ฤดูกาลสิไหลเลื่อน วันเดือนปีสิเคลื่อนผ่าน
แม้สายธารสิเหือดแห้ง หัวใจอ้ายหากดั่งเดิม
อยากมาเสริมควมเว้า ที่สองเฮาเคยเว้าต่อ
ไม้ไผ่บ่อถิ่มกอ เครือขอฮอบ่อหวานจ้อย ทางอ้อยบ่อเหล่าขม
ลมเซาพัดใบไม้ หัวสิงไคไปอยู่ป่า ปูปลาลาจากน้ำ สองเฮานั้นสิบ่อไล
ไหมบ่อกลายเป็นฝ้าย เสือโคร่งบ่อมีลาย แต่อ้ายกับน้องยังมั่นแก่น
ฮักเป็นแฟนแหนแต่น้อง ใจยังฟ้องว่าบ่อลา
พี่นี้ปรารถนาห้อย นำฮอยทุกบาดหย่าง
ปรารถนาห่วมน้อง หมายไว้สิแต่งดอง
งัวบ่อลืมเชือกคล้อง ทองบ่อกลายเป็นขี้กั่ว
บัวบ่อลาจากน้ำ นาทามบ่อเป็นป่า
ปลาบ่อเซาดีดบ้อน หนอนบ่อเซาเจาะปลาแดก
ตาแฮกเซากินไก่ต้ม กะยังเว้าว่าบ่อลืม
ฟืมสิลาผ้า ไหมแพรวาสิลากี่ ผีลาหม้อดินปั้น ยืนยันได้ว่าฮักนาง
ดวงอาทิตย์สิขึ้นผิดข้าง น้ำทะเลสิจางจืด
โลกสิมืดบ่อแจ้ง แสงดาวน้อยบ่อหุ่งใส
เอี่ยนสิขึ้นอยู่ปลายไม้ มดแปลงฮังในน้ำแก่ง
ฝนสิแล้งน้ำสิท่วม ควมฮักอ้ายบ่อเปลี่ยนนำ
คึดฮอดคำสัญญาเว้า แม้ใจนางเจ้าสิเปลี่ยน
เกวียนสิลืมไม้ค้ำ อ้ายยังย้ำว่าฮักเดอ
Bookmarks