เมือยามบ้านกินอิหยังกะแซบ เน๊าะพี่น้องมีเมนูแซบมาฝากอีกแล้วละ
ทางบ้านเผิ่นตึกแหไว้ถ่า มีทั้งปลาค่อและปลาดุก เมนูกับข้าวแลงกะหนีบ่พ้อลาบปลาดุกแซบๆกับกับผักสดๆ เน๊าะจ้า
เนื่องจากว่านั่งรถจากชลบุรีไปลงยุ๊ บขส.อุบลฯ แล้วจั่งนั่งรถกลับมาลงบ้านยุ๊เบญจลักษ์ กะได้เห็นวิวและบรรยากาศยามเช้าๆ กะเลยเอามาฝากพี่น้อง นำจ้า
เช้านี้ที่ตะเวนแดง พานะ ฮ่าๆๆ
สะพานข้ามแม่น้ำมูลไปฝั่งวาริน
ท่งนาทางอำเภอสำโรง อุบลราชธานี
เบิ่งบรรยากาศพอเป็นยาเน๊าะจ้า เข้าสู่การลาบปลาดุก กันเลย
เครื่องปรุงลาบปลาดุก
ปลาดุกนา จากสระกลางท่ง ย่างไฟหอมๆ
หัวข่อเผาไฟ
น้ำปลาร้าต้ม
ข้าวคั่ว พริกคั่วป่น หอมแดงซอย สะระแหน่ ผักใบเลื่อย ตะไคร้ซอยหรือหอมอื่นๆเท่าที่มี
มะนาว
พริกสวนสดๆอ่อนๆ
วิธีปรุง
๑.สับปลาดุกย่างกับหัวข่าอ่อนเผาไฟให้แหลกแบบคักๆ ย้านคาแข่ว อิอิ
๒.ต้มน้ำปลาร้าใส่กับตะไคร้ หัวข่าทุบ หัวปลาดุกที่ย่างไฟแล้ว
๓.เอาปลาดุกที่สับแล้วใส่หม้ออีกใบ เอาน้ำต้มปลาร้าฮ้อนๆลวกจักสามนาที
อย่าพึ่งคนจ้า ลวกทิ่มไว้จักครู่จั่งค่อยคนให้เย็น เดียวจะเหม็นคาวปลา
๔.พอปลาเย็นแล้ว ก็ใส่เครื่องปรุงจ้า ผงชูรส พริกป่น ข้าวคั่ว คนให้เข้ากัน ซิมรสว่าจืดหรือเค็ม
ปรุงรสให้ออกเค็มนิดๆ เผ็ดตาม แล้วกะบีบน้ำบักนาวสุดท้าย จั่งใส่หอมซอยตามลงไป จ้า
เสร็จแล้วพร้อมเสริ์ฟกับผักต่างๆตามใจชอบจ้า แม่ถามว่าคือบ่เอาหม้อใหม่มาใช้ละนาง หม้อใบใหม่กะมี
ฮ่าๆๆนางกะตอบว่า บ่เอาดอกใช้ใบเก่านี้ละ จั่งได้บรรยากาศแบบบ้านเฮา คลาสสิกสุดๆ
ระหว่างที่ลูกสาวเฮ็ดกับข้าวแลงยุ๊ คุณแม่กะจัดการห่อข้าวต้มไปเฮ็ดบุญมื้ออื่น จ้า
ข้าวต้มโค่นข้าวก่ำใส่เม็ดถั่วแดง
ห่อข้าวต้มแล้วกะเอาใส่หม้อต้ม
แล้วจั่งมากินข้าวพ้อมแล้ว พาแลง ของมื้อนี้กินข้าวพ้อหน้ากัน พ่อแม่ลูก
ถามพ่อว่าแซบบ่พ่อลาบปลาฝีมือลูกสาว พ่อบอกว่าแซบละน้อ ลาบปลาดุก
กะว่าแม่นแต่แซบเพราะฝีมือลูกสาว เด้ ฮ่าๆๆ ดีใจเบิ้ด ได๋แท้ลาบปลาดุกมันแซบยุแล้ว ...เน๊าะ ออย
กะส่าง...ดีใจคือเก่าที่พ่อกินข้าวแซบ อิอิ
ป.ลิง ภาพบ่ชัดเจนกะย้อนว่าใช้โทรศัพท์มือถือถ่ายจ้า อดสาเบิงเอาเน๊าะ อิอิ
:*- พี่น้องชาวบ้านมหาและอ้ายบ่าวคนเดิมกับเวปบ้านมหาแห่งนี้จ้า
Bookmarks