สวัสดีจ้า ธุจ้า มิตรรักแฟนคลับบ้านมหา คือเก่าคือเดิม ห่างหายไปบ่ดน แต่กะ บ่ค่อยได้เข้ามาอัพภาพสวยๆหรือเมนูแปลกๆแต่กินได้ ให้ได้เห็นกันเพราะยากเวียกยากงาน ส่วนมากจะ อวนอัวอยู่ทางเฟช (โรคโชเชียลเนตเวิคกินหัว) เพราะมันอยู่ติดกับมือถือไปไสไปนำ อัพปุ๊บ กดไลน์ปั๊บ ตามใจชอบ
เรื่องมีอยู่ว่า เมื่อวันแรงงานแห่งชาติ ที่ผ่านมา ได้มีโอกาสเมือยามบ้าน(ศรีสะเกษ) กั้นเอ้ง ยามพี่ ยามน้อง และ หากินเมนูแซบๆ ตามกะเยิม แต่เพราะความจำเป็นบางอย่างต้องให้ ทริปนี้ อยู่บ้านนานเป็นกรณีพิเศษและเร่งด่วน เนื่องจาก พ่อใหญ่หนวด(พระบิดาบั้งเกิดเกล้า)บ่สบายต้องอยู่เฝ้าเป็นพยาบาล จนอาการดีขึ้นจน กลับบ้านพักรักษาโต จนสุมื้อนี้กะเป็นเวลาเกือบพอเดือน
ต่อไป งานทั้งหลายทั้งปวงที่พ่อรับหนักมาแต่ต้นลูกน้อยๆจนใหญ่กะต้อง พักยกไว้ก่อน ลูกๆ จึงจำเป็นต้องมาสานต่อ ความฝันของพ่อ...สืบต่อไป บ่เว้นแม้แต่ คนที่กำลังเว้าอยู่นี้คือกัน :b-b อีกบ่ดนนานก็ ต้องกลับไป สานต่อกิจการคอกหมู ของพ่อ ให้พ่อได้พักบ้างพ่อเมื่อยมาตลอดชีวิต แล้ว สู้ต่อไปเน๊าะพี่น้อง
และมื้อนี้ ขอนำเสนอ อีก ชีวิตความเป็นอยู่ ยามว่างเว้นจากเวียกการเกษตร อันได้แก่ เฮ็ดไฮ่ เฮ็ดนา เข้าสวนผัก ของยายสอน(คู่ชีวิตพ่อใหญ่หนวด) เลากะ จะหาแนวเฮ็ด ว่างมือบ่ได้ อยู่ชื่อๆบ่เป็น
และ เทื่อนี้เลา ต่อกี่น้อย ต่ำสาดผืน ไว้ให้ ลูกๆหลายๆได้ใช้ กับ ไว้ใส่กองบุญ ตามประสาเลา ผู้เฒ่าบ่ฮู้อยู่
สาดน้อย ความกว้าง แค่บ่ถึงเมตร พอปู นั่งได้ สองคนน้อยๆ หรือ ไซด์เด็กน้อยอนุบาล หอบไปโรงเรียน แต่สมัยสุมื้อนี้ เผิ่น มีที่นอนแบบสำเร็จ บ่ต้องพึ่งสาดคือสมัยก่อน นิ
ยายสอน เลากะเฮ็ดไว้หลายไซด์ หลายขนาด แต่มื้อนี้เป็นไซด์เด็กน้อย
และมีผู้ส่อยโตน้อยๆ มา ส่อยเฮ็ดส่อยแหย่เส้นให้ ตามกะเยิม เผิ่นบักหัวจุก หลายชายโตน้อย
เฮ็ดไปนำ เถียงกันไปนำ สองยายหลาย เถียงกันว่า สอดผิดสอดถืก ลาย บ่ หลานน้อยตาดี แม่เฒ่าตาบ่ดี เถียงกัน
สุดท้ายกะได้ สาดผืนน้อย ให้เบิ่งยุ จ้า
*** ความสุขเล็กๆของสองตายาย มื้อใด๋หลานน้อยลงมานอนนำ กะม่วนพอมีหมู่ปากเว้า ละมื้อใด๋ หลานน้อยขึ้นเมือนอนไฮ่นำพ่อแม่ คะเจ้า สองเฒ่ากะเงียบเหงาปานหอยไข้
:*-:*- ขอบคุณทุกการเยี่ยมชมกะทู้ เด้อจ้า ดนๆมาเทื่อ กะอย่ากันเด้อ ยากงานอิหลี(และยากเลาะตามประสาคนโฉด) ....จบข่าวก้อมจาก สีเกดธานี ไว้ท่อนี้ก่อน พ้อกันกะทู้หน้า เด้อพี่น้อง ซัมบายดี สุผู สุคน จ้า ธุจ้า
Bookmarks