สวัสดีพี่น้องบ้านมหาที่คิดฮอดคิดถึงซู่คนจ้า
มื้อวันที่ 19 กันยายน 2556 ที่สิฮอดนี้ ตรงกับมื้อขึ้น 15 ค่ำเดือน 10
เป็นมื้อบุญข้าวสากบ้านเฮาเนาะจ้า ช่วงนี้อยู่ตลาดสิคึกคักเป็นพิเศษ
เพราะว่าสิมี กล้วย ใบตอง กลอย ฯลฯ ออกมาขาย
บางบ้านบางเฮือนกะเริ่มคั่วข้าวตอกแตกเตรียมเฮ็ดกระยาสารทกันแล้ว
แต่เมนูที่ขามป้อมสินำเสนอมื้อนี้กะคือข้าวต้มกลอยจ้า บ่ได้กินดนแล้ว ปกติกะนึ่งแล้วโฮยน้ำตาลกินซื่อๆ แล้วกะนึ่งใส่บักอื๋อโฮยน้ำตาลกับบักพร้าวขูด
สำหรับข้าวต้มกลอยนี้พ่อใหญ่จ่อย โอ๊ะๆๆๆอ้ายดีเจเต็มเลาสายตรงไปหาเฒ่าแม่ทางหนองบัวลำภูโดยเฉพาะ ย้อนว่าขามป้อมเฮ็ดบ่เป็น แหะๆ
สูตรของเฒ่าแม่กะคือ ให้คั่นกลอยใส่กับกล้วยสุกให้แข่นๆ ให้ใส่น้ำตาลหวานๆ เพราะโดยธรรมชาติของกลอยมีรสชาติจืดอยู่แล้ว เพิ่นกะเลยมีคำเว้าที่ว่า "จืดปานกลอย" ขึ้นมา พานะ
เลากำชับว่าบ่ต้องใส่อย่างอื่นเลย ให้ใส่สองอย่างนี้ท่อนั้น ว่าแล้วกะมาเบิ่งวิธีการเฮ็ดกันจ้า
พระเอกกับนางเอกของงานนี้จ้า กลอยกับกล้วย
ใบตองกล้วยหลังบ้าน พ่อใหญ่จ่อยไปจัดการตัดให้แล้วกะตากไว้เทิงหลังคา ย้านเด็กน้อยข่วมใบตอง ข้าวต้มสิบ่สุก
แต่ว่าจักเลายากหรือลืมคราว ใบตองกะเลยสีเดียวกับสีผิวผู้ตัดตอง
ปานนั้นยังมีการว่า แซบบ่แซบขึ้นอยู่กับการคั้นกล้วยกับกลอยเด้อพุ่นน่ะเลาว่า
บ่อยากเว้าหลายหยายห่าง ขามป้อมเลยจัดการกล้วยกับกลอย
คั้นจนสุดความสามารถได้ซ่ำนี้ล่ะจ้า คันสิเอาไปใส่เครื่องปั่น กะสิบ่ได้รสซาติที่แท้จริงเนาะ
แล้วกะจัดการห่อ ขามป้อมห่อแบบขนมหมกจ้า เพื่อความสะดวกและบ่เลอะเทอะ คั้นไปคั้นมาเริ่มมีน้ำหวานจากน้ำตาลกับกล้วยออกมา หน่ายสีใบตองเนาะ
นึ่งสุกแล้วกะแบ่งไว้ถ่าใส่บาตร แล้วกะหยายพี่น้องผู้ละหมกสองหมกจ้า
ท้ายนี้กะอยากบอกว่า คิดฮอดพี่น้องบ้านเฮาคือเก่า
ขอบคุณพื้นที่แบ่งปันจากเว็บบ้านมหาดอทคอม สวัสดีจ้า
ขอบคุณพื้น
Bookmarks