มื้อก่อนผมกลับอีสานไปงานแต่งหมู่ อยู่ชุมพวง โคราช แวะนอนบ้านสาวขะแมร์
ไปสบจังหวะทางเขาพนมรุ้งเพิ่นเอาบุญลงปลาเดือนสี่คือกัน กะเลยได้ถ่ายรูปบรรยากาศมาให้พี่น้องเบิ่ง
บ่ายวันเสาร์ที่ 23 มีนา ก่อนมื้อบุญมื้อนึ่ง ทางกองปะรัมพิธี ประโคมเครื่องไฟ เปิดกันตรึมหมอลำครึกครื้น
พร้อมประกาศเชิญชวน บอกกติกาเงื่อนไข ข้อตกลงต่างๆ
เซียนปลาขนอุปกรณ์เดินทางจากแดนไกล มาจับจองเดิ่นท่าน้ำก่อนมื้อลงจริง
เซียนปลารุ่นจิ๋วกะพากันวอร์มอัพ โตนน้ำเพื่อให้โตคุ้นเคยกับกระแสน้ำนิ่ง
รถขนโป๊ะเรือแพ เข้ามาลงเครื่องมืออุปกรณ์หาปลาเบิดมื้อ
ผมออกเดินทางจากบ้านสาวขะแมร์แต่เช้า เพื่อให้ทันแห่เจ้าบ่าวที่ชุมพวง
ตีห้า ทางผ่านเลยแวะเบิ่งอีก พรานปลาจากทั่วสารทิศ ทยอยกันมาฮอดและจ่ายค่าธรรมเนียม ผืนแห ละ 100 บาท
รถแน่นเอี๊ยดรอบอ่างตั้งแต่เช้ามืด
กำหนดเริ่มเป่านกหวีดจุดพลุกันแปดโมงเช้า เสียดายที่ผมจะไม่ได้เห็นบรรยากาศช่วงวินาทีนั้น
เสียดายหลาย ปีถัดๆ ไป สิหาโอกาศมาเบิ่งมาชมให้ได้
แต่ขากลับจากงานแต่งสิแวะมาเบิ่งอีกเทือ เผื่อเพิ่นยังบ่เลิก
ขับรถกลับจากชุมพวง ลำปลายมาศ เห็นกะบะหกล้อ ตุ๊กตุ๊กอีแต๋น พร้อมอุปกรณ์ สวนทางเป็นสาย
ทันบ่น้อ พากันเซาก่อนซะน้อ ฮ่ำฮอนย่านบ่ได้ถ่ายรูปครับ
หาหม่องจอดรถได้ ฟ่าวแล่นขึ้นไปเบิ่ง โฮ้….ยังอยู่ครับพี่น้อง หลังจากกลับไปเกือบเบิดแล้ว กะยังพอมีอยู่
เริ่มจัดการเก็บภาพ
รอบเขาพนมรุ้งมีอ่างเก็บน้ำหลายอ่างครับ นี่เป็นอ่างฝั่งอำเภอประโคนชัย บ้านสาวขะแมร์ อ่างใหญ่เติบ
เป็นประจำทุกปี ก่อนสงกรานต์ ก่อนเทศกาลขึ้นเขาพนมรุ้ง เพิ่นกะสิลงปลากัน
ค่าผืนแห หรือค่าผ่านทาง หรือค่าธรรมเนียม 100 บาท แลกกับปลาตามที่เห็นสำหรับผู้บ่หมาน
ผู้หมาน บางปีกะได้ถุงปุ๋ยนึง
เป็นปลาปล่อยครับ เก็บเงินได้เพิ่นกะซื้อลูกปลามาปล่อยปีละหลายแสนโต รอดจากธรรมชติแต่บ่รอดคน
ปลาทะเพียน อีสบ ยี่สก นิล ไน หมู่นั่นละ แต่ปลานิลน้อยหรือปลานิลหินสิหลาย อาจเพราะออกแม่แผ่ลูกนำ
พรานปลาเจ้าถิ่นหรือมือดีจากบริเวณใกล้เคียง สุรินทร์ ศรีษะเกษ โคราช ขอนแก่น สารคามกะมีสำหรับผู้เคยหมานกะสิบ่พลาด
อาจสิเป็นพรานปลาเจ้าถิ่น บ่ค่อยหมานปานได๋ เอาอยู่จนบ่าย
เวิ่น….แหบ่ได้ย้อม
แหสานใหม่ๆ สำหรับงานนี่โดยเฉพาะ ตาแหต้องห่างถี่ตามกำหนดกติกา
บรรยากาศยามบ่าย
บ่ายสองบ่ายสาม หยังสู้บ่ถอย
ร้อยนึง ได้ปลาค่อสองโต กับปลานิลตะเพียนอีกชะลอม คุ้มอยู่ดอก
ปีที่ผ่านมาแล้งคัก ปลาเลยโตบ่ใหญ่ ถ่าปีหน้าค่อยมาแก้มือกันใหม่
หมู่โตใหญ่ที่ได้รางวัลไปแต่เช้าว่า 9 โล 10 โลกะมีหลายคักอยู่ครับ ขึ้นอยู่กับโชคและฝีมือเนาะ
อ่างบ่แม่นน้อยๆ รอบอ่างรถจอดเต็มไปเบิ้ด ม่วนปานเอาบุญเดือนหก
แอคชั่นงามๆ เสียดายถ้าแม่นมื้อเช้านี้ คือสิคัก คือสิเวิ่นๆ เต็มน้ำ
กล้องน้อยๆ กะบ่ค่อยเป็นใจ ถ่ายหลุย ถ่ายหลุย ซูมกะบ่ฮอดนำ เว้ามากะจะแม่นนานได้มีเงินออกใหม่
หนักปลาหรือบ่หมานกะบ่ฮู้นำ ขนของขึ้นรถ สิได้ปลาแดกพอแล้วละตี้ ซุมพี่น้องกะดาย
ปีหน้าค่อยมาจอบใหม่เนาะพี่น้อง ปีนี้ได้แค่สุยไปสุยมาซำนี่ละ บ่ได้ปลาโตใหญ่นำเพิ่น
เป็นโอเพ่นเด้อครับ สำหรับทุกท่านที่สนใจอยากพิสูจน์ฝีมือ
ปีนี้หากฝนดีน้ำหลายปลากะสิโตใหญ่นำ ปีหน้าพี่น้องนักสะดำทั้งหลายกะสิได้ม่วนกันอีก
ขอบคุณบ้านมหา ปีหน้าถ้าโชคดีสิหาภาพ ปลาโตใหญ่ๆ มาให้เบิ่งครับ
Bookmarks