้ยส่ำกะติ่มกัน พี่น้องเอ่ยยยย(ลำ)
    แก้ไขครั้งสุดท้ายโดย นู๋น้อย; 23-11-2011 at 16:39.

  10. #10
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,949
    ไปๆหลานพีจ๋า หลานนู๋น้อยจ๋า มาขอป้าติดกันต์เทศนำแนหลาน

    ม่วนหลายเทิ้งม่วนเทิ้งเศร่าเนาะจ้า อิอิอิ ก่องข้าวน้อยฆ่าแม่

หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •