ธุจ้า ซำบายดี พี่น้องชาวบ้านมหาที่รักและคิดฮอดคิดถึง
มื้อนี้ มีเมนูบ้านๆ ไสตล์อิสานมาฝากต้อนคือเก่าจ้า ตามประสาคนมักสรรหาตะแนวกิน
อู๋ไข่ปลา เข้ากับบรรยากาศ ยามเข้าสู่ฤดูฝน
มื้อนี้ บรรยากาศทางฝั่งทะเลชลบุรี ฟ้ามืดฝนตั้งเค้า มาเลยช่วงใกล้ๆจะเลิกงาน ขนาดว่าหนีออกมาก่อนเวลางาน
กะยังบ่หวิดฝนได้โอกาสลงหย่างเลาะตลาดหาแนวกินสาเลย ซามฝนเซาตก..ซั่นเด้
เลาะไปเลาะมา หลายๆรอบ ฝนกะยังบ่เซาตก ตอนแรกว่าจะ ซื้อแกงจืดไปกินแก้หวัดกะพอ แต่...มีแต่ อีกเหตุผลของคนหิว..เน๊าะ เห็นร้านขายปลาแวะเบิ่ง ก่อนเทื่อมีไอเดีย และแล้วกะบ่พลาด เห็นมีไข่ปลา ยุ๊กองน้อยหนึ่งถามเผิ่นว่าขายจั่งใด๋ พ่อคน(หล่อพร้อม)บอกว่าโลละร้อยครับเอาท่อใด๋ เหมาเบิ้ดบ่ พ่อค้าถาม นางกะเลยตอบแบบมั่นใจว่า บ่ค่ะ เกรงใจย้านคนอื่นบ่ได้กินนำ เอาจักสองขีดสา พวงน้อยๆกะพอ กินคนเดียว พ่อค้าแนมหน้าแล้วกะขำ และอมยิ้ม(สงสัยคึดในใจว่า เป็นนำกินคนเดียวนั้นละเบิ่งแต่หุ้นตุ้ยนุ้นดีคัก) ฮ่าๆๆ ว่ากันไป
สรุปกะคือ ได้ ไข่ปลา(ปลาอิหยังกะบ่ฮู้ บ่เห็นโต เห็นแต่ไข่กองเอ๊าะเย๊าะ)แล้วกะได้ บักบวบอ่อนมามัดหนึ่งกะผักชีลาว...และหอมผักตู ตะไคร้ ข่าอ่อน บักพริกขี้หนูสวน แล้วกะ กลับห้อง
พอมาฮอดห้อง ยามถามว่าเฮ็ดหยังกินมาถือถุงอุยุ๊อายะแท้ (ความลับแตก)ที่จริงที่อะพาร์ทเม้นท์ เขาบ่ให้เฮ็ดกับข้าวที่มีกลิ่นฉุนหรือ กลิ่นแรงๆ
อย่างเช่น แกงส้ม แกงไตปลา หรือ ต้มปลาแดก เพราะว่าอยู่ในดงเจ๊ก กะเลยตั๋วยามไปว่า จำยำตะไคร้กินซั่นดอก ...ฮ่าๆๆ
พอมาฮอดห้องบ่รีรอและรอช้า ฟ่าวเฮ็ดแนวกินทันที ก่อนที่ เพื่อนบ้านข้างห้องจะกลับมาในห้องเช่าจะแบ่งส่วนครัวไว้ ต่างหากเพื่อความเป็นสัดส่วน...กะเลยแอบๆได้เฮ้ดแล้วกลิ่นบ่เหม็นห้องกะโอเค แล้ว
.
.
.
V
มาถึงขั้นตอนเตรียมเครื่องปรุง ง่ายๆ แบบสไตล์ชาว หอ หรือ อะพาร์ทเม้นที่เน้น สะดวก ง่าย และรวดเร็ว
ล้างผัก และ ล้างไข่ปลา เตรียมเครื่องปรุงให้พร้อม
หั่นตะไคร้ ข่า พริก ใบบักกรูด ให้พร้อม
ค้างหม้อกะทะ ใส่น้ำพอเอ๊าะเจ๊าะ ใส่เครื่องปรุงทั้งเบิ้ดลงไป ปรุงรสด้วย พริกป่น ข้าวคั่ว เกลือ ผงชูรส น้ำบักขามเปียก
ตามมากะใส่บักบวบ ไปพร้อมเลย จ้า เพื่อประหยัดเวลา
จากนั้นใส่ไข่ปลา กะ หอมผักตู ผักชีลาว
คนให้เข้ากัน ปิดฝาไว้ จัก 10 นาที
ผ่านไป สอบนาที ซิมเบิ่งรสชาต บ่ทันแหล่มกะเติมน้ำปลาไปหน่อยหนึ่งกะโอเคแม่ใหย่สอน ตักใส่ถ้วยพร้อมแซบได้เลย
จะกินกับข้าวสวย หรือ ข้าวเนียวกะได้ ตามใจ แต่ ข้าวแลงขอเป็นข้าวสวยแล้วกัน ย่อยง่าย
:l- ตบตรูดด้วยน้ำแดง หวานๆเย็นๆ ชื่นใจ
สุดท้ายนี้ ขอลาไปพร้อมกับต้นว่านรวยบ่เลิก(รวยไม่รู้เลิก) ของสะสมที่ปลูกไว้ อยู่ที่ทำงาน อาศัยพื้นที่น้อยๆ ขยายพันธุ์ไว้หลายๆ
บัดนี้ ได้ออกดอกอีกครั้ง...ขอให้พี่น้องมีความสุขและรวยๆ ถูกหวยทุกงวด จ้า
:*- พี่น้องที่แวะมาเยี่ยมยาม และ เวปบ้านมหาโดยอ้ายบ่าวคนเดิมที่เอื้อเฟื้อพื้ที่การนำเสนอ จร้า....
Bookmarks