นิทานสอนเด็ก..ตอนฝันร้ายพ่อใหญ่ดี

[หนุ่มหน้าลาว]

ฝันว่ากาและแฮ้ง พากันแข่ง ลงกินขวาน
พ่อใหญ่ดีได้แต่มอง บ่อาจเก็บ ขวานซ่อน
เฒ่ากะอาวรณ์เศร้า โอน้อเฮา แฮงอ่อน แท้แหล้ว
ได้แต่นั่งจอบจ้อง อยากเก็บเมี้ยน กะบ่ไหว
เอินไปหาซาวบ้าน ทุกเฮือนซาน มิดซี่หลี่
คือบ่มีคนอยู่บ้าน หลานหล่อน จักอยู่ไส
เหลียวไปไกลเห็นมุบมู่มุบม่าย แม่นหลานซาย ข่อยบ่ น้อ
สูซ่างมิดกะด้อ หรือมึงนั้น เป็นอี่หยัง
หรือมีคนมาปิดดัง หรือมีคนมาปิดหน้า มาปิดหูปิดตา ให้มึงนี่ เป็นใบ้กืก
ปากบ่ออกบอกบ่ได้ ย้านกาแฮ้ง สิไล่หยุม เอาบ้อ
อันว่าซุมไทบ้าน ไปทางได๋ มึงเห็นบ่ หล่าเอ้ย
ลองไปเอิ้นเบิ่งดู้ ให้มาอู้บ ไล่อีกา เบิ่งนา
หลานมันพาทีต้าน ว่าเฒ่าซาญ พ่อผู้ใหญ่
ลูกสามคน เพิ่นเอามีดไล่ฆ่า ได้หลบลี้ ไปอยู่ดง พุ้นแหล้ว
แม่ใหญ่จง เพิ่นเคยเลี้ยงหมาไว้ หลายโต ลองไปบอก เลาดู้
ให้เอาหมามาไล่แฮ้ง ให้มันผ่าย เซิ่นหนี เบิ่งกะน้า
หลานมันว่ามื้อวานนี้ เฒ่าแม่ ถืกหมากัด พะนะว่า
เลี้ยงปานได๋กะบ่คูณ มาลอบกัด เจ้าของซ้ำ
ลองไปตามพ่อกะจ้ำ ให้มาเติน เอิ้นหมู่ กะนาหลาน
มันกะว่าพ่อกะจ้ำ ถืกตัดลิ้น ตั้งแต่วาน
บ่ทันนาน หลานมันคลานเข้ามาใกล้ ใหญ่ดีเอ้ย เจ้าอย่าปาก พะน้า
คันเจ้าบ่เซื่อข่อย ระวังค้อน สิทุบหัว เจ้าเดะ
ใหญ่ดีเอ้ย...อกสิเพพังม้าง บ้านเมืองเฮา ซ่างเป็นต่าง แท้น้อ
ซ้าง หมู หมา เป็ดไก่น้อย ถืกกินเกลี้ยง บ่หลอ
เฒ่ากะอุกค้อม่อ น้ำตาหลั่ง ลงใน
ทำใจไปตามการณ์ เพียงนั่งมอง เหมิดแฮงสู้
กินเบิ่งดู้ กินให้เหมิด ให้มันเกลี้ยง อย่าเหลือหลอ ไว้แต่หน่อย
เหมิดซากโตข่อยแล้ว กาแฮ้ง สิโม่มกิน กันดอก อัญญาเอ้ย...
เอวังก็มีด้วยประการฉะนี้...

[lungyai1123]

สุดยอดผญ๋าแล่วอ้าย หนุ่มหน้าลาว...ซวดๆๆๆ