:l- พบกันอีกครั้งหลังจาก บุญบ้านงานพาแลง แล้วไปหมาดๆ...นอเสนอของแซบถิ่นอีสานคือเก่าจ้า พี่น้อง
มื้อนี้ มาแบบเมนูพื้นบ้านอาหารแสนอร่อย..ของใครหลายๆคน
แจ่วแมงดา...ถ้าเป็นบ้านนอกบ้านนาเฮากะยามฝนตกน้ำใหม่
น้ำขังตามแจ่งงานนา(มุมงานนา)หรือตามหนองบึงทั่วไป
แมงดาจะวางไข่ในต้นหย็หรือกิ่งไม้เฮากะไปสังเกตุและแนมหาไข่แมงดา
เพราะตามธรรมชาติแมงดาโตเมียจะวางไข่ล่อแมงดาโตผู้
ถ้าเฮาโชคดีหากินหมานเฮากะส่อนได้ทั้งสอง บางเทื่ออิพ่อเผิ่นกะเอาปหไปหว่านเอาเลย
แล้วแต่ถนัดมื้อใด๋มีแจ่วแมงดาในพาข้าว มื้อนั้นจะกินข้าวแซบ แซบ
ลวกผัก กับ ปิ้งปลาเสริมนำ ออยยเอาพิซซ่ามาแลกก็ไม่ยอม...
วิถีชีวิตตามท้องไร่ท้องนา..ยังคงจำได้บ่เคยลืมแม้จะมาอยู่ท่ามกลางแสงสีและชุมชนเมือง พานะ
แต่สำหรับชุมชนเมืองหลวงหรือเมืองใหย่ จะหากินอาหารบ้านเฮาได้ ตามตลาดสด หรือตลาดยามแลง
มีบริการครบวงจร...และมีทุกรูปแบบ ตั้งแต่ผักแก่นขม หยุมละ 5 บาท
จนฮอดอาหารชั้นสูงอย่าง ไข่มดแดง ขีดละ 40 บาท ราคาแปรผันตามราคาน้ำมัน...
มื้อวานตอนแลง ไปหย่างตลาดตามวันนัดหมาย(กับแม่ค้าอาหารลาว)
หวังจะซื้อไข่มดแดงไปก้อยตามที่ใจอยากกิน
แต่..ขีดละ 40 บาท ก้อยกินคงจะบ่อิ่ม กะเลยเปลี่ยนความคิดทันทีเพราะเหลียวเห็น
แมงดาโตน้อย นอนแอ่งแม่งอยู่ในกะมัง แม่ค้า
ซื้อมาโตหนึ่ง(เลือกโตที่หอมที่สุด) แล้วกะซื้อ บักพริกและหัวหอม
กะเทียม ที่จี่แล้ว ไม้ละ 5 บาท (ง่ายและสะดวก)
ซื้อต้นหอม ผักชี มาตามสมควร
ขั้นตอนการปรุง ก็ ง่ายๆ เอาทุกอย่างลงใส่ครก ตำให้ละเอียดสุด
ปรุงรสด้วย น้ำปลาแดก(ปลาร้า)และต่อน ผงนัว(ผงชูรส)
น้ำปลา บักนาวซีกน้อยหนึ่ง(บักนาวแพง)
ตำแจ่วแล้ว แล้ว กะ เอาข้าวเหนียว ตุ้ยซิ่มเบิ่งก่อน แซบนัว โอเคบ่
โอเค(แม่ใหย่สอน)แล้ว กะตักใส่ภาชนะ สุดไฮโซ ถ้วยสแตนเลสน้อยๆ
จะกินข้าวกับแจ่วอย่างเดียวย้านเผิ่นว่า ทุกข์ยากเอาฮ้าย
กะเลย ทอดปลาขี้โก๋ ตื่มกัน ย้านแจ่วแมงดาเหงา..^_^
ภาพจากกล้องมือถือ อาจบ่ชัดเจน แต่กะพอแก้ขัดได้ยามขี้ค้านหอบกล้องเข้าครัวนำ
เชิญแซบ(อ่านกินทางสายตา)ได้แล้วจ้า ขอบคุณครัวเอ๊าะเย๊าะอยู่โรงงาน(เอื้อเฟื้อสภานที่ในการถ่ายทำ)
:*-พื้นที่บ้านมหาที่เอื้อเฟื้อสถานที่ในการนำเสนอ
ลาเมนูนี้ด้วย>>>ภาพ ต้นแก่นตะวัน ที่กำลังเจริญเติบโต และใกล้จะออกดอกให้ชื่นชมในอีกไม่กี่วัน...
สำบายดี๋พี่น้องชาวบ้านมหาและท่านผู้เยี่ยมชมทุกๆท่าน จ้า.......
Bookmarks