........... ฮักเจ้าคือเก่าเด้อ .........

[NONGNAN]

อั่น ๆๆๆๆๆๆๆ ฮอดใส แล้ว โอ๊ะ นำบ่ทัน 555555

[บ่าวโจ่โล่]

อาการคือสิเป็นไข้ คือสิได้ล้มนอนเสื่อ ข้าวกะเบื่อบ่อยากน้ำ ตามคอแห้งกะแหล่งขม
ย่านเป็นลมคิดฮอดน้อง น้ำตานองเป็นคลองแก่ง เหลือใจแฮงยามห่างเจ้า ได้แต่เว้าว่าคิดถึง
คำหวานหวาน คำซึ้งซึ้ง คือติดตรึงบ่เคยหน่าย นอนห่มผ้าตากเดือนหงาย กะคือกลายเป็นฮ้อน อาวรณ์เว้าแต่ห่วงหา
เจ้าคือทิ่มมัดกล้า ไว้นำป่ากลางดอน คือถิ่มขอนไว้กลางดง สิ่งประสงค์บ่คือแท้
ชายตาแลเบิ่งเสื้อผ้า ชุดได๋หน๋าอ้ายเคยไส่ มื้อพ้อเจ้าเอาชุดได๋ มื้อจากไปมีชุดนั้น ยังฝันพ้ออยู่บ่เซา
มื้อนี้เหงาเฮ็ดออ้ยซ้อย นั่งเหม่อลอยน้ำตาหลั่ง ได้คิดพ้อแต่ความหลัง น้ำตาพังยามอยากพ้อ อยู่ไสน้อที่รักเอย

.............. บ่ได้แต่งดนหลาย จักสิแต่งหยังดอก พี่น้องเอ๊ย จักแม่นถามหากันดี......................

[NONGNAN]

เป็นแนวได๋น๊อญา อ้ายคือล้มหมอนนอนเสื่อ
น้องเป็นห่วงเอาเหลือ ยามได้ยินอ้ายเว้า ว่าข้าวน้ำบ่อยากกิน
ใจถวิลคิดนำชู้ ผู้แฟนเพิ่นเป็นแนวได๋
นางอยากเอาหัวใจ ไปลองซับน้ำตาอ้าย
ผู้คมคายคารมเว้า ซ่างมาเป็นน๊อแนวใหม่
คันว่าทางหัวใจ ของพี่ชายว่านั้น สิเหลือบ้างแหน่บ่น๊อ
สาวอุบลอยากพบพ้อ แต่จนใจอยากอายเพิ่น
ดวงซาตาตกกะเทิน เกิดเป็นสาวผู้ขี้ฮ้าย ย้านทางอ้ายสิหน่ายแหนง

[บ่าวโจ่โล่]

อ้ายยืนยัน พันเทื่อเว้า บ่ได้เก่านำเวลา ถ้อยคำจากะคงเดิม ยังต่อเติมทางใจอ้าย

ยามได๋หาย บ่เห็นหน้า บ่แม่นว่าสิลืมเธอ บ่ลืมเด้อความคิดถึง เทียวจ่องดึงไปหาเจ้า

นับมื้อเหงา เหลียวเบิ่งฟ้า แฮงโรยรามื้อเจ้าห่าง ระยะทางสิไกลไกล้ หัวใจอ้ายบ่ห่างกัน

ได้แต่ฝัน ว่ายืนข้าง ฝันว่าย่างตางควงแขน แอบหวงแหนอยู่ในฝัน ว่าเจ้าปันใจหนีอ้าย

บ่เว้าหลาย ดอกเด้อหล่า เพียงอยากจานำความเก่า กะคำเดิมที่สิเว้า ว่าฮักเจ้าคือเก่าเด้อ

[คนเมืองแปะ]

อ้านแปะยังฮักเจ้า บ่ลืมเก่าความหลัง
บ่เคยป๋าเพม้าง ควมจาต้างเคยเว้าจา
บ่ลืมคำสัญญา มื้อยุนาดอกเถียงน้อย
อ้ายยังคอยยุหม่องนั้น คอยคืนวันสิพ้อหน้า
คอยมื้อได้สบตา อยู่เถียงนาดอกหม่องเก่า.....เด้อนาง

[บ่าวโจ่โล่]

ฝนสิลาฟ้าสิร้าง บ่เหินห่างเด้อทางใจ
ความคิดได๋กะถึงเธอ ฮักเสมอบ่มีเว้น
ได้คิดเห็นแต่หน้าเจ้า อยากจาเว้ายามหมองหม่น
คิดเห็นคนจั่งอ้าย ผู้หมายซ้อนแน่บ่น้อ

สิให้รอจนฝันค้าง มีอ้างว้างถ้าเป็นหมู่
ยามขึ้นภูหรือลงน้ำ กะถามเว้าว่าคิดถึง
บ่อาจมีคำลึกซึ้ง หรือตรึงใจสิจาต่อ
ไคแต่ขอจาเว้า ว่าฮักเจ้าคือเก่าเด้อ ซะหล่ะหละ

[บักขามป้อม]

บ่ผิดหวังจักเทื่อเลยจ้าที่เห็นกระทู้ของอ้ายบ่าวโจ่โล่ ผญากะซึ้งเพลงกะม่วนเนาะอ้ายเนาะ

[ลาวสวิส]

อั่นอ้ายโจ่ น้องฟังบ่ได้ดอก ได้แต่อ่านเอา แต่กะซึ่งคักยุจ้า...

[คนไกลบ้าน2009]

กลอนอ้ายโจ่โล่อ่านเถื่อใด๋กระยังซึ้งคือเก่าน้อครับน้อ

[ติ๋ม เปอร์โย]

ยังคะนึงยุเด้อ้าย....จนมื้อตาย พุ้นคิดว่า
คำวาจาที่อ้ายเว่า...."ยังฮักเจ้าคือเก่าเด้อ"
บ่เคยเผลอยังคงมั่น....ทุกคืนวันยังคงท่อง
ฮู้บ่น่อ ใจอิน้อง มันหลงฮ้อง ว่า ..."คิดฮอด" ... พุ้นใด๋....

บ่แล้งกะท่วมหละงานหนี่....:l-