อย่าบอกไผเด้อว่าข่อยใช้โทรศัพท์ปลอม

[พล พระยาแล]

ซูมื่อนี่สินค้าจากจีน ข้าวของเครื่องใช้เล็ก ๆ น้อย ๆ ไปจนฮอดของใหญ่ ๆ โดยเฉพาะมือถือจากจีน แท็บเล็ตจากจีน กล้องจากจีน รวมถึงสินค้าและอุปกรณ์ไฟฟ้าอื่น ๆ ล้วนมาจากจีน หรือทางไต้หวันทั้งสิ้น

มีอยู่ช่วงหนึ่งโทรศัพท์ฟรีเวอร์ โทรศัพท์เบิ่งทีวีได้ และโทรศัพท์อื่น ๆ ผมไปราชการทางอุดร หนองคาย มีคนฝากซื้อโทรศัพท์กันหลายคน ซูมื่อนี่ยกตลาดอินโดจีนมาไว้คลองถม ทั้งขายทั้งซ่อม มีอุปกรณ์เพียบ บ่ต้องเดินทางไปไกล บางเทือทางพุ้นต้องมาซื้อทางพี้ :l-

มือถือรุ่นใหม่ ๆ ออกมาบ่ทันดน กะมีโทรศัพท์เวอร์ชั่นของจีนซอดพ่อล่อมาแล้ว มีเกรดบี และเกรดเอ วางขายตามฟุตบาธ เต็มไปเบิ๊ด ราคาบ่กี่พัน มีหลายเกรดให้เลือก คนบ่ฮู้กะนึกว่าของแท้ เสียเงินไปเป็นหมื่น

สินค้าเกรดเอ คุณภาพใกล้เคียงของจริง รูดปึ๊ด ๆ คือกัน โทรศัพท์ราคาสองสามหมื่นที่กำลังดังอยู่ขณะนี้ ข่อยไปซื้อที่พันธุ์ทิพย์เกรด A ราคาบ่กี่พัน (บอกราคาบ่ได้เมียสิด่า) เอามาใส่กรอบเข้าไป ว่าแมนของจริงพุ่นแหล่ว คนบ่ฮู้ให้ราคาข่อยเป็นหมื่น แต่บ่ขายดอก เขามาฮู้ทีหลังแล้วมันเสียความรู้สึก :l-

ขนาดคนขายโทรศัพท์แท้ ๆ กะยังทึ่ง ว่าเฮ็ดได้จั่งใด๋มาคือคักคือแหน่แถะพะนะ หย่างไปแถว ๆ คลองถมรุ่นเดียวกันเป๊ะ ราคาถึกกว่ากันเป็นพัน ข่อยแล่วเคียดให้จะของคัก

สินค้าไอที โดยเฉพาะมือถือราคาแพง ๆ ขายข้าวปัดลานกะยังบ่พอซื้อ ทางเลือกกะคือของเทียบนี่ล่ะ ใส่กรอบเข้าไปบ่มีไผฮู้ดอก ใช้ได้คือกัน (ในระดับหนึ่ง) ต้องถามเจ้าของว่าจุดประสงค์เอาไปเฮ็ดหยัง

ในชีวิตผมส่วนหลายสิหาแต่สินค้ามือสองมาใช้เพราะงบบ่ถึงบ่มีเงินพอ จั่งต้องเลือกเอาแต่ของมือสอง (อิอิ) แต่ต้องตาถึงแนเด้อล่ะ บ่แมนเห็นใส่ชุดขาว ๆ บอกว่านักศึกษา ๆ แล้วแล่นใส่ตะพึด...โอ๊ะ ๆ เว่าเรื่องมือถืออยู่เนาะหวัดใด๋อ่ะ...555

ของบางอย่างแกะของเก่ามาประกอบใหม่ใส่กรอบขายให้เฮา ข้างในยัดฮอดกระดาษหนังสือพิมพ์ ของบางอย่างเจ้าของใช้เบื่อแล้วขายถิ่ม คุณภาพยังดี เช่น กล้องถ่ายรูปที่ผมใช้อยู่พร้อมเลนส์ มีคนมาถามซื้ออยู่แต่ผมบ่ขาย เพราะขายแล้วไปหาซื้ออีกบ่ได้ ดน ๆ จั่งสิพ้อเทือหนึ่ง คือเนื้อคู่นั่นล่ะ... อีกอย่างเบิ๊ดงบนำล่ะหวา...555

แต่บางเทือผมกะพลาดคือกัน ถึกของยัดใส้ มาฮอดบ้านใช้บ่ได้ ย่านเมียเห็นกะเอาเสี่ยงไว้ ถ้าซ่อมบ่ได้อีหลีกะยัดใส่ถุงขยะถิ่ม เสียเงินกับส่วนนี้ไปหลายตังค์คือกัน

แท็บเล็ตราคาพันกั่ว สองพันกั่ว ซื้อให้ลูกหลานเล่นแนเด้อ เดี๋ยวสิว่าบ่อินเทรนนำเพิ่น หาเกมเบาสมองและสร้างสรรค์ มาให้เด็กน้อยเล่น ข้อดีคือฝึกสมาธิเด็กให้จับจด ข้อเสียคือย่านแต่พ่อมันแอบไปโหลดหนังมาเบิ่ง ลูกไปเปิดพ้อพอดี บาดนี่ล่ะสมาธิเด็กน้อยสิกระเจิง

ลิขสิทธิ์บน YouTube Credit By : https://www.youtube.com/watch?v=4ZTZjIVhAQE

อัน ๆ .... เว่านี่ถิ่มนี้เด้อ อย่าบอกไผล่ะว่าข่อยใช้โทรศัพท์มือปลอม...ข่อยอยากอายเพิ่น