แวะชิมริมทาง ตอน กินข้าวปุ้นที่ร้านข้าวปุ้นริมทาง

[บักขามป้อม]

ตามที่พี่น้องบ้านเฮาฮู้กันกะคือ ช่วงนี้ขามป้อมกำลังรับบทแม่ค้า เดินสายตะลอนๆ
อยู่ทางอิสานใต้ บุรีรัมย์-สุรินทร์ คิวงานทางเจ้าภาพเพิ่นกะวางไว้ยาวไปจนฮอดเดือนกันยาพุ้นล่ะจ้า
สถานที่สวยๆงามๆ อ้ายเต็มเลากะรับหน้าที่ถ่ายทอดออกมาให้พี่น้องบ้านเฮาได้เบิ่งกันไปแหน่แล้วเนาะจ้า

ขามป้อมกะเลยมีความคิดว่า บ๊า เพื่อบ่เป็นการยาดกล้องกัน (กล้องเพิ่นฮ้างเลยมายึดกล้องขามป้อมไป) โอ๊ะ เพื่อเป็นการแบ่งหน้าที่กัน
ขามป้อมจิรับหน้าที่นำเสนอเมนูเด็ดๆ ริมทางที่ผ่านไปแวะชิมมาฝากพี่น้องบ้านเฮาดีกว่าซั่นดอกจ้า

แวะชิมริมทางตอนแรก ประเดิมกันกับข้าวปุ้นริมถนน พิกัดออกจากอำเภอสตึก มุ่งหน้าไปทาง อ.พยัคฆภูมิพิสัย
ก่อนที่จิฮอดแยก อ.ชุมพลบุรี ร้านข้าวปุ้นจิอยู่ทางซ้ายมือจ้า






หน้าร้านมีไก่ย่างนำ(แต่มื้อนี้บ่ขาย) ลาบ ก้อย ตำบักหุ่ง อาหารอิสานทั่วไป
บริเวณร้านกะสิมีซุ้มให้เลือกนั่งได้ตามอัธยาศัยจ้า
ร้านเพิ่นอยู่กลางท่งนา บรรยากาศดีจ้า




แต่พระเอกของงานนี้ คือข้าวปุ้นน้ำยาจ้า ข้าวปุ้นเพิ่นบีบเองสดๆ เส้นน้อยๆนุ่มดีขนาดจ้า
น้ำยาข้าวปุ้นมีสองแบบคือ กะทิ กับน้ำยาป่า
สินั่งกินอยู่ร้าน หรือซื้อเมือไปกินบ้านหรือเป็นของฝากของต้อนกะได้จ้า






ขามป้อมกะเลยลองสั่งมาซิมเบิ่งก่อนจ้า เอาข้าวปุ้นเคิ่งโล (ซิมเด้นิ) น้ำยากะทิถ้วยหนึ่ง
ถึกใจหลายกะแม่นเพิ่นเสิร์ฟผักสดๆ จานบักใหญ่นิล่ะจ้า








พลขับเลาฮองท้องเบิ่งก่อนจักติ้ว ซำพางพ่อครัวเพิ่นเฮ็ดลาบแล้วพานะ





บ่ทันดน ลาบกะพร้อมเสิร์ฟจ้า
ค่าเสียหายทั้งเบิด 97 บาทขาดโตจ้าพี่น้อง
แซบ คุ้มค่า ราคาเป็นกันเอง กินบ่เบิดเพิ่นกะห่อให้พร้อมจ้า
พี่น้องบ้านเฮามีโอกาสผ่านไปทางนั้นกะลองแวะซิมได้เด้อจ้า "แซบจนอยากบอกต่อจ้า"











ท้องอิ่มแล้วกะเดินทางต่อจ้า ฮอดจุดหมายกะจัดหนักไปอีกกับตำบักหุ่งอีกจักครกพานะ
ขอบคุณพื้นที่แบ่งปันจากเว็บบ้านมหาดอทคอมจ้า
พ้อกันใหม่เร็วๆนี้กับเมนูเด็ดๆ จ้า