สายสัมพันธ์บ้านมหา อุบล-โขงเจียม-สำโรง

[บักขามป้อม]

สวัสดีพี่น้องบ้านมหาที่คิดฮอดคิดถึงซู่คนจ้า
ม่วนๆ กันไปแล้วเนาะจ้าสำหรับเทศกาลสงกรานต์บ้านเฮาที่ผ่านมา
พี่น้องกะคือสิทยอยเดินทางกลับเข้ามาเฮ็ดการเฮ็ดงานกันเบิดแล้ว


ขามป้อมเองปีนี้บ่เปียกน้ำจักเม็ดเลยจ้า แหะๆ (เรตติ้งตกคักกะยังว่า เดียวนี้คะเจ้าพากันหนิ่งกันสาดน้ำ)
ฉลองสงกรานต์กับพี่น้องชาวอำเภอโขงเจียม จังหวัดอุบลราชธานีจนฮอดวันที่ 15 เมษายน 55 ที่ผ่านมาจ้า

จากกำหนดการเก่าว่าจิเข้าเมืองอุบลฯ ในมื้อวันที่ 16 เพื่อพบปะและขอบคุณพี่แจง "ธิดายาเย็น"ของเฮา
ที่เลาเป็นธุระรับของจากทางขอนแก่นไว้ถ่า รวมถึงอยากพ้อหน้าพี่น้องบ้านมหาของเฮาทางอุบลฯจ้า

แต่กำหนดการกะเลื่อนมาเป็นวันที่ 15 แลงหลังจากเก็บร้านแล้ว
ย้อนว่า เสี่ยวติ๊กต๊อค เพิ่นซวนไปนอนบ้านเพิ่นคืนหนึ่งแล้วค่อยเมือขอนแก่นพานะ
เพราะเพิ่นต้องเมือตอนเช้าวันที่ 16 ขามป้อมเลยโทรหาอ้ายวรเช้าวันที่ 15 ว่าเปลี่ยนแผนเด้อจ้าอ้าย
"เลื่อนนัดเข้ามามื้อหนึ่งอ้ายสะดวกบ่" อ้ายวรตอบมาว่า "โอ้ย กำลังว่าจิพากันไปเซอร์ไพร์สเด้นิ
อ้ายกับหนุ่มวีระกำลังไปโขงเจียม" พานะ








และแล้วสองหนุ่มหล่อเพิ่นกะพากันมาฮอดจ้า มาแล้วกะมาเป็นนายแบบให้กับทางร้าน อิอิ












หมูยอเมืองอุบล อ้ายวีระเพิ่นซื้อมาฝาก ขอบคุณหลายๆจ้าอ้าย
แซบสมคำร่ำลืออิหลี อิอิ












สองหนุ่มเพิ่นพากันไปเบิ่งแม่น้ำสองสี อ้ายวีระว่า คนอุบลฯ บ่เคยมาโขงเจียมพานะ




ได้เวลาอำลาพาจาก หนุ่มๆ เพิ่นถ่ายรูปฮ่วมกันเป็นที่ระลึก
ขอบคุณอ้ายเทิงสองเด้อจ้า ที่แวะมายาม ดีใจหลายๆจ้า

ส่วนขามป้อมกะเก็บของเตรียมเดินทางไปอุบลฯ เพื่อนติ๊ก พี่อร และพี่แจงถ่าอยู่
แต่ว่าคาไปหลงเมืองอุบลย้อนว่าหนีคนเล่นน้ำ กว่าจิไปพ้อกันกะจน 4 ทุ่ม พี่แจงถ่าบ่ไหวหลับไปก่อน











ฟ้าสางที่บ้านเปือย ณ วันที่ 16 เมษายน 2555 เช้านี้เจ้าภาพเพิ่นพาออกไปท่งหายาย
ไปรดน้ำขอพรเพิ่น คุณยายอายุ 85 ปีแล้วแต่ยังแข็งแรงอยู่เลยจ้า












นาปรังกำลังจิได้เกี่ยว บรรยากาศกะดี เลยขอเก็บภาพกันจักหน่อย















ออกจากท่งนาแล้ว เจ้าภาพเพิ่นกะบอกว่า " ปะๆ ไปเก็บบักพริกเมือกินบ้าน เฒ่าพ่อปลูกไว้หลายคัก"

ป่าบักพริกเฒ่าพ่อมุ่นเบิดบาดนิล่ะ ฮ่าๆ

[บักขามป้อม]

อดบ่ได้ที่จิเก็บภาพ (ขนาดในป่าพริกกะบ่เว้นฮ่าๆ)







สองสาวสวยในป่าพริก งามงด ทุกๆ อิริยาบถ





สงสัยจิพากันเมื่อยคัก เบิดแฮงกาแฟเฒ่าแม่แล้ว ฮ่าๆ





มาฮอดเฒ่าแม่กะหาพาข้าวไว้ถ่าแล้ว มีแต่แนวลูกสาวเพิ่นมัก
แกงเปรอะรวม หวาย หน่อไม้ เห็ด แซบคักพออยากห่อพานะ ผู้ลังคนว่า












กับบรรดาของฝากจากเฒ่าพ่อเฒ่าแม่ ขอบคุณหลายๆจ้า
หลังจากกินข้าวงายอิ่มแล้วกะแยกย้ายกันเดินทาง

ขอบคุณสำหรับมิตรภาพและการต้อนรับที่อบอุ่นเด้อจ้าเพื่อนติ๊กและครอบครัว
รวมไปถึงพี่อรสาวมุกนำจ้าดีใจที่มีโอกาสได้พ้อกันจ้าพี่







หลังจากแยกกันกับเพื่อนติ๊กแล้ว ขามป้อมเดินทางกลับขอนแก่นไปยังเส้นทาง ศรีสะเกษ-ราษีฯ-สุวรรณภูมิ-ร้อยเอ็ด
ต้องผ่านสวนสมเด็จฯ เลยพากันแวะเบิ่งดอกลำดวน หลังจากที่เคยมาเมื่อปีที่แล้วแต่บ่เห็น










ปรากฎว่าเหลือดอกลำดวนอยู่บ่หลายจ้า กำลังจิเบิดแล้ว พอได้เห็นแหน่อยู่จ้า















เดินทางกลับผ่านช่วงอำเภอเกษตรวิสัย พ้อแม่ค้าขายเห็ดข้างทาง เลยพากันจอดซื้อไปแกงกินแลงจ้า
มีบักแงวกับบักไฟนำ มัดละสิบบาท หวานๆส้มๆ กินไปนำรถพอบ่อยากนอนจ้า อิอิ









และมื้อนี้ทักทายพี่น้องจาก อำเภอตระการพืชผล จังหวัดอุบลราชธานี
มาเด้อจ้าพี่น้องกินข้าวนำกันจ้า

ขอบคุณมิตรภาพจากพี่น้องไทอุบลฯเฮาซู่คนเด้อจ้า
และขอบคุณพื้นที่แบ่งปันจากเว็บบ้านมหาดอทคอมจ้า

[สาวชัยภูมิ ลูกพ่อขุน]

ขอบคุณที่พี่ขามป้อมและอ้ายเต็มได้แบ่งบันภาพงามให้ชมกัน เบิ่งแล้วคนไกลกะคิดฮอดบ้านโดยเฉพาะเวลาโพสต์แนวกิน ฮ่าๆ

[ติ๊กต็อค]

อย่าลืมไปเอาสูตร กระยาสารทแม่รัตนี เด้อ นาง เลาพ้อมสิถ่ายทอดวิชา เพราะว่าลูกสาว บ่ไปเรียนเอา จักเทือ 555+++++

ว่าแต่ไผ๋ผ่านไปทางบ้านเปือย ต.โนนกาเล็น อ.สำโรง จ.อุบล กะแวะทักทายกันได้เด้อจร้า มีป้ายไปรษณีย์ อยู่หน่าบ้านนิละจร้า :l-

[พล พระยาแล]

อัน ๆ ผุเสื้อลาย ๆ นี่แมนดีเจเต็มใจให้เธอบ่ครับ หน้าสีคุ้น ๆ ซั่นดอก

เพิ่นมาคือหล่อกั่วเก่าแถะซั่นดอก มียาดีกินแล้วหนุ่มกะบอกแนเด้อครับ

ส่วนยากินแล้วเถ่านั่น บ่ต้องบอกกะได้...อิอิ

[สาวพุเตย]

งามเนาะ...บักพริกแมะ...เอิ้กกกกกกกกกกกกกก

[lungyai1123]

เป็นตาไปม่วนนำเพิ่นเน๊าะเก็บพริกแบบซะเราะกราวนั่นหนา ฮ่า ๆ ๆ

[แจ่มใสยิ้มสวย]

ดูไปน้ำลายไหลกับส้มตำตอนแรกก็ดูเงียบคนเดียวหรอกนะ แต่พอเห็นสวนพริกเรียกคุณชายมาดูด้วย เอ้อทำไมพริกเราไม่งามอย่างนี้บ้าง และถึงรูปเห็ด oh!! Thai Mushroom I hate this website. I hate it. โอ้ยเนาะหือ

[เขมราฐ]

ตั้งใจว่าสิไปหาเอื้อย อ้ายทั้งสองให้ได้ แต่กะมีแนวให้ต้องบ่ได้ไป ต้องขอโทษหลาย ๆ ต้องมีอีกหลายโอกาสเน๊าะค่ะ

[ธิดายาเย็น]

จากเหตุการณ์หลายๆอย่างที่เฮ็ดให้พลาดโอกาสบ่ได้พ้อกันครบทีม แต่กะบ่เป็นหยังจ้าโอกาสหน้าฟ้าใหม่จั่งมาพ้อกันกะได้จ้าน้องขามป้อม เสี่ยวเต็ม..แต่ว่าขิ๋วอ้ายวร กับอ้ายหนุ่มวีระเว่ยล่ะไปดีคักเนาะ..