อ่อมปลาดุกใส่ผักอ่อมแซบ(สูตรทดลองจากผักข้างฮัวปลูกเอง)

[นู๋น้อย]

ธุจ้า พี่น้องบ้านมหา เป็นเวลาหลายมื้อเติบที่ บ่ได้ เข้ามานำเสนอ เมนูแปลกและแวกแนวชาวบ้านเผิ่น มื้อนี้ มี เมนู จากผักข้างฮัว ปลูกเอง เอามาปรุงเมนูบ้านๆ ตามกะเยิม ของคนผลัดถิ่นไกลบ้านมาอยู่เมืองใหญ่กลางป่าอุตสาหกรรม ( ป.ลิง บรรยายเป็นภาษาอีสาน(ใต้)

อ่อมปลา เชื่อว่าหลายๆคนคือจะยังจำได้แต่ละท้องถิ่นจะมีวิธีการปรุงแตกต่างกันไปขึ้้นอยู่กับวัตถุดิบของแต่ละบ้านและความชอบส่วนบุคคล



มื้อนี้ เลือกที่จะกินปลาดุก (มักกินปลา) ซื้อปลาดุกมาจากตลาด 1 โต 25 บาทถ้าเป็นปลาดุกนาแฮ่งจะแซบ
แต่นี้บ่มีปลาดุกเลี้ยงกะได้ พอไหว พร้อม ไข่ปลาที่เขาแยกขาย(จานละ 20 บาท) ส่วนมากเป็นไข่ปลาจีน
แต่มื้อนี้โชคดี ได้กินไข่ปลากดกับไข่ปลาดุก(ปลาที่เขาสับเป็นชิ้นๆขายสำหรับคนที่บ่มักแบบเป็นโตๆ)




และผัก จากข้างฮัว ยุโรงงาน ปลูกไว้ บัดนี้ ออกดอกออกผลแล้ว ผักอ่อมแซบ(บุษบาริมทาง)



กับ บักงูเงี้ยว(บวบงู) ผักอิเลิศ( ใบชะพลู)
ส่วนผักหอมต้นกับผักชี ซื้อเอาจ้า



เครื่อง ปรุง ตามกะเยิม

ข่าอ่อน ตะไคร้ พริก หอมหัวแดง(จากสีเกด) ขิงอ่อน(แล้วแต่มักบางคนบ่ใส่)



วิธีปรุง บ่มีหยังหลาย ง่ายๆตั้งหม้อใส่น้ำพอเอาะเจาะใส่เครื่องแกงที่ทุบๆ (ถ้ามีครกกะใช้วิธีโขลกเอาจั่งรสจัดจ้าน)ตามสภาพที่บ่มีครกเลยต้องทุบเอา



พอหม้อแกงเดือดๆแล้วกะ เอาน้องปลาลงเล่นน้ำ ตามธรรมชาติ ปรุงรสด้วย เกลือ ผงชูรส น้ำมะขามเปียก(ดับคาวปลา)
ถ้ามี ส้มอย่างอื่นกะทดแทนกันได้ น้ำปลาร้า(แล้วแต่คนมัก บางคนบ่ใส่)



พอปลาสุก ซิมรสชาด นัว กลมกล่อม แล้ว ใส่ผัก ตามไป



สุกแล้ว ทั้งผักและปลา ซิมอีกรอบ เพื่อความชัวร์ ใส่ข้าวคั่วเป็น ลำดับสุดท้าย



รสชาด ถึกใจแล้ว ตักใส่ถ้วย ตกแต่ง ให้สวยงามตาม รสนิยมคนปรุง พออุยุอายะ สร้างบรรยากาศที่สวยงามในการ กินข้าว(แลง)



และแล้ว แนวกินแล้งกะเรียบร้อย กินคนเดียว เลยใช้ถ้วยน้อยๆ แต่ แน่นใน ความสุขของคนไกลบ้าน(600 กั่วกิโล จากสีเกดมา ชลลี)
คือการได้กินอาหารบ้านๆ ที่ต่างจากอาหารตามสั่งในเมืองใหญ่

สุดท้ายนี้ ขอบคุณพี่น้อง ที่แวะ มาเยี่ยมยาม ถามข่าว พ้อกันใหม่ ในเมนู ต่อไป:*-

ลากันด้วย ดอกบักงูเงี้ยว(บวบงู) ข้างฮัว ผักพื้นบ้านยามหน้าฝน





ขอบคุณ เจ้าของพื้นที่ บ้านมหาและอ้ายบ่าวคนเดิม คือเก่าจ้า ธุจ้า

[pcalibration]

โอ้..หายไปดนเติบสงสัยหว่าแหม่นไปแอบหัดเฮ้ดอาหารฝาหรั่งตี้ซั่นดอก
แค่ชื่อเมนูกะบ่งบอกตัวตนหว่าเป็นคน..บ้านนอกแล้วหล่าเอ้ย..
(บ่มีไผอยู่ในไหจั๊กคนดอกเนาะ)เบื่ออาหารจำพวกแกงถุง อาหารสิ้นคิด
กะหาวัสดุมาปรุงเองตามภูมิประเทศจั่งแซบถืกปาก
เชิญซั่นแล้วหล่ะ อยากมีหมู่กินนำกะเอิ้นข้างๆห้องกะได้ หรือpm มาแจ้งก่อน555

[นู๋น้อย]

ข้างๆ ห้องเขา พากันกินแซนวีส กะ สปาเกตตี้ บ่กล้าเอิ้น คะเจ้า ย้านดั้งคะเจ้ายุบ

:b-b ว่าจะ เอาดีทางอาหารฝาหรั่งยุจ้าอ้ายพี แต่บ่รุ่ง เลยหันกลับมาหา ฟู้ด ฟอร์ เฮาส์ คือเก่า แบบว่า มันบ่ใซ่

ส่วนมาก น้องจะปรุงกินเอง จ้า มีบางมื้อ(ดนๆๆเทื่อ) ที่พึ่งพาอาศัยแกงถุง เพราะจื่อแล้ว กินละท้องเสีย

มาม่ากะต้มเองเด้ ขอบอก อาหารอิปุ่น

[เซียงเหมี่ยงเมืองสุรินทร์]

เป็นตาแซบครับ ดีเจ นู๋น้อย...
ผักสด ๆ รสชาติดี ที่สำคัญปลอดสารพิษ ครับ...

[นู๋น้อย]

:b-b จ้าอ้ายเซียงฯ แซบ นำผักสดๆ ที่เฮาปลูกและดูแลเอง ไร้สารเคมี หายห่วง แต่บ่ปลอดภัยจากหนอนชาเขียว ส่อง หาหน่วยบักงูเงี้ยวสุมื้อ ไปพ้อ หนอนกำลังกินยอดดอกพุด คึดพ้อดักแด้ อิแม่ เลย

[เซียงเหมี่ยงเมืองสุรินทร์]

จับมาใส่อ่อมนำกันโลดครับ เพิ่มโปรตีน ฮ่า ๆ ๆ ...

[คนภูหลวง]

สุดยอดแล้วอาหารใด๋กะสู้อาหารอีสานฟู้ดฟอร์เฮาส์บ้านเฮาบ่ได้ดอก อยู่ทางพี้ส่วนมากกินแต่อาหารป่า แกงแกะ (แกะหนังยาง แกงใส่ถุงมาคันบ่แกะกะบ่ได้กิน)

[พวงพยอม]

เอื้อยมักปลาดุกจ้าน้องนู๋ เอาไปเฮ็ดอีหยังก็แซ่บสุแนว
ฝีมืออ่อมเป็นตาแซ่บหลายเด้อจ้าน้องนู๋

[บ่าวมือสอง วัดไทร]

เป็นตาแซบเอาฮ่าย เห็นแล่วน่ำลายไหลฮาดๆ

[นู๋น้อย]

ธุจ้า ดีจ้าเอื้อยพวงพะยอม ขอบคุณจ้า คำติชม ฝีมือเฮ็ดไปตามกะเยิมจ้าเอื้อย ตามใจปาก แล้วแต่วัตถุดิบ ที่มี อยู่ กินเพื่ออยู่ และ อยู่เพื่อแสวงหาแนวกิน สโลแกน

อ้ายเซียงฯ มันบ่กล้าจับนี้ละ เบื้องต้น เลย ปล่อยมันเป็น บุคลลากรผีเสื้อต่อไป แบบว่า เกรงใจตามันน่าอ้าย หนังเกนียว ๆนุ่มๆ หนึบๆ บรึยยยย

:b-b กินกะข้าวเหนียว ข้าวจ้าว แซบเบิ้ด สุแนว ละ บ่าวมือสองฯ กินคนเดียวกะแซบคนเดียว ละงานนี้

พะนะ อาหารป่า คนภู สมชื่อ เนาะ แกงแกะ คือสิหายาหตามท้องตลาดทั่วไป กินดู๋ๆ บ่ดีเด้อ บ่าว อาหารป่าชนิดนี้ ใส่ผงชูรสหลาย ระวัง ผมจะดกปกไหล กั่วเก่า ละ

ขอบคุณทุกๆคำติชม เด้อจ้า ธุจ้า