หายไปหลายมื่อเติบครับ ย้อนยากเวียกยากงาน มื่อนี้พอมีเวลาว่าง เลยได้มีโอกาศนำเสนอเมนูให้พี่น้องบ้านมหาเฮาเบิ่ง
มื่อนี้มาในแนวอาหารป่าน้อครับ ในเมนู "คั่วเอี่ยน" วัตุถุดิบกะได้มาจากทางบ้านเฮาพุ่นล่ะ อ้ายเพินไปใส่บั้งลันมาไว้ถ่า ขังไว้จนจ่อย
แบ่งเฮ็ดกินยุบ้าน แล้วกะขังใส่คุเอาลงมาต้อนหมู่ทางกรุงเทพนำพร้อม ... เว่าหลายยายห่าง ลงมือเฮ็ดกันเลยครับ
ส่วนประกอบ
- เอี่ยน (ปลาใหล)
- พริกแห้ง กระเทียม หัวซิงไค ผิวมะกรูด
- ใบมะกรูด ใบกระเพา
เครื่องปรุง
- ซอสหอย ซีอิ้วขาว ซอส รสดี น้ำปลา ผงนัว
- พริกแกงเผ็ด เกลือ
- น้ำมันพืช
ขั้นตอนการเฮ็ด
ขั่นแรก เตรียมปลาใหลก่อนเลยครับ ขั้นตอนนี้ผมบ่สามารถเก็บภาพได้ ย้อนว่ามือเปื้อน ย้านกล้องถืกน้ำ ขออภัยหลายๆ
จัดการเอาค้อนทุบหัว ผ่าท้องเอาเครื่องในออก จากนั้นเอาสากทุบตามสันหลังให้กระดูกแตก ล้างให้สะอาด แล้วหั่นเป็นต่อนพอดีคำ
มื่อนี้ผมค้นพบวิธี ล้างเมือกปลาใหลจั่งได๋ให้สะอาด หลังจากลองมาหลายวิธี บ่ว่าสิเป็น เอาเกลือล้าง เอาสก๊อตไบร้ถู แต่เมือกเอี่ยนกะยังบ่เบิด
วิธีที่ว่ากะคือเอาน้ำบักกรูดครับ มื่อนี้ได้บักกรูดมาจากบ้านหลายหน่วย ผ่าครึงแล้วบีบเอาน้ำมันลงในกะละมังที่เฮาสิล้างเอี่ยนจัก 4-5 หน่วย
ตักน้ำใส่ลงไปจัก 2-3 ขัน เอาปลาใหลที่เฮาผ่าท้องลงไปล้าง ทั้งเมือก ทั้งเลือดปลาใหลสิจับกันเป็นก้อน ล้างออกง่าย บ่คาวพร้อม
ย้อนว่าถูกกรดจากน้ำบักกรูด บ่แน่ใจว่าสิใช้น้ำส้มสายชูแทนได้บ่ ลองเบิ่งเด้อครับ
ภาพนี้ได้เอี่ยนที่หั่นเป็นต่อนเรียบร้อย โตบ่ใหญ่ปานได๋ครับ บ่เป็นหยัง แซบคือเก่า
ต่อมากะเตรียมสมุนไพร เพื่อสิตำเครื่องแกง สิเว่าไปมันกะซำ "ผัดเผ็ดเอี่ยน" ล่ะครับ เพียงแต่บ่ได้ใส่กระชายกับพริกไทอ่อนซือๆ
ซอยหัวซิงไค พริกแห้ง กระเทียม ผิวบักกรูด ลงในครกแล้วโขลกให้ละเอียด อย่าลืมหยุบเกลือใส่นำนิดนึง
อาหารป่าเน้นเผ็ดแนเด้อครับ จั่งบ่คาว
พอแหลกแล้ว เติมพริกแกงเผ็ดลงไปนิดนึง พอได้สีสัน อย่าใส่หลายเด้อครับ มันสิเป็นเอี่ยนผัดพริกแกงเด้
จากนั้นโขลกให้เข้ากันอีกเทือนึง จั่งตักออกพักไว้
เตรียมเครื่องปรุงครับ ซอสหอย ซีอิ้วขาว ซอส รสดี น้ำปลา ผงนัว
หันมาค้างกะทะด้วยไฟอ่อน หยอดน้ำมันพืช 1 ช้อนโต๊ะ ผัดเครื่องให้หอม ถ้าได้ยินเสียงคนอยู่ห้องถัดไปจาม แสดงว่าใช้ได้ แซบแนนอน
จากนั้นเอาเอี่ยนลงไปคั่ว ใช้ไฟแฮงจนเกือบสุก จั่งหยอดน้ำลงไปพอได้จ้ำ บางคนเพินมักแบบ "คั่วแห้ง" เพินกะบ่หยอดน้ำครับ
หยุบใบบักกรูดลงไปนำ แล้วกะปรุงรสด้วยซอสหอย ซีอิ้วขาว ซอส รสดี น้ำปลา ผงนัว
ปล่อยให้เดือดจักคราว สุกดีแล้วจั่งหยุมใบกระเพราลงไป ถ้าได้ใบกระเพาแคระบ้านเฮาที่เกิดเองแฮงคักเด้อครับ กลิ่นหอมฉุนดีคัก
ที่ผมใช้นี้กะเก็บเอาจากข้างคอกรถหน้าตึกนี้ล่ะ เกิดเองกอบักใหญ่นึง
ใส่ใบกระเพาลงไปแล้วกะยกลงตักใส่จานเสริฟได้เลยครับ ได้น้ำฟองเย็นๆกินกับหนิดึงหูบ่ตีงพุ่นแล้ว
มื่อนี้กินกับหมู่สามคนกะเบิดไปแปดขวด ข้าวแลงกะกินบ่ได้
เล็กๆน้อยๆจากทีมงาน ขอบคุณบ้านมหาสำหรับพื้นที่ ขอบคุณเอื้อยอ้ายที่แวะเข้ามายามกระทู้
พ้อกันใหม่กระทู้หน้า ครับผม
Bookmarks