ก่อนอื่นกะขอสวัสดีปีใหม่ ๒๕๕๖ กับไทพี่น้องสมาชิกบ้านมหาดอทคอม ทุกผู่ทุกฅนเด้อครับเด้อ ขอให่มีควมสุข ควมเจริญ ร่ำๆรวยๆทุกถ่วนหน่ากัน สวัสดีปีใหม่ครับผม
หลายเดือนแล้วที่บ่ค่อยได่เข่ามาในบ้านมหาแบบเต็มโต ได่แต่มาจอบหลอย เนื่องจากว่าคอมมีปัญหามันอืดโหลดรูปกะซ่า ตอนนี่กะไคแนแล้วได่ของใหม่เล่นแล้วกะพอสิได่เข่ามาม่วนกับไทพี่ไทน้องอีกเทือ....
ก่อนส่งท่ายปีเก่าต้อนรับปีใหม่ วันที่ ๓๑ ธ.ค. ๕๕ กะได่เมือบ้านกาฬสินธุ์ ไทพี่น้องที่ไปเฮ็ดงานหางไกลกะเลยมาตุ้มมาโฮมกันยูบ้าน กะหาแนวมาสู่กันกิน มาๆไทพี่น้องมามาลุยนำกัน แนวแซบอิสานบ้านเฮานี่หละ ของมักของแซบ....:b-b
ชุดแรกครับเอากันแต่เซ่าสองโมงเซ่า บ่คู่แข่วกัน
ซุมเนื้อติดเอ็นติดมันกะเอาไปอู๋ใส่เพี้ยมาจิ้มแจ่วเพี้ยกะแซบคือกันเนาะพี่น้อง
โดนๆได่มาตู๊ดกินคักๆนี่ จะแมนมันแซบคักซะไทพี่น้อง
เลยไปเอามาอีกแบบสดๆเป็นชุดที่สองเลยมื่อนี่ไปถ่าเอากับหม่องเลย
ก่อนอื่กะเฮ็ดแจ่วเพี้ยขมๆ ขมแป๋ตายคือว่านั่นหละ หลายฅนพอแต่เอาซิ้นมาวางลงกะกลืนน้ำลายลัดแล้ว....
พ่อครัวบ่ต้องห่วงครับหลายเป็นฮ้าย ซุมนั่งถ่ากะกลืนน้ำลายไปนำ หลอยหยิบกะมี
มาครับมาซอยไปนำกินไปนำ แก้คาวไปนำมันจังแซบเพิ้นว่า....
ส่วนหนึ่งกะฟักเฮ็ดก้อยไป เฮ็ดได่หลายอย่างหลายแนว
มาเด้อพี่น้องมากินเข่าเซ่านำกานนนน
จะแมนอิ่มจะแมนกินเข่าแซบซะมื่อนี่ที่ได่มาม่วนมากินเข่าโฮมกันกับไทพี่น้อง
กะเป็นประเพณีทุกเทืออยู่ดอกที่ไทพี่น้องมาตุ้มมาโฮมกันทุกหน่าเทศกาล จะต้องมีต้นดอกเงินไปถวายวัดนำทุกเทือ....สาธุ ให่เดินทางกลับไปทำมาหากินโดยควมปลอดภัยทุกหลักกิโลเมตร ให่ร่ำให่รวยกันทุกๆคนเด้อ แล้วกลับมาตุ้มมาโฮมกันใหม่ พุ้นหละสงกรานต์เด้อพี่น้องเด้อ
ขอขอบคุณพื้นที่ บ้านมหาดอทคอมที่ให่นำเสนอ "มาเด้อพี่น้องมากินซอยจุ๊-ลวกจิ้มนำกัน
Bookmarks