อ่อมปลาเซียมใส่ผักซีลาว

[หยก ยโสธร]

สืบเนื่องจากตอนเมือยามบ้านหว่างออกพรรษาที่ผ่านมา มีแนวกินบ้านเฮามาฝากพี่น้องบ้านมหาหลายเมนูนำกัน
เมนูแรก ขอนำเสนอ "อ่อมปลาเซียมใส่ผักซีลาว" ตอนแรกว่าสิหมกเอาล่ะครับ แต่บ่ได้หาใบตองไว้

วัตถุดิบ
- ปลาเซียม หรือปลาเนื้ออ่อน
- หอมแดง กระเทียม พริกแห้ง หัวซิงไค
- ผักซีลาว ผักอีตู่ ต้นหอม

เครื่องปรุง
- เกลือ
- น้ำปลา น้ำปลาแดก
- ผงนัว (ขาดบ่ได้)

เช้าวันที่ 20 ตค. ตั้งใจตื่นขึ้นมาแต่เช้า พร้อมกับแม่ใหญ่เพินลุกนึ่งข้าวพุ่นล่ะ ย้อนว่าสิฟ่าวอ่อมปลาให้ทันไปจังหัน
จัดแจงเอาปลาออกจากช่องฟิชที่พ่อใหญ่เพินหาไว้ถ่า มาแช่น้ำให้น้ำแข็งละลาย คัวพุงปลาออก แล้วสับเป็นต่อน
ปลากะมีเทิงปลาเซียม ปลากด ปลากะแยงครับ เน้นเป็นปลาเนื้ออ่อน





เตรียมเครื่องไว้สำหรับตำเครื่องอ่อมครับ หอมแดง กระเทียม พริกแห้ง หัวซิงไค





ผักซีลาว ผักอีตู่ ต้นหอม ล้างแล้วเด็ดไว้สำหรับใส่อ่อม





รวมๆครับ





เอาเครื่องอ่อมที่เตรียมไว้ ซอยใส่ครก แล้วตำให้ละเอียด หยุบเกลือใส่ตอนตำเครื่องอ่อมนำหน่อยนึงเด้อครับ
จากนั้นกะตักใส่หม้อ หยอดน้ำเอาะเจาะพอได้จ้ำ แล้วกะปรุงรส





มื่อนี้ใช้เตาถ่านเฮ็ดแนวกินครับ ตอนเฮ็ดนี้กะตีห้ากว่าๆ สังเกตุบรรยากาศรอบๆยังมืดอยู่ สิเฮ็ดแซบซ่ำบ่บุ ย้อนบ่ทันส่างนอนยุ
อากาศบ้านเฮาตอนนี้กะเริ่มเย็นแล้ว มีหมอกแนยุ แต่บ่ถึงกับต้องใส่เสื้อแขนยาว
ฟ้าวเฮ็ดแต่เช้า ย่านบ่ทันเอาไปจังหัน มื่อนี้ทางวัดเพินเอาบุญออกพรรษาพร้อม





ถ่านไฟกล้าแล้วกะยกหม้อขึ้นค้างไฟเลยครับ ปล่อยให้เดือด บ่ต้องคนดู๋เดี๋ยวเนื้อปลาสิเละ





พอปลาสุกแล้ว ชิมรดชาดถืกปากแล้วกะใส่ผักลงไป ปิดฝาหม้อให้ผักสุกกะยกลงเสริฟได้เลยครับ





ฮอดตอนสุกแล้ว สิตักใส่ปิ่นโตไปจังหัน ฮอดกะบ่ได้ถ่ายรูปไว้ ย้อนว่าถืกใช้ให้ไปธุระในบ้าน เสียดายที่บ่ได้รูปครบขั้นตอน
เอาซำนี้ล่ะน้อพี่น้อง

เมนูนี้เอิ้นอีกอย่างว่า "หมกหม้อ" กะได้คือกัน ย่อนว่าวัตุดิบและเครื่องปรุงที่ใช้ อันเดียวกันกับเฮ็ดหมกนั้นล่ะ

เล็กๆน้อยๆจากทีมงาน ขอบคุณบ้านมหาสำหรับพื้นที่นำเสนอ ขอบคุณเอื้อย-อ้ายที่เข้ามายามกระทู้ครับ