หลายคนอาจสิบ่ฮู้ หน่อไม้ถุงเป็นแนวได๋ ตามนี้เด้อครับ http://www.plengpakjai.net/index.php?topic=4143.0
ได้หน่อไม้ถุงลงมาแต่บ้าน มาฮอดกรุงเทพเลยซุปสู่ ผบ.กิน กินแต่กระเพาไก่ใข่ดาว กับก๋วยเตี๋ยวหลายกะหน่ายเป็นเด้เนาะ
วัตุถุดิบ สำหรับเมนูซุปหน่อไม้ครับ
- หน่อไม้ถุง
- ผักชี ต้นหอม หอมแดง ใบหอมเป สำหรับใส่ซุปหน่อไม้
- ผักอิเลิด กินกับซุปหน่อไม้
- พริกสด หรือพริกป่นกะได้
- ผงนัว
- น้ำปลา น้ำปลาแดก
- น้ำย่านาง
- เกลือ
- บักนาว
ย่านางกะได้มาแต่ทางบ้านเฮาพุ่นล่ะครับ ถืกฝนใหม่ งามดีปานหยัง
ขั้นแรกเลย ล้างย่านางให้สะอาด หย่องให้ได้น้ำย่านางข้นๆ กรองกากใบออกเตรียมไว้ครับ
ปกติแล้ว หน่อไม้ก่อนเฮาสิเฮ็ดกิน เฮาต้องต้มให้จือสาก่อน บ่ซั่นมันสิขมแฮง
แต่สำหรับห่อไม้ถุง บ่ต้องต้มน้ำอีกครับ สามารถนำมาปรุงอาหารได้เลย ย่อนว่ามันจืดแล้ว
แกะน่อไม้ออกจากถุง ล้างน้ำก่อนน้ำนึง แล้วเอาใส่หม่อเทน้ำย่านางลงไปพอท่วม
ปรุงรสโดยการใส่เกลือ น้ำปลาแดก ผงนัวลงไป บ่ต้องหลายเด้อครับ เอาพอนัว
ถ้ามีผักอีตู่กับหัวซิงไคให้ใส่ไปนำพร้อม สิได้เพิ่มกลิ่นหอม จากนั้นยกค้างไฟเลยครับ
ขั่นตอนนี้เอิ้นว่า อุหน่อไม้ครับ
กะว่าน้ำย่านางสุก ออกสีเขียวแก่ๆแล้ว กะยกลงตักหน่อไม้พักใส่จานให้เย็น
จี่พริกดิบเตรียมไว้นำ
โขลกพริกจี่ให้แหลก ใส่หน่อไม้ที่เย็นแล้วลงไป ซอยผักชี ต้นหอม หอมแดง ใบหอมเป ใส่ลงไป
ปรุงรสด้วย น้ำปลา ผงนัว ข้าวคั่ว บักนาว 1 ซีก คนให้เข้ากันซิมเบิ่ง แซบแล้วตักใส่จานเลยครับ
ผักกินกับซุปหน่อไม้
แนวกินตื่มครับ ย่างคอหมู เคล็ดลับคือหมักแล้วเอาใส่กล่องเข้าตู้เย็น เก็บไว้ 2-3 มื่อก่อนจั่งนำมาย่าง
สิเฮ็ดให้น้ำหมักเข้าเนื้อ หมูนุ่ม แซบอีหลีครับ (บัดได๋แท้เพินหมักไว้แล้วบ่มีเวลาย่างซือๆดอก)
ย่างสุกแล้วกะเอามาหั่นให้พอดีคำ
มาครับ แล้วเบิดทุกอย่างแล้วกะหาพาข้าวออกสู่กันกิน กับบรรยากาศยามเช้าวันหยุดทางลาซาล
กินอิ่มแล้วกะนอนเว็นเบิ่งโทรทัศน์ บ่อยากออกไปเลาะใส ย่อนแดดฮ้อนคัก
เล็กๆน้อยๆจากทีมงาน ขอบคุณบ้านมหาสำรับพื้นที่นำเสนอครับ
Bookmarks