ลาบหมาน้อย ฝีมืออีแม่

[หยก ยโสธร]

สวัสดีครับ พี่น้องบ้านมหา มื่อนี้บ่าวหยกมีโอกาศได้เอาแนวกินทางบ้านเฮามานำเสนออีกเนมูนึง นั้นกะคือ "ลาบหมาน้อย"
กลับบ้านปีใหม่เห็นเครื่อหมาน้อยที่อีแม่เพินปลูกไว้ข้างเฮือนกำลังงาม เลยคึดอยากกินลาบหมาน้อยฝีมืออีแม่ กะเลยแอ่วเพินเฮ็ดให้กิน
เป็นสูตรทางยโสธรเด้อ ถ้าเฮ็ดบ่คือกันกะถือว่าแลกเปลี่ยนสูตรกันเนาะครับ

มาครับ เตรียมวัตถุดิบ เครื่องเปรุง
- ใบหมาน้อย ข่าอ่อน หัวซิงไค ปลาสำหรับตำป่น หอมแดง ต้นหอม ผักชีจีน น้ำสะอาด
- เกลือ น้ำปลาแดก ผงนัว พริกผง น้ำปลา

นี้ล่ะครับ เครือหมาน้อยอีแม่เพินปลูกไว้ ปลูกไว้ข้างแอ่งน้ำหม่องล้างถ้วยแฮงงามครับ ย่อนเครือหมาน้อยมักดินชุ่ม




มีนี้ให้อีแม่ลงมือเฮ็ดให้กิน เก็บมาจัก 2 กำมือ ล้างให้สะอาด คั้นใส่น้ำสะอาดจัก 3-4 ถ้วย แล้วกรองเอากากถิ่ม
ถ้าคั้นให้น้ำข้นแฮง กะสิเป็นวุ้นไว บ้านผมเอิ้นมันเป็นโต




พอได้น้ำหมาน้อยแล้วกะพักไว้ก่อนครับ ปล่อยไว้จั่งซี่ข้ามมื่อกะบ่เป็นวุ้น แต่ถ่าใส่เครื่องปรุงลงไปแล้ว บ่เกิน 5 นาทีเป็นวุ้นเลย
ผมกะยังบ่ฮู้ว่าเป็นย่อนหยัง ผุได๋ฮู้บอกผมแนเด้อครับ




หันมาต้มป่นครับ ปลาดุกนา ปลาเข็ง ได้มาจากไปส่อนส่างก่อนหน้านี้ล่ะครับ แบ่งขังใส่ใหไว้ถ่าป่น
ต้มป่นใส่น้ำปลาแดก ใส่เกลือลงไปนำ






พอปลาสุกกะแกะเอาแต่เนื้อ ตำป่นคือป่นปลาทั่วไปนี้ล่ะครับ ใส่หอมแดงสด พริกป่น ต้นหอม ผักชีจีน ผงนัว น้ำปลา
แต่สิปรุงรสให้เข้มข้น(เผ็ด,เค็ม)กว่าป่นธรรมดา กะว่าเวลาเอาป่นลงในน้ำหมาน้อยนัวพอดีบ่ต้องปรุงหยังเพิ่ม แล้วๆกะตักใส่ชามไว้




ซอยข่าอ่อน หัวซิงไคบางๆ ถ้ามีบักเขือเหลืองกะซอยใส่นำเด้อครับ แต่มื่อนั้นผมหาบ่ได้






เครื่องครบทุกอย่างแล้ว หาถ้วยออกมาเตรียมไว้ มือถือช้อนถ่า เพราะว่าทางบ้านบ่นิยมกินแบบเป็นวุ้น กะต้องฟ้าวแนจักหน่อย
พร้อมแล้วนับ 1 2 3 แล้วเทป่นปลาที่ปรุงเข้มข้นไว้ลงไป ตามด้วยข่าอ่อนกับหัวซิงไคที่เฮาซอยไว้ลงไป แล้วฟ้าวคนให้เข้ากัน




ตักแบ่งใส่ถ้วยแล้วลงมือซดทันที ถ้วยไผถ้วยมันบ่ซั่นช้อนมันสิตำกัน มีเวลาบ่ถึง 5 นาทีครับ หมาน้อยสิเป็นวุ้น
ทางบ้านบ่นิยมกินตอนมันเป็นวุ่นครับ เพราะว่ามันสิแยกน้ำแยกเครื่องออกจากกัน ทางบ้านเพินเอิ้นคายเครื่อง บ่แซบ
ฟ้าวหลายฮอดบ่มีเวลาถ่ายเอาฮอดวงพาข้าว รูปกะดาย ที่เห็นในภาพนี้ถ่ายหลังจากปรุงเครื่องไปบ่ถึงนาที เร่มสิจับกันเป็นวุ้นแล้ว




มาเบิ่งแนวกินตื่มครับ กะมีป่นปลา แบ่งออกไว้ถ่าจ้ำ




ป่นแมงขี่เต่าใส่แมงดา พ่อลุงเพินเอามาต้อน




ทอดปลาแห้ง กับซิ้นหลอด






ลากันด้วยภาพนี้น้อครับ ตำบักม่วงส้ม เอาไว้พ้อกันอีกในกระทู้หน้า






ขอบคุณบ้านมหาสำหรับพื้นที่นำเสนอ สุขซำบายดีทุกท่านครับ